Әрүн Сәкүснә буулһн

Сүмин өмнк талвң деер то-томҗ уга олн улс хурҗ. Эн өдр иудеймуд Урһц хуралһна сән өдр темдглҗәнә, энүнәс көлтә Иерусалимд олн мөргүлчнр хурҗ. Нәәрллһн Пасхин тәвдгч өдрт тусҗ.

Нег герин ик хорад Иисусла үүрлдг цуг улс хурҗ. Эдн мөргәд, күүндҗәлә. Генткн, ик салькнас көлтә һарчах мет, акад ә соңсгдв. Ә улм икдәд, цуг хорас дүүргв. Мел эн кемд һалын кесг олн заль, хурсн әмтнә толһа деер буув. Йосар болхла, эн йосн һал биш, эн Әрүн Сәкүснә темдг.

Эн йовдлын өвәрцнь-шуд үзгдл биш, әмтнә зүркнд болҗах үүмән бәәсмн. Минь эн саамд эдн байрлад, чаңһ дууһар Бурхнд магтал өргв.

Агчмин зуур эднд ямаран элвг юм өгснь, кедү сән юм Иисус келснь, күцәснь эднд медгдв, эс үздг болвчн, Энүг өөрән бәәхинь медцхәв. Ик өргмҗтәһәр апостолмуд Бурхнд ханлтан өргв - эннь олн әмтнә байр, зальврлһн болн дууллһн.

Бурхна эврә келәрн болн нань талдан тас таньгддго келәр магтҗахан эдн зөвәр цаг болад медв. Үүндән һанцхн апостолмуд биш, талын балһсдас болн орн-нутгудас ирсн әмтн эн келмүдиг медәд бәәцхәв. Римлян улс-латынь кел соңсад, грек-греческ, перс-персидск, араб-арабск, африкин улс-эврәннь келәр соңсцхав.

Зәрмнь өвәрц юмн болҗана гиһәд әәһәд бәәцхәв. Наадкснь инәлдәд, келцхәв:

- Эднтн цугтан согтулм!

Апостолмудас негнь өөдм деер һарад, һаран өргв, үг келх бәәдлән медүлв. Эн Петр бәәсмн.

- Иудеин залус болн холас ирсн улс, мини келсиг соңстн!

- Эврәннь Бурхна туск үгән эклв. Эн әмтн согту биш, тана санаһар, юңгад гихлә ода өрүн эрт цаг. Кезәнә әәлдәч Иоиль эндр болсиг әәлдәд келсмн: бидн Әрүн Сәкүстә болувидн. Сүл долан хонгин туршт Бурхна Үгд әәлдгдснәс кесгнь күцв. Эндр болсн юмн - Әрүн Сәкүснә буулһнас талдан юмн биш. Назаретин Иисусла болсн цуг хамгиг кезәнә Бурхна әәлдәчнр медҗ келсмн. Бурхна Көвүн болсан эн олн өврмҗтә юмар илдкв. Зуг, иим болвчн, тадн Иисусиг кирст хадлат, терүндтн римлянмүд нөкд болла. Зуг Бурхн Энүг әмдрүлв.

Мадн энүнд иткҗәнәвидн, юңгад гихлә, мадн эврән энүнә герч биләвидн. Мадн эврә нүдәрн Энүг кирст хадсна хөөн үзләвидн болн Энүг әмдинь медләвидн. Мадн Энүнә теңгрүр өөдллһнднь бас биләвидн. Ода Эн маднд Әрүн Сәкүс тәвҗ. Цугтан медцхәтн: Эн Иисусар Бурхн цугтад Деед Эзиг тәвҗ!

Эн күүһәр дамҗулад, эднлә Эврән Бурхн күүндҗәхиг хурсн улсин икнкнь медлго бәәсн уга. Апостолын үгмүднь үнн бәәснд эдн маһдлсн уга болн терүнә келсн Бурхна үг әмтнә седклднь күрв.

- Ода мадн ю кехм, - гиҗ эдн Петрас сурв.

- Һарһсн гемән суртн, Бурхна дөңгәр шин җирһл эклхән медүлтн, таднас күн болһн уснд бийән кирсләд, тегәд Әрүн Сәкүстә болхит.

Петрин Бурхна үг тархалһиг миңһәд улс соңсв, тер өдрин бийднь һурвн миңһн шаху күн кирслгдв. Эдн цугтан Иисус Христосин Сән зәңг байртаһар авцхав.

Тиигҗ Пятидесятницин өдрт Әрүн Сәкүсн буусн өдрт түрүн Чонҗ тогтв.