Итклләр кирслһн

Көдәһәр арһул ке сәәхн бәәдлтә гиигн хозлг гүүҗ йовна. Хозлг деер сәәхн хувцта залу сууна, энүнә бәәдләр эн африканец. Эргндән оньган өглго хозлг деер суусн залу свиток умшна.

Эврәннь төрскн һазртан Эфиопд эн байн болн нернь туурсн ик ямта күн билә, зуг эн бийән хөвтәд тоолдго бәәҗ. Юуна төлә әмд бәәнәв? - гисн сурврт эн хәрүһинь олҗ чадхш. Өңгрсн хөөн нанла юн болх? Мини һарһад бәәсн килнциг кен даах? Кен нанд дуран өгх?

Эн Бурхн кезәнә Израиль әмтиг шүүҗ авад, теднлә хамдан бәәһәд, тедн чикәр бәәхиг сурһна гисиг мөңгнә саңгин министр соңсҗ. Эн Иерусалимд ирәд, сүмд мөргәд, эврәннь сурврт хәрүһинь олҗ авхар седнә. Зуг энүг сүмд орулсн уга, юңгад гихлә эн ямта күн израильск әмтнә тоод орсн уга. Сурврмуднь энүнә уханд үлдв.

Иерусалимур йовлһиг тус уга болшгон учрар, эн үнтә свиток хулдҗ авв. Тенд әәлдәч Исаин келсн хамг бичәтә бәәсмн.

Ода ямта күн гиигн хозлг деер сууһад, герүрн хәрҗ йовад, нег күүнә тускар умшна. Әәлдәч келсәр Тер күн эврә дурар зовлңта кевәр әмән өглә, тегәд цуг олн әмтн Энүнә тускар медх зөвтә. «Эн юн болҗахмб?» - гиҗ мөңгнә саңгин министр бийәсн сурна. Эн цагла нег күн энүнәс сурв:

- Умшсан чи медҗәнч?

Эн Филипп билә. Бурхн апостолд келв, йовхларн көдә һазрт һартн. Нертә ямта күн әәлдәчин Исаин дегтр чаңһар умшхла, энүг Филипп соңсв.

- Би юм медҗәхшв, - гиҗ эфиоплянин келв. - Зуг чи сәәнәр медхлә, хамдан йовад нанд цәәлһҗ өгич.

Филипп гиигн хозлг деер һарад ямта күүнә өөр суув.

- Кенә тускар әәлдәч келҗәнә? - гиҗ Филиппас ямта күн сурв.

- Иисусин тускар, - гиҗ хәрүһинь эн өгв.

- Иисус? Эн кемб?

Тиигхлә Филипп Иисусин тускар келҗ өгв. Гемтә әмтиг эмнүлв, өврмҗтә юм үүдәв, кедү күүнд Эн дөң-тусан күргв. Фарисеин болн бурхна гелңгүд Иисусд дурго билә, тегәд римлянмуд энүг әмнәснь хаһцхав.

- Йир харм! - гиҗ ямта күн санв, би Терүнлә ик байртаһар таньлдх биләв.

- Чи ода Терүнлә таньлдҗ чадҗанач! - гиҗ Филипп келв, юңгад гихлә. - Иисус әмдрв!

Тегәд апостол эфиоплянд цугинь келҗ өгв: Иисус әмдрснә, Деегшән теңгрүр өөдлснә, Әрүн Сәкүснә тускар. Иисусин сурһульчнр Терүнлә негн болсан медүлхәр кирслгдцхәв.

- Би бас кирслгдхәр седҗәнәв! - гиҗ мөңгнә саңгин министр келв.

Филипп келв:

- Кемр чи йосндан Иисусд иткҗ бәәхлә, би чамаг кирслнәв.

Эфиоплянин зөв өгв:

- Иткҗәнәв, Иисус Христос - Бурхна Көвүн!

Усна өөр гиигн хозлг зогсв, тедн бууһад, Филипп энүг кирслв.

Ямта күүнә зүркн байрар дүүрв. Эн Филиппд ханлтан өргхәр седхлә, тер уга болҗ одв. Иисус даңгин энүнлә бәәхинь эфиоплянин медәд, байрлад һарад йовв.