Савлын хүврлһн

Стефан сәәһән хәәснд нег күн әвр гидгәр байрлҗана. Эннь Савл бәәсмн-Бурхна үг цәәлһдг улсин негнь, христианмудыг даҗрдг күн. Шин христианск Чөнҗд чинртә орм әзлҗәсн Стефаниг алснд, эн ханмҗан нуулго бәәв. Стефана үклин хөөн итклтә улсин әәмшгтә көөлһн эклв, Савл энүнд байртаһар, шунмһаһар орлцв. Энүгәрн Деед Эзнд тус күргҗәнәв гиҗ эн санҗасмн.

Нег дәкҗ Савл Дамаск тал зуульчлад йовв, тенд хамгин олн христианмуд бәәсмн. Эн эдниг бәрҗ авад, Иерусалимд авч ирәд, йос эвдсн улс мет, түүрмд орулхар санв. Энүндән эн эртәр белдәд, ах гелңгәс зөв авв.

Эн Дамаскур өөрдҗ йовтл нег юмн болв, эннь энүнә җирһлиг үндсәрнь хүврүлв. Генткн энүг хурц герл харңһурулв. Савл һазрт унв. Теңгрәс һарчах ду соңгсв:

- Савл, Савл! Юңгад чи намаг көөҗәнч?

Савл әәчкәл, сурв:

- Хәәрхн, чи Кемч?

Дун соңсгдв:

- Би көөҗәх Иисусв.

Энүг соңсчкад, Савл ухаһан алдтлан чичрәд бәәв, юңгад гихлә Иисусиг эн худл әәлдәч, худлч гиҗ әмтнд цәәлһдг билә. Ода Савл, Иисусин Чонҗиг һәәлдг күн, бийән зөв биш бәәсиг медв. Теңгрәс келҗәсн Иисус Бурхна Көвүн, Мессия бәәсинь ода энүнд илдкгдв. Энүнә тускар олн әәлдәчнр урдаснь медҗ келҗәсмн.

Дәкәд Иисус энүнд келв:

- Бос, балһс ор! Ю кехинь тенд чамд келх.

Савл босв, нүдән секхләрн, сохрсан медв. Өөрнь бәәсн улс энүг һараснь көтлҗ, Дамаскд күргв. Тенд эн һурвн хонгтан юм идлго, юм уулго бәәв. Эн өдрмүдт эн Деед Эзиг дуудад, энүнәс гемән эрҗ сурад зальврв. Һурв хонад Бурхн Савлур Анания гидг кү илгәв. Эн Савлын толһа деер һаран тәвәд, нүднә харань хәрү иртхә гиҗ Бурхнд зальврв. Нүднә харань хәрү ирхлә, Савл кирслгдәд, христианск Чонҗд орулгдв.