Христосин төлә түрүн болҗ зовлң эдлсн күн

Иерусалимин Чонҗ өсв. Энүнд ода кесг миңһн иткдг улс билә. Апостолмуд түрү үзсн улст хатяр биш килмҗән күргдг болв, энүнднь дала цаг кергтә билә. Тегәд эдн эн төр хаһлх шишлң улс шүүҗ авх шиидвр батлв. Эн шишлң улс, диаконмуд. Диаконмуд угатя улст килмҗән күргсн деерән Бурхна үгән тархав.

Эднәс негнь Стефан билә. Әрүн Сәкүсәр дүүргдсн, эн кесг әмтнә килинцнь медүләд, Деед Эзн Иисусин тәлә өвәрц олн юм күцәв, тегәд кесг иудеймуд үлү үзлдәд, энүнд дурго болцхав.

Аштнь Стефанд Синедриона - тер цагин иудейск деед зарһин өмн үгән бәрх кергтә болв.

Энүнә келснь Бурхна үг делгрүллһнә бәәдлтә болв. Хурсн улс энүнә үгин эклцд хаҗһр юм олсн уга, юңгад гихлә Стефан Бурхн болн Израилин олн-әмтн ямр кевәр бәәснә тууҗин тускар келв.

Зуг дарунь Стефан эднә тускар илднь келв:

- Бурхна үгин өмн тадн киизң болн дүләт! Яһҗ тана өвкнр цуг әәлдәчнриг эс кергллә, тер мет тадн Иисусиг ода керглсн угат!

Тиигчкәд Стефан теңгрүр хәләһәд келв:

- Бурхн мини нүд секв, тегәд би теңгрт Бурхн Иисус хойр зогсчахиг үзҗ чадҗанав.

Эн үгмүдин хөөн синедриона гешүд ууран бәрҗ чадсн уга. Эдн өсрлдәд, Стефанур дәврлдв, түлкәд, цокад, балһсна уульнцар авад йовв. Балһснас зааград һарчкад, энүг эргәд зогсчкад, алхар, чолуһар шивцхәв. Күнд шавта Стефан зальврад, келв:

- Деед Эзн Иисус, Бийүрн намаг ав!

Чолуһар цоклһн йир шүрүн болсар, эн өвдглҗ унв.

Тиигчкәд эн чаңһур хәәкрв:

- Деед Эзн, эн килнц һарһсн улсиг бичә засгл!

Мел иигҗ Иисус кирст хадата бәәтлән зальврсмн.

Кирст хадата Иисус мет, эврәннь өшәтнрин төлә зальврчкад, өңгрв.

Иисусиг дахгч улсас Стефан түрүн болҗ Аврачин, Деед Эзн Иисусин төлә әмнәсн хаһцв.