Иисус теңгрүр өөдллһн

Босхгдсн Аврач, Бурхн Иисус Эврәннь сурһульчнртаһан харһад күүндсн сән-сәәхн өдрмүд, һундл төрхд чилв. Иисус теңгрүр Эврәннь Эцкүрн хәрх бәәсмн.

Елеонск уул деер онц һанцарн бәәхд йир сән бәәрн билә, тегәд тиигәрән Иисус Эврәннь үүрмүдән дахулҗ ирв. Сурһульчнрнь гейүртә бәәсмн. Иисус эдниг үлдәһәд удлго йовхиг эдн медҗәлә. Пасхин өдрәс авн дөчн өдр давв.

- Бичә гейүртн, - гив Иисус, - Би теңгрүр Эврәннь Эцкүрн йовдг болвчн, Би таднтаһан. Мини туск Сән зәңгтәһәр тадн һазрин захд күрвчн, Би тендчн Әрүн Сәкүснә Нилчәр таднла бәәхүв. Би таднд кесг дәкч келләв, теңгрүр өөдлхләрн, таднд Төвкнүләчиг илгәхв.

Сурһульчнр юм сурх бәәдлтәһәр Багшурн хәләв. Эннь цаарандан:

- Иоанн усар кирсллә. Тиигҗ әмтн шин җирһләр бәәх седклән медүллә. Тиим кевәр Әрүн Сәкүсн кеҗәнә. Эн таднас шин улс кех, таднд сән зәңг тархах чидл өгх. Әрүн Сәкүсәр дамҗулад, тадниг даххув. Тадн нанта күүндҗ чадхит, Намаг медҗ, дуран Нанд өгхиг Эн кех. Тадн Бурхнас чидл авад, эңдән Мини тускар келхт. Түрүләд энд, Иерусалимд, хөөннь цуг Израиляр болн цуг һазрар.

Дарунь эн, хойр һаран теңгрүр өргчкәд, сурһульчнран әдслчкәд, һазр деерәс өөдлв! Энүг сурһульчнрин хәләцәс үүлн бүрктл, Эн улм-улм өөдлв. Эднлә иим саллһн зәрмстнь генткн учрсн йовдл болҗ медгдв. Иисус иим бәәдләр Эцкүрн теңгрүр өөдлх гиҗ кен санҗасмн! Ода эн Эцктәһән талын, күүнә нүднд үзгддго делкәд бәәнә.

Эдн дор ормдан зогсад, теңгрүр ширтҗ хәләцхәв. Ода эдн яахмб?

Эн саамла сурһульчнрин өмн гилвксн цаһан хувцта хойр күн һарч ирв. Эн Бурхна Элчнр бәәсмн. Иисус дәкәд деерәс бууҗ ирх, зуг Нилх биш, Эн күчтәһәр, туурмҗтаһар ирх. Иисус хойрдад, Зарһч мет, Күчтә хан мет ирх. Тер цаг күртл эн иткдг улсин зүркнд бәәх, теңгрт хан болҗ суух.

Иисус эднд сүүлднь келсиг тодлад, сурһульчнр байртаһар Иерусалимур хәрцхәв.