Бурхна Элч Гавриил Марияһур үзгдҗ ирлһн

Галилейд, Назарет гидг бичкн балһснд, Мария нертә күүкн билә. Модна урч Иосифд тер үгән өгсн билә. Мария Иосиф хойр эгл улс болв чигн, Давид хаана тохмин улс бәәсмн. Даруһас эдн өркән өндәлһхәр седҗәлә.

Нег дәкҗ, Мария герин көдлмш кеҗәсн цагла, генткн энүн тал Бурхна Элч Гавриил үзгдҗ ирв. Энүг Бурхн делкәһүр илгәсмн:

- Байрл, Амулң сән! Деед Эзн чамла.

Икәр әәсн Мария ухалв: «Иигҗ нанла нег чигн күн урднь мендләд уга билә».

- Бичә ә Мария, - гиҗ Бурхна Элч Гавриил келв, - чи Бурхна хәәрлт олсн күнч. Чамас көвүн төрх, терүнд Иисус гидг нер өгхич, Аврач гисн чинртә нер. Энчн алдр болх, Бурхна Үрн, Бурхна Көвүн. Деед Эзн терүнд Давид хаана ширә өгх, Бурхна орн-нутг мөңк болх.

Бурхна Элчин келсиг Мария әрә гиҗ медв.

- Биитн нам хәрд һарад угалм… - гиҗ Мария әрә дууһар келв.

- Ямр чигн күмни үрн эцктә болдмн, - гиҗ Бурхна Элч келв, - болв чамас төрх Көвүн өвәрц үрн болх. Терүнә Эцк - Бурхн. Тегәд би чамд Бурхна Көвүн төрх гиҗ келүв.

Бурхна Элчин келснд Мария иткв. Кесг зун җил хооран Бурхна өгсн үг күцх! Мария Аврачин эк болх!

Болв цугнь яһҗ күцхиг медҗ чадлго, Бурхна Элчәс эн сурв:

- Эн йовдл яһҗ күцх?

Тиигхлә Гавриил иим хәрү өгв:

- Әрүн Сәкүсн цугинь күцәх. Деед Бурхна чидл Нилх заях. Тер учрар чамас төрх Үрн әрүн сәкүсни болх, Бурхна Көвүн гиҗ нерәдгдх!

Бурхнд соңсхврта болхар Мария келв:

- Би Деед Эзнә мухла. Чини келсәр болтха.

Бурхна Элч терүнәс зааград, хәрү теңгрүр һарв.