Кеер йовсн хөөчнр

Вифлеемин эргнд хөөчнр хөөдән хәрүлҗ йовла. Сө болв, зуг эднд унтҗ болшго, юңгад гихлә сүргүдән хәләвр угаһар үлдәхлә, зерлң аңгуд бичкн хурһиг шүүрхнь юмн биш. Тегәд сө болһн хөөчнр сүргүдән мандг бәәсмн.

Зуг юн болҗахмб? Юн герлви? Нег гиигн болн герлтә юмн теңгр деерәс бууһад аашна! Хөөчнр ик гидгәр әәцхәв. Иткхд күчр! Энтн Деед Эзнә Элчлм! Бурхна Элч бууҗ ирәд, эднлә ээлтәһәр күүндв:

- Бичә әәцхәтн! Цуг әмтнд байрта зәңг келхәр ирүв!

Сөөнә Вифлеемд өвәрц Нилх төрснә тускар зәңглхәр теңгр деерәс бууҗ ирсән хөөчнрт эн келв. Эн Нилх - Аврач, Деед Эзн Христос.

Күләвр болҗасн Аврач ирсиг медсн хөөчнр өврцхәв. Байрта зәңг гидг эн! Цааранднь эдн улм өвәрц юм соңсв: Нилхиг үзхин төлә байн бәәшңгүр йовад керг уга. Малын яашльд Терүг эдн олх. Тегәд хамгин түрүнд малын хаша хәәх кергтә.

Хөөчнр нам хоорндан экләд күүндәд уга бәәтл, теңгрт Бурхна Элчин магтал соңсгдв:

- Бурхндан магтал өргҗәнәвидн, һазр деер әмтн ни-төвкнүн бәәтхә, әмтн Бурхна евәләр бәәтхә!

Энтн кезә нег цагт һазр деер күңкнсн хамгин сәәхн дун.

Дарунь Бурхна Элчнр уга болҗ одв.

Хөөчнр нег-негн талан хәләчкәд, шиидцхәв:

- Деед Эзнә келсәр, Вифлеем орад, Аврачиг олцхай!

Бурхн хөөдинь бүрн-бүтн хәләх гиҗ нәәләд, хөөчнр хөөдән үлдәчкәд, Вифлеемүр адһцхав. Бурхна келсәр, тенд эдн малын хаша олад, Марияг, Иосифиг болн яашльд кевтх Нилхиг үзв.

Хөөчнрин седкл байрар дүүрв, юңгад гихлә күләвр болҗасн Мессияг - Аврачиг, Иисусиг, Бурхна Көвүг цуһараһаснь түрүлҗ үзх хөв эднд учрв.