Нилх яашльд

Римин орн-нутгин түрүн хан Августд Римин һазрин әмтнә то авх сана Бурхн орулв. Әмтнә то авлһна кергт орлцҗ, тоод авгдхин төлә Палестинә цуг әмтн эврәннь өвкнрән балһснур йовулх зөвтә гисн зәрлг император һарһв.

Иосиф Мария хойр тер цагт Назаретд бәәдг билә.

- Чи меднәч, мини өрк-бүл Вифлеемәс, - гиҗ Иосиф Марияд келв. - Олн зун җил хооран орн-нутгиг һардҗ йовсн Давид-хаана хол элгн болдув, тегәд би тиигәрән йовх зөвтәв.

- Йириндән эн зуульчлһн нанд амр болх бәәсмн, - гиҗ саналдҗ, Мария келв, - зуг удлго би цаһан төр бәрхүв. Хаалһ күнд. Кемр Үрн күүнә һазрт төрхлә, эвго болх.

- Мария, би өөрчн йовхув, - гиҗ Иосиф энүг төвкнүлв. - Төрх Үрн Бурхна Көвүн, гиҗ Бурхна Элч келләхн. Бурхн мадниг хәләх.

Тиигәд Мария Иосиф хойр һарад йовв. Эднд ээлҗгн бәәв чигн, эдн удан йовцхав, тиигәд кесг өдр хаалһд давулв. Аштнь эдн Вифлеемд күрәд, хонх һазр хәәцхәв.

Гериннь өмн нааран-цааран йовдңҗасн гиичлүрин эзнәс Иосиф сурв:

- Гемим тәвтн, тана герт хонҗ болх хора бәәвзго?

- Харм төрхд, зә уга, - гисн хәрү гиичлүрин эзн өгв.

- Нег чигн зә угай? Ода мадн альд хонхмби? Нег бичкн болв чигн хора угай? Мини гергм саата, удлго цаһан төр бәрх. Эн сө чигн үрн төрх!

- Харм төрҗәнәв. Нег чигн зә уга, кемр зә бәәсн болхла, би тадниг хонулх биләв.

Әәсн Мария Иосифиг һараснь авад:

- Мадн һаза хонҗ чадшговидн! Һаза дегд киитн, хамгин түрүнд би төрх Үрнәннь төлә әәҗәнәв!

Гиичлүрин эзн эдн тал өөрдәд ирв.

- Тадн һаза үлдшгот. Герин хашан булңд малын хаша бәәнә. Тенд солом деер хонҗ болна, малын өөр дулан болх.

- Өр-өвч күн бәәҗит, әрүн седкләсн ханлтан өргҗәнәвидн, - гиҗ Иосиф Мария хойр энүнд ханлтан өргв.

Сө болхла йир өвәрц юмн учрв: делкә үүдәсн болн Эврәннь һарт цуг орчлңгиг бәрҗәх Бурхна Көвүн эн бичкн, арһ уга Үрнд төрв, зуг малын хашад солом деер кевтх учрта болв. Нилхин бәәдләр Энүг Бурхна Көвүн гиҗ күн келҗ чадшго. Үкрмүд болн ээлҗгд өвс иддг яашльд Мария Нилхән кевтүлв. Шин төрсн балчр күүкдлә әдләр Нилх көлвүрәд, гиинәд бәәнә. Иосиф Мария тал хәләчкәд:

- Бурхна Элч эн Нилхин тускар чамд келсиг мартад угайч? Иткхд күчр, Эн йир бичкн, эргндк бәәдл болхла йир түрү-яду.

- Иосиф, энчн үнн, - гиҗ Мария келв, - Бурхна келсәр цугнь күцх.