Дорд үзгин цецн улс

Кезәнә цагт Дорд үзгт цецн улс бәәҗ. Юңгад тедниг иигҗ нерәддг бәәсмб? Хамгин түрүнд эдн олн зүсн ном дасдг төләднь тиигҗ нерәдсн болҗана. Эдн одд шинҗләд хәләхдән дурта билә.

Нег дәкҗ одд хәләҗәсн цецн улс генткн шин од үзв, йир сәәхн герлтә од. Теңгрт бәәх олн оддас эн йилһрҗәнә. Урднь иим од эдн үзәд уга билә. Эн одн ончта, нег чигн однла әдл биш.

Юңгад иим шин одн һарч ирснә учринь Бурхн эднд зааҗ өгв: нег һазрт Хан төрҗ, кемр цецн улс одыг дахад йовхла, эдн тер һазрт күрх. Цецн улс теңкән уга байрлцхав! Эдн хаалһд һарад йовхар бийән белдхләрн, шин төрсн Хаанд белгән белдхән мартсн уга. Цуг кергтә тоотан авад, цецн улс һарад йовцхав.

Хаалһ йир ут билә. Болв эдн одна ардас йовцхав - одн өмннь герлтәд, цецн улсиг дахулҗ йовна.

Тиигәд йовҗ эдн әрүн Иерусалимд күрв. Шин төрсн Хааг үзхәр цецн улс адһҗ йовцхала. Тегәд ирн, хаана бәәшңгүр эдн адһв. Терүг энд олхвидн, гиҗ санҗ йовла.

Ирод хан эдниг тосч авхларн, сәәхн заңта күн болҗ медгдхәр бийән сәәнәр бәрв. Эдниг тооһад суухларн, күүндврин йовудт ямаран учрар ирсинь сурв. Теңгрт үзсн шин одна тускар цецн улс энүнд келҗ өгв. Шин одн теңгрт һарч ирснь - Хан төрснә темдг гицхәв.

- Хамгин түрүнд Терүг хаана герт хәәх учрар мадн нааран ирвидн, гиҗ цецн улс келврән төгсәв.

- Тадн чик йовдл күцәвт, - гиҗ Ирод келв. - Харм төрхд, энд шин төрсн нег чигн нилх уга. Болв тана хәәврт би нөкд болнав. Мана орн-нутгт номта улс бәәнә, тедниг цуһараһинь дуудад сурнав.

Келсәрнь болв, цецн ухата номтнр цаарандк хәәврт нөкд болцхав.

- Хан Вифлеемд төрх зөвтә. Тиигҗ Михей әәлдәчин библин дегтрт бичәтә.

- Вифлеем өөрхн, маднас хол биш, - гиҗ Ирод талын орн-нутгас ирсн гиичнрт келв. - Кемр мөр унад, үдин хөөн һархларн, харңһуртл күрх һазртан күрхит. Цугинь сәәнәр медҗ автн. Хәрүдтән орҗ ирәд, цугинь нанд келҗ өгтн. Би бас шин төрсн Хаанд белгән күргхәр бәәнәв.

Тиигҗ келхләрн, Ирод әрә гиҗ мусллһан бәрҗ ядв. Нилхд эн ямр чигн белг белглхәр седҗәсн уга, Терүг алхар седҗәлә. Зуг Ирод хар сана зүүҗәхиг цецн улс медсн уга.

Эдн байрта седклтә һарад йовцхав. Эдниг Вифлеемд күрсн цагт харңһурад, теңгрт одд һарв. Ут хаалһин туршарт эдниг дахулҗ йовсн одыг үзҗ, цецн улс байрлцхав. Эднә өмн йовсн одн дигтә Нилх бәәсн һазрт күрәд зогсв.

- Энд бәәх кевтә, - гиҗ цецн улс байртаһар келцхәв. - Лавта эн герт! Бурхн маднд хаалһим зааҗ өгв!

Бичкн гертнь ямта залус орҗ йовхиг үзсн Иосиф бийдән итксн уга. Хол талдан орн-нутгас ирсн байн гиичнриг Мария Иосиф хойр урднь гертән тосад уга билә.

- Мадн шин төрсн Израилин Хааг хәәҗ йовнавидн, - гиҗ цецн улс келв.

- Нилх тенд кевтнә, - гиҗ келәд, Иосиф Нилхиг үзүлв.

Эркн чинртә болн номта, байн хувцта улс бичкн Иисусин өмн сөгдҗ, Бурхнла мендлҗәх мет мендлсиг үзхд акад болҗ медгдв.

Болв цааранднь юн болв? Цецн улс үнтә белгүдән һарһв: алт, күҗ, каңкнсн үнртә тос Иисуст белглв.

Белгән өгчкәд, Нилхлә, Марияла болн Иосифла мендлчкәд, ямта гиичнр йовҗ одцхав.

Сөөднь Бурхн Ирод йосндан ю зуралҗахиг нег цецнд күргҗ медүлв.

- Бурхн нанла күүндв, - гиҗ өрүнднь эн үүрмүдтән келв. - Ирод хар сана зүүсн бәәнә. Нилхд ямаран чигн белгән нерәдхәр бәәхш, Терүнд харшлтан күргхәр седҗәнә. Тегәд хәрүдтән бәәшңднь орхмн биш.

Тиигәд эдн Нилхиг олҗ авсан хәәрллтә уга хаанд келлго хәрцхәв.

Маңһдурк сөөднь Бурхн Иосифлә күүндв. Гергтәһән болн Көвүтәһән Египетүр орһх кергтә гив. Иосиф тер дарунь босад, Нилх Иисусан, Марияһан авад, сөөһәр һарад йовв.

Египетүр хаалһ өөрхн биш. Бурхн эдниг ик гидг зовлңгас гетлгсиг эдн хөөннь медв. Ирод болхла цецн улс энүнд юм эс келснд уурлад, Вифлеемд болн терүнә эргнд бәәдг хө нас күрәд уга цуг көвүдиг алтха гиҗ закв. Тедн дунд шин төрсн Хан алгдх, гиҗ эн нәәлҗәлә. Болв тер цагт Иисус әәмшг уга һазрт йовла. Удан болсн уга, Ирод өңгрв.

Ирод сәәһән хәәснә дару Бурхн дәкәд Иосифин зүүднд орв. Әәмшг давв, Израилүр хәрҗ болна, гиҗ зүүднднь Бурхна Элч энүнд келв.

Иосиф Марияһан, Иисусан авад, төрскн һазртан, Назаретд, ирв. Эн балһснд Христосин бичкндк болн баһ насн давв.