Төрскн һазрурн хәрҗ ирлһн

Бичкн цагтнь Даниилыг бәрҗ Вавилонур авч ирсмн. Кесг цаг давсн бийнь, көгшрх насндан, Даниил төрскн һазран мартл уга йовсмн. Бурхан оньдин зүркндән хадһлад йовв. Эврә келн улсин төрскн һазрурн терүг хәрү авч ирх санаһан геелго йовҗ.

Бурхна сүмиг иудей улс босхҗ авсн болхла, ямаран сән болхм билә! Даниил эврәннь гертән зальврҗ мөргәд, мацг бәрәд Бурхнасн сурна:

- Деед Эзн! Хамгин күчтә, хәәртә Бурхн! Танд дурта мадниг әрүнәр хәәрлнәт. Мана һарһад йовсн килнц, хаҗһр йовдл дала. Тер учрар, Иерусалим нураһад, хамхлад бәәҗ, бидн хәрин һазрт одҗ тусвидн. Зуг тана седкл медәд, би Танд зальврад, гемән сурад, буруһинь тәвҗ хәәрләд, эврәннь төрсн һазрурн ирх зөв сурҗанав!

Бурхн тедниг соңгсв. Даниил бийнь ирҗ чадсн уга. Терүг сәәһән хәәснә дару, Израиль улс герүрн йовх зөв авна. Вавилона хан Иерусалимин сүмәс булаҗ авсн алтн, цаһан мөңгн бәәх олн ааһ-савс эздүдднь хәрү өгв. Израилин әмтнд чилшго байрта цаг ирв! Эдн йосндан сулдв!

Тер бийнь, һазрурн йовшго чигн улс һарч ирв. Юңгад гихлә, олн җилин туршарт эдн гертә, суулһсн модд, һаруд, дала болсн үр-иньгүдтә болад, теднәсн салҗ нүүх, бас күнд болв... Шин һазрт, төрсн һазр болвчн, дала көдлмш эдниг күләҗәсмн. Эңгдән хамхрсн, нурсн гермүд, хаша-хаац, энүг шинәс босхҗ тосхх кергтә бәәсмн.

Зуг күнд көдлмшәс әәдгонь олн болҗ һарв. Тер цагт ик зөрг кергтә бәәсмн. Болв, әмтн чик шиидвр авв. Эдн Иерусалимүрн ирҗ, Деед Эзн Бурхндан сүм босхҗ авх, орн-нутган шинәс бәрхәр шиидв.

Күүнә һазрас әмтн кесг долан хонгтан нүүлдәд, ут хаалһин күндинь дааһад һазрурн ирв. Энд үзсн юмн эдниг әәлһсн уга. Тәрән болвчн, уста үзмин урһц эңгдән буг өвсәр урһҗ одсмн, бог-шораһас цеврлх кергтә болв.

Терүнәс даву бачм керг эднд билә. Күнд көдлмшәс эдн төрүц әәсн уга. Юнгад гихлә эдн күүнә һазрт күнд көдлмш кеһәд дассн улс.

Эднә тәвсн күсл - Деед Эзн Бурхндан сүм босхлһн! Бурхндан иктх, Бурхан магтх хәәртә һазр кергтә болв. Вавилона бәрәнд мөргҗ чадлго кесг җил йовсн улс, эврә һазртан ирхлә, теднд зальврдг бәәрн уга болна.

Бурхна гелң әмт хураһад келнә:

- Сүм босхҗ авх дала цаг кергтә. Тәкл бәрҗ авх маднд арһ ода бәәнә. Кезәнә бәәсн ормднь тәкл тәвх зөвтәвидн.

Тәкл тәвхин һазрин орм әмтн цеврләд авв. Удан боллго, Бурхнд эдн бәрц бәрв. Терүгәрн Бурхндан ханлт өргҗәхән эдн медүлв. Бурхна күчәр эдн күүнә һазрас эврә һазрурн ирсмн. Олн җилд санҗ йовсн күсл күцв! Хөөннь, цаг давад, әрүслсн сүм Иерусалим балһснд тосхгдв. Урд кевәрн Иерусалим балһсн өндр шивә мет бат эрстә дүңгәһәд, цецгәрәд бәәв!

Вавилона бәрәнәс сулдсн әмтнд Бурхн әәлдәчнрән дәкн-дәкн тәвәд бәәв. Бурхна зааврмуд мартлго, ухандан оньдин бәрҗ йовтха гисн санан бәәсмн. Зәрмдән шоодх цаг учрдг, ик зунь-хәәрләд Бурхн бәәдг. Кезән-кезәнә Бурхн әәлдәчәрн келүлсн болҗана: «Нег цагт олн-әмтнә бәәдл-җирһл хүврх. Өмнкәсн сән цаг ирх!»

Деед Эзн келнә: «Иим цаг ирҗ йовна. Би Израилин болн Иудын гермүдлә шин бооца кех санатав. Тер хуучн бооцан биш, шин бооцан. Хуучн бооца кесн өдр, Би теднә эцкнриг һараснь авад Египетин һазрас һарһхар седләв. Зуг Мини зааврмудыг тедн күцәсн уга... Ода болхла, шин бооца Израилин герлә кехәр бәәнәв. Эн шин закаг күн болһна седклднь орулҗ, зүркнднь күргәд бичнәв. Теднд Би Бурхн болнав, тедн болхла, мини әмтн болх... Теднә һарһсн буру йовдлмудыг, килнциг буру гилго, тедниг хәәрлҗ Би йовхув». (Библь, Иеремиин дегтр, 31-гч бөлг, 31-34-гч шүлгүд.)