Баһ наста Самуил

Израильтянмуд Бурхн өгсн һазртан олн җилдән бәәсмн. Эдн эврәннь һазран хортнас дангин харсн болувчн гермүд тосхв, һазран хаһлв, устә үзм суулһв.

Ода уул деер Бурхна шатр дүңгәҗ зогсҗана, тенд көдә һазрар зуучлһна цагт Бурхна арвн заавр хадһлҗасмн. Әмтн Бурхнд мөргхәр эс гиҗ бәрц бәрхәр тиигәрән йовцхана.

Бурхна гелң Илий деегшән һарч йовсн әмтиг хәләһәд, Бурхна герин үүднә өмн суусмн. Эн йир көгшн өвгн билә, тиигәд Бурхна керг-үүл күцәҗ чаддго билә. Ода болхла терүнә көвүднь цуг кергинь күцәнә. Зуг энүнә көвүд Бурхна келсн үг соңслго му керг, йовдл кеҗ йовцхана. Илий һундад теднд келдг билә: му йовдл бичә һарһтн, зуг көвүднь эцкиннь келсн үгд оньган өгдго бәәҗ.

Нег дәкҗ Илийүр бичкн көвүһән көтлҗ гергн ирв.

- Менд! Мини нерн Анна. Чи намаг танҗанч? Би энд олн җил хооран нааран ирәд скиниин өмн көвү сурҗ Бурхнд мөргләв. Би тиигхд арһан гееһәд биләв. Би гейүрҗ ууляд биләв, намаг таньвч? Ода би кишгтә күмб. Эн мини көвүн - Анна көвүн талан хәләнә. - Чи нанд эврән келләч, Бурхн мини зальврһ соңсх. Мини көвүнә нерн Самуил, эн чамта үлдх зөвтә. Эн көвүн чамд болн Бурхнд нөкд болх. Би болхла Деед Эзнд үг өгләв.

- Самуил, Бурхн чамд әдс өгх, - гиҗ Илий келв. - Йовий, би чамд альд бәәхичн үзүлнәв.

Самуилд Илий нөкд болҗахнь йир таасгдна.

Нег дәкҗ асхн Самуил цуцрад Бурхна хәәрцгин өөр кевтәд унтҗ оч. Генткн эн серв, юңгад гихлә, терүг нерәрнь күн дуудсн болв.

- Юн болв? – гиҗ эн хәәкрв.

Ә-чимән уга, тиигхлә Самуил босад Илий тал гүүҗ ирв.

- Чи намаг дуудлч? - гиҗ эн сурв.

- Уга, - гиҗ Илий келв, - би чамаг дуудсн угав. Хәрү йовҗ унт.

«Акад юмб?» - гиҗ Самуил дотран ухалад, хәрү орндан орад унтҗ одв.

- Самуил! - хәрү көвүн эврәннь нерән соңсв.

Көвүн чочад, шулун гидгәр Илийһүр гүүҗ ирв.

- Ода болхла, чи намаг дуудвч?

- Уга, би чамаг дуудсн угав, мини көвүн, - гиҗ Илий келв. - Одад унт!

Самуил хәрү унтв. Удл уга көвүн хәрү бийинь чаңһар дуудсиг соңсв. «Ода би эндүрсн угав», - гиҗ санад, Самуил хәрү Илийһүр гүүҗ ирв.

- Би энд бәәнәв Илий! Чамд ю авч ирхм?

Бурхна гелң медв, эн Бурхн Самуилиг дуудад бәәсинь.

- Нә, ода хәрү йовад, кевтәд унт. Бурхн чамаг дәкәд дуудхла, чи иигҗ кел: «Келтн, Деед Эзн! Чини зарц чамаг соңсчана!»

Самуил арһул орндан орад, бийинь дуудхинь күләв. Генткн соңсгдна:

- Самуил! Самуил!

- Деед Эзн! Келтн. Чини зарц чамаг соңсчана - гиҗ арһул Самуил келв.

Бурхн Самуилд келв:

- Би Илийин гер деер зарһ күцәхв, юңгад гихлә терүнә көвүд му йовдл һарһна. Эдн Бурхна нер һутаҗана. Илий көвүдән зогсасн уга, тегәд би энүг засгла харһулхар бәәнәв. Тер хойр нег өдр әмәсн хаһцх.

Иим әмшгтә үгмүд Деед Эзнәс соңсчкад, Самуил өрүн күртл унтсн уга. Нарн һарч йовхла, Самуил үүдән секв.

- Бурхн чамд сө ю келв? - гиҗ Илий сурв.

Самуил Деед Эзн келсн әәмшгтә үгмүдиг энүнд келшоһар бәәсмн, болв хөөөннь Илийд келҗ өгв. Бурхна гелң тагчгар һундад иигҗ келв:

- Кемр Бурхн келхлә, тиим болх. Эн - Деед Эзн.

Кесг җил давад Самуилд келсн Бурхна үг күцв.

Җил болһн Самуил өсәд-босад йовв. Деед Эзн даңгин Самуилтә бәәсмн. Самуил Деед Эзнә әәлдәч күн болсинь цуг Израиль медв. Деед Эзн Эврәннь ик чинртә Бурхна үнән Самуилд келдг билә. Самуил болхла терүг израилин әмтнд күргдг болв.