Баһ наста хөөч

Вифлеем тер цагт йовдсн улс дала шаһаҗ ордго бичкн хотн бәәсмн. Болв мел тиигәрән Бурхн нег өрк-бүлүр Самуилыг тәвсмн. Эн бүлин көвүдиннь негнь хөөннь Израилин хан болхм бәәсмн. Иессейд, көвүдин эцкд. Әәлдәч Самуил бийнь энүнә герт ирснь йир ик чинртә юмн болв, тегәд энүг орад хот эдлтхә гиҗ дуудв. Хотнь ширә дүүрң, Иессей көвүдән таньлдулв.

- Эн мини ууһн көвүн, - гиҗ бахмҗтаһар Иессей келв.

«Эн оданас хаана бәәдлтә, - гиҗ Самуил санв. - Саул мет өндр болн сәәхн цогцта. Саулиг хаанд суулһсн цагла тер бас иим бәәсмн».

Зуг эн цагла Самуил Бурхна ду соңсв:

- Энүнә һазак бәәдлинь бичә хәлә! Күн һазак бәәдлинь хәләдг, Бурхн зүркинь хәләдг. Эн хан болҗ чадшго.

Тиигәд Иессей дара-даранднь долан көвүһән үзүлв. Зуг Бурхн эдниг цугтаһинь: «Уга, эн биш!» - гив.

- Нә, ода хот эдлхм, - гиһәд Иессей ширәһүр өөрдв.

- Күләҗә, чи нанд көвүдән цугтаһинь үзүлвч? - гиҗ Самуил сурв.

- Нанд дәкәд негн бәәнә, отхн. Тер хө хәрүлҗ йовна.

- Терчн нааран күрәд иртхә! - гив Самуил.

Удан боллго Давид көвүн Самуилин өмн ирҗ зогсв. Эн цаһан үстә, сәәхн нүдтә, өкәр чирәтә көвүн билә.

Деед Эзн Самуилд келв:

- Энүг тосар түркчк, эн мөн.

Самуил тоста өвр авад, маңнаһинь тосар кирсләд, келв:

- Бурхна нерн деерәс чамаг кирслҗ, Израилин олн әмтнә хан гиҗ зааҗанав.

Эн саамла Деед Эзнә сәкүсн Давидт буув.

Иессей наадк көвүдтәһән алң болхларн нег чигн үг келҗ чадлго бәәв. Давид болхла бийинь тер өдр юн болсинь нам күцц медлго бәәв.