Итклин диилвр

Самуил ирснә хөөн Давид цааранднь хөөдән хәрүлдг болв. Хөөдән идгүр тууҗ йовад, эн ятх авдг болв. Хөд тогтнад, идшлҗ йовсн цагт, эн ятх татад, шин ду һарһдг болв. Зәрмдән хөөчд күчр йовдл учрдг билә. Тиигәд, нег дәкҗ эн хөөдән аюһас харсх болв.

- Би хөөдән хәләсн мет Бурхн намаг хәләҗ йовна, - гиҗ Давид нег хурһан геечкн гихләрн ухалв. - Эн намаг хәләҗ йовна, әәмшг учрхла намаг харсна.

Давид ятхан авад, экләд дуулв:

- Деед Эзн - мини хөөч мет болҗана.

Эн намаг идгтә болн цевр уста һазрар йовулна. Мини седкл тевчнә, чик хаалһар намаг Эврәннь нернә төлә йовулна. Кемр би үклин һазрар йовхларн, юмнас әәшгов, юңгад гихлә Чи нанла, Чини мотр, Чини тайг - намаг тогтнулна.

Саул хан зәрмдән ууртан бүтәд зовдг билә, хөөннь энүндән һундад, чилшго зовлңгта бәәдг болв. Нег дәкҗ эн икәр уурлад, бәәшңгднь бәәсн цуг улсиг әәлһәд, чичрүлв. Саулин зарцнрин негнь ятхар сәәнәр нааддг Давидиг бәәшңгүр дуудхм гив. Терүнә наадн хааг тогтнулх гиҗ санцхав. Тиигҗ Давид хаана бәәшңд тусв. Кемр Саул медсн болхнь, кен түүнә өмн суухинь кениг Самуил хаана бәәрнд заасинь! Зуг энүнә тускар эн аңхрдго билә, дарунь цуг седкләсн баахн Давидт дуран өгв. Терүнә наадсн көгҗмнь йосндан седклднь тусв.

Хан Саул филистимлянрин өмнәс дәәнд йовхла, Давид герүрн хәрҗ чадв. Дәәнд баахн көгҗмч кенд кергтә бәәсмн? Тиигәд Давид дәкәд эцкиннь хөд хәрүлдг болв, ахнрнь Саулла хамдан дәәнд йовв.

Нег дәкҗ энүг эцкнь дуудад келв:

- Тиигәрән, мана церг зогсҗасн һазрур гү, ахнртан идх хот күргҗ өг.

Цөөкн цаг болад, Давид церг зогҗасн бәәрнүр күрв. Эн ахнртан хот-хол авч ирв, теднә өөр сууһад, цергчнр келсинь соңсв. Генткн цугтан ә тасрад, холагшан шилтҗ хәләлдв. Нег филистимляна дәәч израилин цергүр өөрдҗ йовна. Я-а, ямаран эн дәәч бәәсмн! Чаңһ, чиирг, өндртән һурвн метр шаху! Энүнә нернь Голиаф. Күнд зер-зев өмсҗ, һартан ик чигн җид бәрҗ.

- Мини үг чидлән гееһәд уга! - гиҗ хәәкрв. - Нег кү нааран тәвтн, өгтн, бидн хойр бәрлднәвдн. Кемр тер намаг диилхлә, мадн бийән диилгдснд тоолхувидн. Кемр би диилвр бәрхлә, тадн диилгдсн болхит. Әәҗәцхәнт, әәмтхәс!

- Эн урднь тадниг бәрлдәнд дуудлу? - гиҗ Давид ахнрасн сурв.

- Э, кесг дәкҗ. Зуг хоосар. Энүнлә ноолдсн-үклән хәәснлә әдл!

- Бурхн мадна төлә эсий! - гиҗ Давид алң болв.

Цергчнр инәлдцхәв.

- Бурхнд эн бәрлдән юучв? - Энүнд чидлин, эвин, сән зер-зевин тускар келгдҗәнә. Саул хан Голиафиг диилсн цергчд күүкән өгх болла. Зуг нег чигн күн һарч зөрсн уга.

Цергүр хаанд көгҗм татсн баахн Давид ирснә тускар Саулд келҗ. Саул терүг дуудтха гив.

- Нанд филистимлянинта бәрлдх зөв өг, - гиҗ Давид сурв.

- Бичә тиим юм сан! - гив хан. Чи одачн баахнч, Голиаф чидлтә болн дамшлтта цергч.

- Мини эцкин хөөдәс аю чигн, арслң чигн хурһ хулхалхар седхлә, би тедниг диилҗ йовлав. Кемр Бурхн тиигхд нанд нөкд болсн болхла, одачн тер филистимляниниг бәрлдәнд диилхд нөкд болх, - гиҗ итклтәһәр көвүн келв.

- Чини иткл намаг өврүлҗәнә, - гиҗ Саул келв. - Чамас нань күн босхар седҗәхш... Мини цергә хувц өмс, мини зер-зев ав, тегәд чамла Бурхн бәәх.

Давид Саулин цергә хувц өмсҗ үзхәр седв, зуг тедн дегд күнд болв, өмсчкәд, әрә хойр көлән көндәв. Тегәд теднән тәәләд, Давид чолу хайдг деесән авад, хөд хәрүлдг тайган авад, фидистимлянина өмнәс йовв.

- Гош-гош! - гиҗ өмнәснь һартан деестә һарч ирсн көвү үзн Голиаф инәв. - Чи нанла бәр бәрлдхәр бәәхмч?

- Чи мини өмнәс үлдтә, җидтә һарвч, би чини өмнәс - Деед Эзнә нертә, израилин цергә Бурхнта! - гиҗ Давид хәәкрв.

Эн эврәннь деесндән чолу тәвәд, деесән хүрүлҗәһәд, чолуһинь филистимлянинүр шивв. Чолун дигтә хортна секәтә маңнад одад тусв. Голиаф һазрт унв. Давид терүнүр гүүҗ одад, бийиннь үлд тач авад, терүг алв. Энүг үзсн израильтянр Давидин диилврәр омг авад, зөргтәһәр орн-нутгасн филистимлянриг көөв.