Хоһн хулсар кесн зембль

Иаков көвүдтәһән Египетд бәәсн Иосифүр нүүҗ ирснәс нааран кесг цаг давв. Ода эдн негн өрк-бүл биш, йоста келн улс, Израилин келн улс болв. Египтянмуд Иосифиг болн энүнә күргсн ач-тусиг чигн кезәнә мартв. Цагин йовудт фараонмуд сольгдад бәәв, египтянмудт болхла израильтянмуд әәмшг учрахар ирсн әмтн гиҗ бодгддг болв. Тегәд чигн шин фараон эдниг мухлад тоолад, шаврар болн соломар тоосх, хар көдлмш кегүләд, зарад бәәсн учрар эднә җирһл-бәәдл муурв. Евреймудин зарцнрин көдлмшиг бүрткдг ахлачнр даңгин дала көдлмш даалһад, арднь ордг болв. Кемр кех тооһас баһ тоосх кехләнь, эдниг арсинь авад цокдг билә.

Болв египтянмуд еврей улсиг кедү дорацулхар седдг болв чигн, эдн төлҗәд, тооһарн өсәд, чаңһрад бәәцхәв. Тиигхлә хан әәмшгтә шиидвр авв - израильтянмудын өркд көвүн үрн төрхлә, тер дарунь әминь таслх шиидвр.

Нег дәкҗ нег еврей күүкд күүнәс көвүн үрн төрв. Зуг Бурхн нилхиг аврҗ чадхиг эк медәд, өдр болһн зальврдг болв. Төрсн көвүһән кесгтән нууһад, египтянмудт эн медүлсн уга. Тиигәд һурвн сар давв, зуг цааранднь нууҗ болшгог күүкд күн медв. Көвүнә эгч Мариам экдән нөкд болад, эдн нилхиг усн ивтршго гиһәд дотраснь мокнар шалдсн хоһн хулсар кесн зембльд кевтүләд, Нил һолур авч ирв. Һолын эргәс хол биш хоһн хулсн дотр нилхтә земблян тәвв. Нааран һолын урсхл күршго, зембль чигн усчшго. Мариам бултчкад, нилхтә зембль хәләһәд, цааранднь юн болхинь гетәд суув. Удан болсн уга, һолур күүкд улс аашхиг эн үзв. Өмннь байн хувцта баахн хатн йовна. Фараона күүкн, наадкснь зарц күүкд улс. Фараона күүкн өөмхәр аашх кевтә. Ирн, хувцан тәәләд, уснд орв. Фараона күүкн нилх кевтх хоһн земблүр өөрдх дутм, Мариамин зүркн чаңһар цокв. Фараона күүкн өөрдәд зогсв.

- Энтн юмб?! - гиһәд фараона күүкн хәәкрв.

Зарц күүкнд закад, уснас зембль авхулад, бүркәсинь секүлв.

- Энтн израильтянмудын үрн кевтә. Экнь нилхән мини эцкин цергчнрәс нуухар седҗ кевтә, - гиҗ фараона күүкн дахульмудтан келв.

- Ода энүгитн яахмб? - гиҗ теднь сурв.

- Эн нилхиг алулхар седҗәхшв!

Тиигҗ келн, эднүр болһамҗтаһар Мариам өөрдҗ ирсиг фараона күүкн үзв.

- Чи альдас нааран ирвч? - гиҗ фараона күүкн сурв.

Мариам тетнәд келв:

- Би?.. Би эндәс хол биш наач йовлав. Кемр зөвтә гихләтн, эн көвүг асрх күүкд кү олад, нааран дууднав.

Фараона күүкн зөвтә гихлә, Мариам гүүхәрн гертән ирв. Әрә кииһән авад, күүкн экдән юн болсиг келв.

- Бурхн мана зальвриг соңсв, - гиҗ экнь байртаһар келв.

Эк күүкн хойр һолур адһв.

- Эн нилхиг герүрн авад, аср, - гиҗ фараона күүкн күүкд күүнд закв. - Би чини келсичн даңцахув. Көвүг невчк өсхләнь, нанур авад ир, көвүчлҗ авхув.

Теңкән уга байрта эк гекхәс нань, келх үг олҗ чадсн уга. Фараона күүкн нилхиг үмсәд:

- Байрта харһий, көвүн минь, - гиҗ келн, ирсн хозлгурн йовв.

Эк болн Мариам нилхиг бас үмсәд:

- Гертән ирснчн байрта! - гицхәв.

Көвүн цөөкн җил өрк-бүлдән бәәв. Өрк-бүлнь көвүг зальврдг дасхад, дуринь Бурхнд тусхаҗ өскв. Көвүн невчк өсхләнь, экнь энүг көтләд, фараона бәәшңгүр авч ирв. Фараона күүкн көвүнд Моисей гидг нер өгәд, фараона көвүн болҗ ухата, сурһмҗта өстхә гиһәд, килмҗән тусхав.

Арһ учрх болһнд Моисей эк-эцкдән, Мариам эгчдән болн Аарон ахдан золһхар адһдг билә. Фараона бәәшңгәс һарад, израильтянмудын селәдин өөгүр давад һархларн, көвүн эднә җирһл үзәд, зовдг билә.

- Юңгад иим зөв уга бәәдл тогтсмб, юңгад египтянмуд амрад-җирһәд бәәнә, тер хоорнд болхла, мини келн улс йир түрү бәәцхәнә. Израилевин үрд өрүн эртәс авн асхн ора күртл унсн махлаһн авлго көдлцхәнә, өлн, түрү бәәцхәнә, бийдән чигн эзн биш.

Нег дәкҗ күнд аца авч йовсн израильтяниг мал тууҗ йовх кевтәһәр египтянин малядад тууҗ йовхиг көвүн үзв. Генткн израильтянин бүдрәд унхлань, египтянин терүг малядад, босххар седв. Иим өршәңгү уга йовдл үзсн Моисей тагчг бәәҗ чадсн уга. Эргнд күн бәәх угаһинь хәләчкәд, көвүн тедн тал гүүҗ ирәд, египтяниг алчкв. Египтянин әмн уга кевтхиг үзхләрн, ю татсан эн медв.

Маңһдуртнь Моисей керлдҗәх хойр израильтяниг үзәд, эднүр өөрдәд, зөв угаднь иигҗ келв:

- Болҗ, бичә көндә? Яһад ахан цокчанач?

Тернь эргәд, энүнд:

- Чамд юн керг? Өцклдүр египтяниг алснла әдл намаг бас алхар седҗәдг болвзач?

Әәсн Моисейин чирәнь цәәҗ одв. «Юңгад иим түргн әмтн мини һарһсн йовдлын тускар медчкв? - гиһәд эн алң болв. - Кемр египтянина әмнд күрсим фараон медхләрн, мини әмим таслх, цааҗла харһулх. Нанд эндәс гүүх кергтә!»

Фараона бәәшңгүр эн дәкҗ ирсн уга. Моисейин татсн үүлин тускар медсн фараон энүг цааҗла харһулхар көвүг олтха гиҗ закв.

Әәсн, бийән гемшәсн Моисей мөрдәчнрәс бултад йовҗ, Египтәс зөвәр хольҗад, Мадиамск һазрт күрв.

Энд болхла элстә болн чолута һазр. Әрә гиҗ худг олсндан Моисей байрлв. Дигтә ундан хәрүлсн саамлань цөөкн баахн күүкн хөөдән услхар худгур ирв. Көвүн күүкдт нөкд болв. Ханлтта күүкд көвүнлә хотарн хувалцв.

Эн долан күүкн Иофор гидг күүнә күүкд бәәҗ. Көвүн үрн уга Иофорд нөкд болх баһ наста чидлтә күн кергтә. Хара зөңдән зуульчлҗ йовх Моисейд эн үлдх үрвр кев. Тиигәд Моисей фараона бәәхтә бәәшңгиг Мадиамск һазрт бәәдг шатр сольв.

Дарунь эн Иофорин - Сепфора ууһн күүк авад өрк-бүл болҗ. Эдн көвүтә болцхав. Моисей хадм эцкиннь хөд хәрүлдг болв, Египетиг экләд мартв. Нег махн, нег цусн келн улсиннь тускар чигн ухалдган уурв.

Зуг Бурхн израильтянмудыг мартсн уга. Зовлңгинь үздг, зальврлинь соңсдг билә, тегәд эднд нөкд болхар шиидв. Терүнә төлә Эн Моисейиг дуудв.