Улан теңгсин усна дундаһур

Израильтянмуд йовҗ одсна тер дарунь фараон эднд һарад йовх зөв өгсндән һундрхв.

- Маднд тедниг күцх кергтә! - гиҗ цергчнртән эн закв. - Хәрүлҗ авчкад, чаңһар засглхмн.

Хойр төгәтә хозлгт хурдн мөрд татад, египтянмуд ардаснь көөлдв. Мөрд залҗ йовх мөрчнриг саадгудта цергчнр дахҗ һарв.

Израилевин үрд Ханаанск һазрур темцв. Бурхн Бийнь эднд хаалһинь зааһад йовв. Өдртнь өмннь үүлн кевтә йовна, сөөднь һал мет йовна. Өдртнь үүлн сүүдр өгәд, халунас халхлна, сөөднь хаалһднь һал өгнә. Үүлн зогссн цагт Моисейин заксар әмтн зогсад, шатр татад, амрцхана. Үүлн экләд көндрхлә, израильтянмуд һарад йовцхана.

Тиигәд йовҗ эдн Улан теңгст күрәд, эрг деернь бүүрлцхәв. Шатран татад төвкнҗәхләнь, мөрдин көлин ә болн шууган соңсгдв. Египет бәәх үзгүр хәләхләрн, эдн ик холд дала гидг мөртә цергчнрән дахулсн фараон аашхиг үзцхәв. Хәрү эдниг Египетүр хәрүлхәр фараон күцҗ йовна.

Әмтн дер ормдан менрәд, мөртә церг аашхиг үзв. Ю кехмб? Өмннь һол, арднь - цергчнрән дахулсн фараон. Израильтянмуд дегд әәхләрн, Моисейиг гемшәцхәв:

- Эн эрм көдә һазрт үктхә гиһәд, мадниг нааран авч ирвч? Энд үкхин ормд египтянмудын мухла болад бәәхмн бәәҗ.

Эдниг авч һарснд ханлтан өргхин ормд гемшәсн бийнь, Моисей эдниг төвкнүләд, иигҗ келв:

- Бичә әәцхәтн! Деед Эзн эндр таднд нөкд болхиг үзхит! Деед Эзн тадниг харсх, тадн болхла төвкнүн бәәцхәтн!

Дигтә тер кемлә өвәрц юмн учрв. Өдрин дуусн эднд хаалһинь зааһад, өмннь йовсн үүлн израильтянмудын болн египетск цергин хоорнд зогсв. Египтянмуд өмнән нигт үүлн эрс үзәд, үүмцхәв. Үүлн уга болад тархиг күләхмн, гиҗ цергчнртән фараон закв.

Египтянмудын талас үүлн хар, нигт бәәсн болхла, Израилевин үрдин талас тер кевәрн герлтәд, хаалһинь заав. Израилтянмуд төвкнәд, невчк әәдгән уурцхав. Болв цааранднь яахмб? Цуһар Моисейүр хәләлдв. Тиигхлә Бурхн терүнд иигҗ келв:

- Мотр өргәд, һаран теңгс тал өрг, теңгс дундаһур һазрар израильтянмуд йовцхах.

Моисей теңгсин эрг деер зогсад, һаран өргв. Салькн көдләд, теңгс дольгалв, салькна үләлһн улм чаңһрад бәәв. Дегд чаңһар үләсн салькн усиг хооран кехлә, теңгсин тал дунд өргн хаалһ һарв. Салькна күчнд теңгсин усн эрс мет зогсчана. Бурхн өвәрц юм күцәв! Израильтянмуд әәдгән уурад, зөргтә болцхав. Теңгсин йоралар түрүлҗ һатлсн Моисейин ардас өрк-бүлмүд нег-негнәннь ардас цувлдад, һарад йовцхав.

Үүлн адһм угаһар египтянмудын деер һархла, эдн мөрдән адһулҗ, теңгст һарсн хаалһур темцв. Зуг эднә хозлгин төгәс чиигтә элснд булхв, фараон цергән түргәр өмәрән йовулхар күчрдв. Тер хоорнд израильтянмуд теңгсиг һадлад, цаадк эргднь күрв. Салькн үләдгән уурад, теңгсин усн көвәдән орв. Израильтянмуд менрәд, теңгсүр хәләв. Уснд хамхрсн хозлгуд үзгдхәс нань, египтянмуд үзгддгән уурв.

Израильтянмуд Моисейла хамдан дегц частр дуулцхав.

- Деедс Эзн - мини күчн болн мини туурмҗ. Нанд аврач билә. Мини Бурхн, тегәд би Бурхиг даңгин туурмҗлхв!