Һуйр болн хад

Израильтянмуд эрм көдәһәр йовҗ йовад, уста һазрт күрәд зогсв. Әмтн болн мал ундан хәрүләд, энд урһҗасн финикин пальм зандна сүүдрт амрцхав. Амрч авчкад, Син нертә көдәһүр темцв.

Египтәс һарч йовхларн, эдн невчкн өдмг авсн билә, тернь дарунь чилҗ одв. Ода яахмб? Израильтянмудт Бурхнас хот сурх кергтә бәәсмн. Эднд дурта Бурхн өлнәс көлтә үкүлшго билә. Болв Бурхнд иткдг эс дассн израильтянмуд шинәс һундлан келәд бәәцхәв. Моисей Аарон хойрур ирәд, иигҗ келцхәв:

- О, кемр бидн египетск һазрт хорсн болхнь, тенд махн элвг билә, цадтлан өдмг иддг биләвидн. Тадн мадниг харһнулхар эн көдә һазрур авч ирвт.

Эдн Бурхна болн Моисейин туст ямр чигн ханлт уга! Болв хәәртә седклтә болн тесвртә Деед Эзн Моисейд келв:

- Мини келн улсин келсиг Би соңсув, Би эднд теҗәл өгнәв.

Маңһдур өрүнднь шатрасн һарсн израильтянмуд һазр цәәһәд цаһасиг үзцхәв. Моисей эднд келв:

- Таднд Бурхн күмс заяв. Теңгр деерәс илгәсн һуйр эн: цуглулад, гертән орулцхатн.

Теңгрин манниг (һуйр) израильтянмуд экләд хурав, цуһараднь тер күртв. Бурхн эднд һуйриг өрүн эрт илгәдг билә, өрүн эрт терүг хураһад авх кергтә, юңгад гихлә нарнд тер хәәлҗ оддг бәәсмн.

Моисей келв:

- Зуг эндр эдлхән хураҗ автн, көрң кеҗ бичә хуратн, юңгад гихлә Бурхн өдр болһн таднд эдлх күмс илгәх.

Болв зәрмснь Моисейиг соңслго, маңһдуртнь идх гиҗ һуйр хураҗ авцхаҗ. Өрүнднь терүгән идхәр седхлә, тернь өтҗ оч. Хайх кергтә болв!

Дарунь израильтянмуд усн угаһар түрцхәв. Эрм көдә һазрт һолмуд чигн, нуурмуд чигн, худгуд чигн уга. Болв Бурхн әмтиг цаңһдулҗ үкүлхий? Үкүлшго. Зуг израильтянмуд Бурхнас сурлго, саак гемшәлһән өргәд, Моисей тал ирцхәв.

- Юуни төлә мадниг Египетәс нааран авч ирвч? Мана күүкдиг болн мана малыг эн көдәд цаңһдулҗ үкүлхәрий?

Моисейиг чолуһар цокх дүңгә эдн уурта билә. Моисей усна төр хаһлтха гиҗ Бурхиг сурв.

- Эн келн улсиг би яахмб? - гив эн.

Тиигхлә Бурхн Моисейд келв:

- Эврәннь мотр авад, хад деер һар, чамла әмтн бас йовтха. Хад тал өөрдәд ирхләрн, мотрарн хадыг цок, тендәс усн һооҗад һарх.

Моисей хад цокхла, терүнәс цевр усн һарв. Цаңһдҗасн улс теңкән уга байрлцхав. Усн угаһас көлтә мәәртҗәсн улсин урлнь, келнь, хоолнь хагсад, шачасн билә. Ода болхла эдн ундан хәрүләд, буһшан дүүргәд, малан чигн услҗ чадв.

Бурхнд итклго, даңгин ө-һундл өргәд бәәсн бийнь, израильск келн улс көдәд бәәсн цуг цагин йовудт Бурхн эдниг хайсн уга, хәләһәд йовв.