Шачах көгл бут

Нег дәкҗ Моисей Синай уулын шидр малан хәрүлҗ йовла. Генткн эн өвәрц юм үзв: көгл бут шачана. «Акад юмб, бут һал падрад шачав чигн, үмсн болҗ шачахн уга!» - гиҗ Моисей алң болад, энүгүр өөрдв. Өөрдн, генткн күүнә ду соңсв.

- Моисей! Моисей! Би Авраамла, Исакла болн Иаковла күүндсн Бурхнв. Египетд бәәсн израильтянмудын зовлң үзәд, эднә һашудсн хәәкрлһ соңсув. Тегәд эдниг мухлаллһнас сулдхад, үсн болн бал элвг Ханаан һазрур һарһхар шиидүв. Тегәд йов: израильск келн улсиг Египтәс нүүлһхин төлә Би чамаг фараонур йовулҗанав. Юмнас бичә ә. Би чамла.

- Би? Кемр би эврәннь келн улсур ирәд, Деед Эзн минь, таднур намаг тана эцкнрин Бурхн илгәв гихлә, Терүнә нернь кемб? - гиҗ сурцхах.

- Би Мөңк бәәдг, - гисн хәрү шачах көгл бутас соңсгдв. - Би һанцхн Бурхнв. Аврамин, Исаакин болн Иакин Бурхнв.

- Би хурц, олмһа келтә бишв, дала үг угав болн тодрхаһар келҗ чаддн угав, - гиҗ Моисей келн, - намаг израильтянмуд чигн, нег үлү фараон чигн соңсшго, - гив.

- Би һазр деер бәәх әмт заяһад, ду һардг эс дасхлав, эсий? - гиҗ Бурхн келв. Чини келх кергтә үгмүдиг чини чееҗд орулхд нанд амр, юмн биш.

Болв Моисей тер дарунь зөвшәрлго бәәв.

- Талдан кү илгәтн!

Тиигхләнь Бурхна уурнь күрв.

- Уга. Моисей, чи күцәх зөвтәч! Кемр чи үг келхәсн әәҗәхлә, эврәннь ах Ааронар нөкд ав, терчн чамас сәәнәр келҗ чадх. Зуг чи Мини элч болад, Израилин келн улсиг мухлаллһнас һарһхич!

Тиигәд Моисей Бурхна даалһсиг күцәхәр Египетүр ирв. Зуг Моисей Аарон хойр израильтянмудыг сулдтха гиҗ фараониг кедү сурсн бийнь, тер зөвшәрсн уга. Тер хоорнд израильтянмудын кеҗәх көдлмш улм икдв, засгллһн улм догшрв. Бурхн фараонд болн Египтин һазрур арвн засгллһ: аюл, өвсн-урһмлд хорлтан күргдг хорха болн гем илгәсн бийнь, фараон әмтиг сулдхад, Бурхна өгнәв гисн һазрур һарх зөв өгсн уга.

Тиигхлә Бурхн өрк-бүл болһна төлә ямр чигн өөлтг уга неҗәд хурһ Пасхин байрла һарһҗах мет һарһтн гив. Пасха «хаҗуһар давад һарлһн» гидг чинртә. Хурһна цус ааһд авад, асхн терүг үүддин бәрүлмүдт болн көндлң моддт түрктн гиҗ закв. Тер сө нег чигн күн гертәсн һарх зөв уга билә, юңгад гихлә Деед Эзнә Зарц Египтәр йовад, ууһн үрдиг цугтаһинь алла. Үүдднь цусар лашсн гермүдт орсн уга, давв.

- Хот эдлхиннь өмн нег юм күцәх кергтә, - гиҗ герин эзн келв. - Хол хаалһд һарад йовҗах мет хувцлад, һартан тайг авх кергтә. Хурһна махиг адһмтаһар идх кергтә. Энтн Деед Эзнә Пасха. Эн өдриг мартлго, үйәс үйд байр кеҗ, темдглх кергтә, гиҗ Бурхн маднд закрв.

Өрк-бүл ширә эргәд суусн кемлә һашун ноһаһар амтлулсн мах авч ирв. Махна амтн күүкдт таасгдсн уга, болв эцк болһн иигҗ цәәлһҗ келв:

- Египетд мадн мухла болҗ кесн көдлмш бас эн ноһанла әдл һашута билә.

Махнд немр кеҗ, өдмг өгв, зуг йирин өдмг биш.

- Энтн экн угаһар элдсн һуйрар болһсн өдмг, - гиҗ экнь келв. - Экн угаһар элдтн, гиҗ Моисей закв. Терүгәрн мадн хол хаалһд һарад йовхдан белнәвидн гиҗ иткүлхвидн, хол хаалһд экәр элдсн өдмг авч болшго.

Тиигәд өрк-бүл нөөртән үдшәв.

Өрүн эрт израильтянмуд гериннь өмн һарад зогсцхав. Эн өдр удандан күләсн алдр өдр болхий?

Тер хоорнд элч довтлҗ ирв. Тер израильтянин билә.

- Цугнь Бурхна келсәр күцв! - гиҗ эн ик холас хәәкрв. - Египтянмудын өрк болһна ууһн үрнь өңгрв, теднә тоод фараона көвүн. Седклләнь эс ирлцсн йовдл һарһҗ, дәкҗ Энүнд харшлҗ чадшгог Бурхн эндр фараонд лавта үзүлв!

- Тегәд мадн ода яахмб? - гиҗ әмтн сурцхав.

- Тадн хол хаалһд һарч йовхар бийән белдчквт, эсий, - гисн хәрү элч өгв. - Бәәсән авад, харһх һазрур темцтн.

Әмтн цуһар гер-герүрн тарад, бийләһән авч болх цуг юман белдв. Эцкнр болхла, ууһн көвүдән һараснь авад, үүднә көндлң моднд болн үүднә деер бәәх цус үзүлцхәв:

- Энтн энд израильтянмуд бәәхин темдг. Эн цусн чамаг Бурхна зарһас харсв, көвүн минь!

Тиигәд Пасха байр үүдсмн, эн өдрлә Деед Эзн Эврәннь келн улсан египетск мухлаллһнас сулдхсн болдг.

Фараон Моисей Аарон хойрт иигҗ келсн болдг:

- Бостн, мини келн улсин хоорндас һартн, тадн болн Израилевин үрд!

Орн-нутгас шулуһар һарч йовтха гиҗ, египтянмуд эдниг адһулв.

Деед Эзн эдниг сулхтл, дөрвн зун һучн җилдән израильтянмуд египетск һазрт бәәсмн. Күүкд улс болн бичкдүд угаһар залу улсин то зурһан миңһн бәәсмн.