Иосиф ахнртаһан харһлһн

Долан җилдән цуг египетин һазр элвг урһцта болв. Эн долан җил давв. Терүнә ардас урһц уга долан җил экләд ирв. Цуг египетин һазрмудар харһнлһн эклв. Әмтн фараонур ирәд буудя сурцхана:

- Маднд иддг хот уга, бидн харһнад үкчәнәвидн.

Тиигхлә фараон келв:

- Иосифур одтн, тер таднд нөкд болх.

Әмтн Иосифур одв, тегәд эн египетянмудт буудя хулддг болв. Олн зүсн орн-нутгудас Египетур әмтн буудя хулдҗ авхар ирцхәсмн. Цаһан мөңг өгәд, тедн буудя хулдҗ авдг бәәҗ. Египетин балһсдар хоршулгдсн буудя хадһлдг һазрт дегд дала болсн учрар, Иосиф сурсн күн болһнд буудя хулдҗ чадсмн.

Иаков эврәннь өрк-бүлтәһән бәәсн Ханаан һазрт харһнлһн бас ирҗ. Египетд буудя бәәнә гиснь Иаков соңсад, көвүдән тиигәрән илгәв. Эднә хаалһнь зөвәр удан болн күчр болвчн, эдн аш сүүлднь Египетин хаана хашаһур ирв. Тенд нег күүнүр эдниг йовулҗ. Чидлтә, сәәхн чирәтә, өндр нурһта кү үзәд эдн әәһәд, өврәд таасҗ. Эн күүнә хувцинь ямр күчтәһинь болн үнтәһинь үзәд, хамгин ах Рувим дотран ухалҗ: «Эн күн - Египет хаана дарук, эн орн-нутгиг һардҗах хойрдгч күн болҗах кевтә». Ахнр Иосифиг, эврәннь дүүһән, таньсн уга. Эдн терүнә өмн һазр деер унад келсмн:

- Зерг, хәәрлтн, маднд буудя хулдтн, бидн сән үн өгнәвидн.

Иосиф болхла тер дарунь ахнран таньв. Адһлго ухалҗаһад иим шиидвр эн авв: «Терүнә ахнр урдк кевәрн аль теднә седкл сольгдв? Кезәнә кесн хар саната йовдлан санад, гемән медҗ буруһан сурҗану?»

Тиигәд Иосиф шүрүтәһәр эднд келсмн:

- Тадн - туршулачнр. Цуг Египетин һазрмудын дуту-дунд медҗ авад, дәкәд дәврхәр бәәнәт?

- Уга, уга, - гиҗ тедн улм дорагшан унҗ, терүнд гекв.

Эн агчмд Иосиф эврәннь зүүдән тодлв: ахнрин өвснә боодһас терүнә өвснә боодһан өмн гекҗәсинь.

Рувим зөргләд келв:

- Бидн цуһар нег эцкин көвүдвидн. Бидн 12 биләвидн. Негнь-уга, болв отхн көвүн гертән үлдв.

- Нә, сән, - гиҗ Иосиф келсмн, - зуг тадн үнән келҗәхинь би медхин төлә, тадна негинь энд бәрәнд үлдх зөвтә. Наадкснь герүрн хәрәд, эврәннь өрк-бүлдән буудя күргҗ өгчкәд, отхн дүүһән нанур дахулҗ иртн. Кемр тер ирхлә, тадн дәкәд буудя хулдҗ авад герүрн хәрхит. Зуг эс ирхлә, тадн худл келәд болн туршулачнр болҗахинь медүлҗәх темдг.

Тегәд эдн тулмсарн дүүрң буудята герүрн хәрцхәв, зуг Симеон гидг нег ахан үлдәв.

Ахнр герүрн ирәд, эцкдән цуг теднлә учрсн йовдлан келҗ өгнә. Зуг Иаков отхн көвүһән геедрҗ одх гиһәд әәһәд, Вениаминиг төрүц тәвшгов гиҗ көвүдтән медүлв.

Болв цөөкн сар давв. Теднә хотнь чилхлә, өвчәх зүркән бәрәд, отхн көвүһән ахнртаһан йовх зөвшәл эцк өгсмн. Иуда көвүнь эцкдән үгән өгв: «Отхн көвүнтн хәрү ирх, би андһар өгчәнәв».

Эдн египетин ик балһснур ирсн дару, тедниг һардачур күргҗ. Ахнр үүмлдв. Зуг цааранднь терүнәс даву өврмҗтә юмн болсмн. Тедниг хот белдчксн ик хорад орулв. «Юңгад һардач мел тедниг тоохар седҗәхмб? - гиҗ ахнр ухалв. Тенд күн болһниг ах-дүүһин наснаннь дараһар суулһснд эдн бас өврәд бәәҗ. Египетин улс яһҗ теднә наснь медҗ чадсмб? Хот ууҗасн цагла, һардач теднә өрк-бүлин тускар икәр медхин төлә орчулачар дамҗад күүндҗ.»

Маңһдуртнь эдн герүрн хәрхәр һарв.

Симеон ахнртаһан йовна, теднә тулмс буудяһар дүүрң. Иаков эцкнь тедн герүрн хәрҗ ирхлә ик гидгәр байрлх!

Зуг холагшан йовад уга бәәтл, тедниг һартан бу бәрсн мөртә улс күцв.

- Юңгад тадн һардачин юм хулхалвт? Тер таднд хот өгәд тоов, тадн болхла ичртә, му йовдл кеһәд, терүнә цаһан мөңгн ааһнь хулхалҗ аввт! - гиһәд теднә негнь келв.

Рувим эврәксән харсв:

- Зерг, бидн төрүц хулха кедговидн. Мадниг негҗтн, кемр кенд чигн олҗ авхла, терүг та цааҗлҗ чадҗанат. Мадн болхла цуһар тана һардачин мухлас болҗ үлдхвидн.

Тедн эврәннь тулмсин боодһас тәәлхлә, Вениаминин тулмас ааһ унв. Иосифин закврар Вениаминин тулмд ааһ тәвгдсинь эдн альдас медх бәәсмб? Иосиф дәкәд нег дәкҗ эврәннь ахнриннь седкл санаһинь сәәнәр медхәр седсмн.

Тедн әәһәд фараона бәәшңгүр хәрҗ ирв. Ааһ хулхалсн Вениаминиг мухла болх гиҗ Иосиф закв. Иуда зөргтәһәр келв:

- Зерг, тана мухлад келх зөв өгит. Би тана мухла дүм хәрҗ ирх гиһәд, эцкдән үгән өгләв. Кемр эн герүрн хәрҗ эс ирхлә, мана эцк өңгрҗ одх. Тегәд би таниг эрәд сурҗанав дүүһиннь ормд энд би мухла болад үлдсүв.

Ахнрнь терүг Египетур хулдсн хар саната йовдл кесн буруһан медсинь ода Иосиф үзв. Вениаминиг Иосифла әдл бас мухлалһнд хулдхин ормд, ахнрнь терүг харсхин төлә, эврән бийснь мухлас болхар седсмн. Генткн Иосиф бийән бәрҗ чадад, уульв. Дәкәд невчк тогтнад эн келв:

- Би-тана ах Иосиф.

Арвн негн ах-дү нег чигн юм келҗ чадлго терүнүр, түрүн үзҗәх кевтә, хәләһәд бәәв. Энүнд эцкнь цугтаһаснь дурта болв гиһәд, эдн үлү үзәд бәәҗ, аш сүүлднь, Египетур хулдсн Иосиф болҗахмб? Эн ода Египетин орн-нутгиг һартан бәрҗәх күн.

- Бичә әәтн, - гиҗ Иосиф келв, - бийән бичә гемшәтн. Юңгад гихлә Бурхн тадниг болн кесг талдан улс харһлһнас харсхин төлә намаг Египетур илгәсмн. Талданар болхла, мадн цуһар харһнад үкх биләвидн. Хойр җилдән харһнлһн болҗана, дәкәд тавн җилдән эн аюл болх. Эн Бурхна зураг би тадн ирсн цагас авн медв.

Ахнр көндрлго зогсад бәәҗ. Иосиф иим күчтә болсинь эдн иткҗ чадҗахмн уга. Эдн терүнд кесг хорта, му юм кесн бийинь Иосиф теднәс өшәһән авхар бәәхш гисинь эдн бас иткҗ чадҗахш.

Зуг Иосиф Вениаминиг теврәд, байртаһар хәәкрв:

- Вениамин! Намаг, эврәннь ахан Иосифиг чи таньҗанч?

Тиигхлә Вениамин терүнүр гүүҗ одв, эдн теврлдәд, байрлад уульцхав. Ахнр-дүүнр хоорнд бәәсн харш эрс унв! Ахнр неҗәдәр өөрдәд, Иосифла теврлдв. Эднлә юн болҗахинь медҗ чадлго бәәв. Ахнр йир удан күүндәд, дала юм келлдәд байрлцхаҗ.

Иосифур ахнрнь ирсинь фараон соңсад, терүг бийүрн дуудад келсмн:

- Эврәннь ахнр-дүүнртән эцкән, өрк-бүлмүдән нааран авч иртхә гиҗ кел. Эдн Египетур ирәд харһнлһн чилтл бәәтхә. Теднд Ханаана һазрас өрк-бүлмүдән авч ирхин төлә би теднд хозлгуд өгнәв. Үлдәх эдл-ахуһин төлә бичә зовтха, юңгад гихлә энд би теднд цугтаһинь өгхв.

Иосиф фараонд сөгдәд келв:

- Мини зерг, та нанд дегд хәәртәт. Би шулуһар йовад, тана заквр күцәнәв.

Маңһдурк өдртнь ахнр эврәннь эцкән, өрк-бүлмүдән болн малмудан авч ирхәр Ханаан тал һарад йовсмн. Вениаминин дайлсн һар холас үзгттл, Иосиф удан теднә ардас хәләһәд зогсв.