Ыдыктыг Сүлдениң бадып келгени

Бурганның өргээзиниң баарынга шөлге сан-түң чок чон чыглып келген. Ол хүн иудейлер Дүжүт ажаалдазының байырлалын демдеглеп турган болгаш чүдүкчүлер Иерусалимге кайыын-даа келген. Ол байырлал Пасха соонда беженги хүнде эртер.

Иисус-биле эдержип турган улус шупту бир бажыңның делгем улуг өрээлинге чыглып алган. Олар шупту тейлеп база аразында чугаалажып турганнар. Хенертен дээрден кедергей күштүг хат шимээнинге дөмей дааш дыңналгаш, улам күштелип- күштелип, оларның турган бажыңын дола берген.

Ынчан оттуг хөй бичии дылдар көзүлген соонда, кижи бүрүзүнүң кырынга чаңгыстап турупкан. Ол херек кырында изиг от эвес, а Ыдыктыг Сүлдениң демдээ болур.

Онза чүве көзүлген чүведе эвес, а чыылган кижилерниң чүректеринде чүү болуп турганы болур. Оларны өөрүшкү бүргеп келгеш, Бурганны ыыткыр алдаржыдып эгелээннер. Ол дораан Бурган оларга Иисустуң оларга чугаалаан өөредииниң кайы хире буянныын база олар дээш чүнү кылганын ажыдып берген. Көзүлбес-даа болза, Иисус олар-биле кады деп билип турганнар. Апостолдар улуг көдүрлүүшкүн-биле Бурганга четтиргенин илередип, алгап-­йөрээп, мактап турганнар. Кезек үе эрткенде олар боттарының төрээн дылындан аңгыда, шуут танывазы дылда Бурганны мактап турарын эскерип каан. Чүгле апостолдар эвес, а келген кижи бүрүзү дыңнаарга, элчиннер оларның төрээн дылында чугаалап турарын дыңнап турганнар. Римчилер — латынь дылды, гректер — грек дылды, перстер — персид дылды, арабтар — араб дылды, африканнар — боттарынң тус черниң төрээн дылын…

Олар элдеп-эзин чүве болган деп коргуп, айтыржып турганнар. А чамдык улус:

— Олар арага ижип алгаш, эзирип кааннар-дыр — деп кочулаан.

Апостолдарның бирээзи бедик черге туруп алгаш, сөс чулаалаксап турарын көргүзүп, холун көдүрген. Ол Пётр болган:

— Иудеяның чону база ырактан келгеннер, мээң сөзүм кичээнгейлиг дыңнаңар! Бо улус, силерниң бодап турарыңар дег, эзирик улус эвес-тир, ам хүн үнгенден бээр чүгле үшкү шак ышкажыл. Бо дээрге Иоил медээчиниң чугаалаан чүвези бо хүн бүткен-дир, бис Ыдыктыг Сүлдени алдывыс. Сөөлгү каш неделя иштинде Бижилгеде баш удур чугаалаан чүвелерниң дыка хөйү боттанды. А бөгүн болган чүве — Ыдыктыг Сүлдениң бадып келгени-дир. Назарет чурттуг Иисус-биле чүү болганын база бурунгу медээчилер бижээн турган. Кылган күчү-күштүг херектери-биле, кайгамчык чүүлдери-биле Ол Бодун Бурганның Оглу деп шынзыткан. Ындыг турбужеге, силер римчилерниң холу-биле Иисусту крестке шаажылап өлүрген силер. А Бурган Ону катап диргискен.

Бурган Иисусту катап диргискен, а бис шупту ооң херечилери болдувус! Ынчангаш бүзүрээр бис! Ону шаажылап өлүрткенин база ооң соонда катап дирилгенин боттарывыс карактарывыс-биле көрген бис. Ол дириг! Ол дээрже көдүрлүп турда база аңаа турган бис. А ам Ол Ыдыктыг Сүлдени чорутканы бо-дур. Шупту билип алыңар: Бурган ол Иисусту бар бүгү чүвениң Дээргизи болдуруп каан!

Дыңнакчыларның көвей кезии Пётрну дамчыштыр Бурган Боду чугаалап турар деп билип турган. Апостолдуң чугаалаан чүүлү херек кырында болган болуушкуннар биле дүгжүп турарынга кым-даа чигзинмээн, суртаал сагыш-­сеткилге хандыр дээп турар.

— Бис ам чүнү кылыылы? –деп Пётрдан айтырып турганнар.

— Бачыттарыңар миннип, Бурганче эглиңер. Силерниң кижи бүрүзү Бурганның дузазы-биле чаа амыдырал эгелээн демдээ кылдыр сугга суктуруңар — деп, Пётр харыылаан. — Оон Ыдыктыг Сүлдени белек кылдыр алыр силер, чүге дээрге медээчилерниң чугаалаан чүвези силерге база хамааржыр.

Пётрнуң суртаалын муң-муң кижи дыңнаан, ол хүн үш муң хире кижи сугга шымындырган. Олар шупту Иисус Христостуң Буянныг Медээзин өөрүшкү-биле хүлээп алганнар.

Ынчалдыр Пятидесятница хүнүнде, Ыдыктыг Сүлдениң бадып келген хүнүнде бир дугаар Церковь тургустунган.