Бүзүрел-биле сугга суктурары

Ээн ховулар оруунга каас-коя чууза терге оожум чылып бар чораан. Ооң серизиниң адаанда көөрге Африка чурттуг хевирлиг бай-шиник кеттинипкен эр кижи олурган. Ооң бүгү-ле кичээнгейи номчуп чоруур чүүлүнде база долгандыр чүнү-даа эскербейн чоруур дег.

Ол Эфиопияда саң-хөө сайыды эрге-дужаалдыг, шыдалдыг-бай сураглыг кижи деп санаттырып турган. Ындыг-даа болза бодун аас-кежиктиг деп бодавайн чораан. Ол хөй-ле айтырыгларга харыы тыппайн муңчулуп чораан: чүү дээш чурттап чоруур мен? Өлүп каарымга мээң-биле чүү болурул? Бачыттарым өршээр кижи бар бе? Бо-ла бодумга кым меңээ ынак болур деп?

Эрте-бурунгу шагда Бурган оларның-биле кады болур дээш база оларны шын амыдырап чурттаарынга өөредир дээш, израиль чонну шилип алганының дугайында ол министр дыңнаан турган. Ынчангаш ол Иерусалимге барып дуганга киргеш тейлээр база ону дүвүредип чоруур айтырыгларга харыыны оон тып аарын күзээр турган. А ол дүжүмет израиль чонга хамаарышпас боорга, ынаар кирерин аңаа чөпшээревээн. Хөй-ле айтырыглар билдинмес хевээр арткан.

Ындыг-даа болза Иерусалимче аян-чоруу хей болбазын дээш, ол улуг дүрүг бижимелди садып алган. Ында Исайя медээчиниң хөй-хөй чылдар бурунгаар чугаалаан сөзүглелин шуптузун бижип каан чүве-дир.

Ам ол сайыт чууза-­тергелиг дедир чанып бар чорааш, бир-ле кижиниң эки-тура-биле хилинчектиг өлүмнү хүлээп аарын, база хөй-ле кижилер Аңаа хамааржып, Ооң апаарының дугайында медээчиниң чугаалаан черин номчуп чораан. Ол чүү уткалыг чоор?! — деп ол бодундан айтырып чорда, ол үеде бир-ле кижи:

— Номчуп чоруур чүвеңниң утказын билир-дир сен бе” — деп айтырган.

Ол Филипп болган. Бурган элчинге ээн орукче үне бээрин чугаалаан. Кара кештиг бай дүжүметтиң Исайя медээчиниң номун ыыткыр номчуп чоруурун дыңнап кааны ол.

— Мен чүнү-даа билип шыдавадым — деп эфиопчу харыылаан. — А бир эвес сен билир болзуңза, кады чоруптаалы, меңээ тайылбырлап бээр сен.

Филипп чуузаже киргеш, дүжүметтиң чанынга олуруп алган.

— Медээчи мында кымның дугайында чугаалап турары ол? –деп Филипптен айтырган.

— Иисустуң дугайы-дыр — деп, демгизи харыылаан.

— Иисус? Ол кымыл?

Ынчан Филипп Иисустуң аарыг кижилерни канчаар экиртип, кайгамчыктыг чүүлдерни кылып, чеже кижиге канчаар дузалап турганын, а фарисейлер болгаш Бурганның бараалгакчыларының Аңаа кайы хире көөр хөңнү чок турганын, түңнелинде римчилерниң дузазы-биле канчаар өлүргениниң дугайында чугаалап берген.

— Харааданчыын — деп дүжүмет чугааланган. — Ооң-биле мен амырап таныжып алгай эртик мен.

— Сен ону ам-даа кылып болур сен –деп Филипп чугаалаан. — Чүге дизе Ол дирлип келген!

Оон апостол эфиопчуга Ооң өөреникчилериниң чүү чүвениң херечилери болганын: Иисустуң дирилгенин, база дээрже көдүрлү бергенин болгаш Ыдыктыг Сүлдениң дугайында, дөгерезин чугаалап берген.

— Мен база сугга суктуруксап тур мен –деп, министр күзелин илереткен.

— Иисуска шынап-ла бүзүрээр болзуңза, мен күзелдиим-биле сени сугга суп болур мен — деп Филипп аңаа харыылаан.

Эфиопчу чөпшээрежип бажын согаш кылгаш:

— Иисус Христос — Бурганның Оглу-дур деп бүзүрээр мен –дээн.

Хем агып чыдар оазистиң чаны-биле эртип чыткаш, олар чуузадан дүшкеш, Филипп ону сугга суккан.

Сайыттың чүрээ өөрүшкү дола берген. Филиппке өөрүп четтиргенин илередир дээш ол көрнүп кээрге, оозу чиде берген болган. Ынчалза-даа ол ам Иисус кезээде ооң-биле кады болур деп билип, өөрүшкүлүг оруун уламчылап чорупкан.