Иисустуң дээрже көдүрүлгени

Өлүглерден дирилген Камгалакчы, Дээрги Иисус өөреничилери-биле ужуражып, чугаалажып, кайгамчык хүннер эрттирген. Ынчалза-даа ол төнчү чок турбас-ла болгай. Иисус Дээрде Адазынче дедир ээр ужурлуг.

Элеон даанга улус келбес, шөлээн боорга Иисус эштерин олче эдертип эккелген. Иисус удавас оларны кааптар деп олар билир. Пасхадан бээр дөртен хонук эрткен.

— Муңгараваңар — деп Иисус оларга чугаалаан. — Мен дээрде Адамче чорупсумза-даа, силерниң-биле кады Мен. Мээң дугайымда Буянныг Медээ тарадып, чер делегей кыдыынга-даа барзыңарза, ында база Ыдыктыг Сүлде ачызы-биле силерниң-биле кады боор Мен. Мен силерге чаңгыс эвес чугаалап турган болгай Мен: дээрже чорупкаш, силерже Болчукчу чорудар мен.

Өөреникчилери Башкызынче айтырганзыг көргеннер. А Ол улаштырган:

— Иоанн сугга суп турда, кижилер чаа амыдырал эгелээрин херечилеп турган. Ыдыктыг Сүлде база ол дег. Ол силерни чаа кижилер кылдыр өскертип, Буянныг Медээ тарадыр күш бээр. Ыдыктыг Сүлде таварыштыр Мен Бодум силерниң-биле кады тудуш чоруур мен. Ол силерни Мээң-биле харылзаалыг, база Мени билир, база Меңээ ынак болдурар. Силер Бургандан күш алгаш, каяа-даа Мээң дугайымны чугаалаар силер. Эгезинде маңаа — Иерусалимге, Ооң соонда бүгү Израильге, адак соонде бүгү делегейге.

Ооң соонда Ол холдарын дээрже угландыргаш, өөреникчилерин алгап-­йөрээгеш, черден дээрже көдүрлүп эгелээн! Ол өөреникчилериниң караанга көзүлбейн баргыжеге дээрже бедип–ле, бедип-ле бар чораан. Иисус дээрде Адазынче улустуң караанга-ла ындыг арга-биле ээптер деп кым билген боор! Ол ам Адазы-биле кады каракка көзүлбес делегейде.

Өөреникчилер дээрже кайгап, магадап көрбүшаан. Ам чүнү канчаарыл?

Ол өйде чайыннаар ак хептиг ийи эр кижи оларга көстүп келген. Ол Ангелдер болган. Олар өөреникчилерге Иисус дээрден черже катап келир, чүгле Чаш төл дег эвес, а күчү-күштүг, алдар эдилээн келир. Иисус ийи дугаар келирде Судья, өндүр бедик Хаан болуп келир. Аңаа чедир Ол бүзүрээннерниң чүректеринге чурттап, дээрге хааннаар деп дыңнатканнар.

Иисустуң оларга чугаалаан сөөлгү сөстерин өөреникчилери чүректеринге шыгжап алгаш, Иерусалимче ээп келгеннер.