Савлдың Бурганче ээлгени

Стефанның өлгенинге бир кижи дыка амырап турган. Ол христианнарны истеп-­сүрүп турган Савл деп аттыг, ном-хоойлу тайылбырлакчызы кижи чүве-дир. Чаа тургустунган Церковька база бир чугула чер эжелеп турган Стефанның өлүрткенинге ол кижи хыы ханып турганын чажырбаан. Ол хүннерде христиан ниитилелге удур аажок улуг истеп-­сүрүүшкүн эгелээрге, Савл аңаа бар шаа-биле киржи берген. А ол бодун Дээди Бурганга эки чүве кылып турарым ол деп санаар.

Савл Дамаск хоорайже чоруур дей берген. Ында чыылган христианнарны Савл кем-херек үүлгедикчилери ышкаш тудуп-­хүлүп алгаш, кара-бажыңнаары-биле Иерусалимче эккээр деп шиитпирлээн. Ол бараалгакчылардан чөпшээрел бижик база ап, белеткенип алган.

Дамаскыже чоокшулап келгенде, ооң амыдыралын долузу-биле өскертипкен таварылга болган. Хенертен дээрден чырык херел чылчырыктадыптарга ол чүве көрбейн барган. Савл черже кээп дүшкеш, дээрден үн дыңнап каан:

— Савл! Савл! Мени чүге истеп-­сүрүп тур сен?

Савл коргуп айтырган:

— Силер кым силер, Дээрги?

— Мен — сээң истеп-­сүрүп турарың Иисус-тур мен — деп Үн харыылаан.

Ооң мурнунда мегечи база меге медээчи, деп турганы Иисустуң мурнунда Савл ам хөлчок коргуп, сири-кавы апарган. Церковьтуң каржы истеп-­сүрүкчүзү бодунуң шын эвезин билип кааны ол! Дээрден ооң-биле чугаалашкан Иисус медээчилерниң дыңнадып турганы Мессия — Бурган Оглу-дур деп алыс шын ажыттынып келген.

Иисус улаштырган:

— А ам туруп келгеш, хоорайже чорувут. Аңаа баарыңга, ам чүнү кылыр ужурлууңну сеңээ чугаалап бээр.

Савл туруп келгеш, карактарын ажыткаш, согурара бергенин билип каан. Кады чораан улузу ону чедип алгаш, Дамаскыже чедирер ужурга таварышкан. Аңаа баргаш ол үш хонук иштинде чем-даа чивээн, суг-даа ишпээн, согур хевээр. Ол үе дургузунда Савл Бурганга сөгүрүп, чаннып, ону өршээрин дилеп турган. Үш хонук эрткенде Бурган Савлче Анания деп аттыг кижини чорудупкан. Анания келгеш, Савлдың бажынга холдарын салгаш, Бурганга тейлеп, карактарын экиртип бээрин дилээн. Карактары ажыттынып келген. Савл сугга суктурган соонда ону христианнар Церковунуң кежигүнүнге хүлээп алган.