Христос дээш бир дугаар шаажылаткан кижи

Иерусалим Церкову өзүп көвүдээн. Кежигүннерниң санын муң-биле санай берген. Апостолдар ядыыларның негелделерин хандырар айтырыг-биле чардыгар ужурга таваржып турганнар. Ынчангаш ол айтырыгны шиитпирлээр тускай кижилер азы диаконнар соңгуп алыр шиитпир үндүргеннер. Диаконнар чүгле ол айтырыглар шиитпирлевейн, а суртаал ажылы база кылып турган.

Оларның бирээзин Стефан дээр. Ыдыктыг Сүлдениң күжүнге бүргеткен болгаш, ол хөй санныг кижилерни бачыттарын минниринге эккеп, Иисустуң ады-бмле элдеп-эзин кайгамчыктыг чүүлдерни кылып турган. А ооң оозу дыка хөй иудейлерниң адааргалын оттуруп, хөңнү чок болдурар болган.

Ол дээш Стефан ол үеде иудей шажынның дээди суду — синедрион баарынга база харыы туткан. Ооң чугаазы суртаал ажылынга дөмейлежир. Эгезинде ооң сөстеринде буруулуг чүве тыппайн турган, чүге дээрге Стефан Бурган-биле Ооң Бодунуң чону Израиль-биле аразында хамаарылгазының төөгүзүн чугаалаан. А сөөлүнде Стефан оларны сойгалап турган:

— Чөрүү хейлер! Бурганның Сөзүнге кулааңар дүлей! Өгбелериңер кандыг чораан ийик, силер база ындыг силер. Өгбелериңерниң медээчилерни хүлээп албааны дег, силер база Иисус Христосту хүлээвээн силер.

Ооң соонда Стефан Дээрже көргеш чугаалаан:

— Бурган мээң карактарым ажыдыпты, ынчангаш мен дээрде Бурганны база Ооң чанында турар Иисусту көрүп тур мен.

Ону дыңнаан соонда синедрион кежигүннери ынчан кулактарын дуглап, ыыткыр алгыржып, Стефанче хөме шурай бергеннер. Ону хоорай даштынче иткилеп, шашкылап, үндүр сөөрткеш, даш-биле соп эгелээннер. Аар кемдээн Стефан тейлеп чугаалаан:

— Дээрги Иисус, мени Бодуңче ап ал!

Ону соккулаан даштың аарындан ол дискектеринге кээп дүшкеш, алгырып чугаалаан:

— Дээрги-­Чаяакчы, бо бачыды дээш, оларны шиитпейн көр! — деп чугаалаан соонда, Стефанның амы-тыны үстү берген.

Стефан Иисустуң салгакчыларының аразындан Камгалакчы Дээрги Иисус дээш амы-тынындан чарылган бир дугаар кижи болган.