Ангел Гавриилдиң Марияга ужуражылгазы

Галилеяның бир бичии Назарет деп хоорайынга Мария дээр аныяк кыс чурттап турган. Ону Иосиф деп аттыг бызаңчы кижи-биле дүгдеп каан турган. Боттары бөдүүн ажылчын турган-даа болза Мария-биле Иосиф Давид хаанның ук-ызыгуурундан төрүттүнген чүве-дир. Олар удавас өгленчир деп турганнар.

— Бир катап Мария бажың ажылы кылып турда, хенертен ооң мурнунга Гавриил ангел келген. Черже ону Бурган чоруткан:

Амыр-менди, Бурганның авыралын алган кыс! Дээрги-­Чаяакчы сээң-биле-дир!

Мария дыка корткаш, боданган: “Мээң-биле мынчаар кым-даа мендилешпээн чүве ийикпе”.

Оон дээрниң төлээзи аңаа мынча дээн:

— Мария, кортпа. Бурган сеңээ авыралын хайырлаан-дыр. Ам иштелип-­сааттангаш, Оол божуп алгаш, Ону Иисус деп адап алыр сен. Ол өндүр улуг болур база Дээди Өрүкүнүң Оглу — деп адаттырар. Дээрги-­Бурган-­Чаяакчы Аңаа ада-өгбези Давидтиң дүжүлгезин мөңгези-биле хүлээдир болгаш Ооң Чагыргазы төнчү чок болур.

Ол сөстерниң утказын Мария арай боорда билип:

— Мен ашакка безин ам-даа барбаан-на болгай мен… — деп, дидим эвес харыылаан.

— Төрүттүнген кижи бүрүзү адалыг болур, а сээң божаан Оглуң онза тускай. Ооң Адазы — Бурган. Ынчангаш Ону Дээди Өрүкүнүң Оглу деп адаттырар дээним ол. Ол — Бурган Оглу болур.

Мария Ангелдиң сөзүнге бүзүрээн. Бурганның чүс-чүс чылдар бурунгаар аазаан сөстери удавас бүдери ол! Мария Бурганның аазааны Камгалакчының иези болуру ол!

А Мария ужур утказын черле билип чадашкан, ооң ашаа ам-даа чок-ла болгай. Ынчангаш ол Ангелден айтырган:

— Ол канчап ындыг болурул?

Ангел тайылбырлаан:

— Ол дугайында Ыдыктыг Сүлде Боду билир. Дээди Өрүкүнүң күчү-күжү Чаш төлге амы-тын бээр. Ынчангаш сээң божаан Оглуң ыдыктыг болгаш Бурганның Оглу деп адаттырар!

Мария Бурганга дыңнангыр болуксааш, чугаалаан:

— Дээрги-­Бурганның чалчазы-дыр мен. Мээң-биле бүгү чүве Сээң сөглээниң ёзугаар болур болзун.

Оон дээрниң төлээзи дээрже дедир чоруй барган.