Эрээнде кадарчылар

Вифлеем чоогунда эрээннерге кадарчылар хой кадарып турганнар. Дүн дүшкен, а олар удувас ужурлуг: долгандыр араатан аңнар хураган сегиреринге белен кедеп чыткылаар. А кадарчылар хат-чаашкын дивес дүнениң-не коданын хайгаараарлар.

… Чүү болду? Чүү мындыг чырык карак чылчырыктадып турары ол? Дээрден оларже чииги аажок кылаңнааш бадып келген! Кадарчыларга коргунчуу кедергей. Шын чүве бе! Ангел Гавриил! А Ангел кадарчылар-биле хөлчок ээлдек чугаалажып эгелээн:

— Кортпаңар! Мен бүгү чонга хамааржыр кончуг өөрүнчүг Медээ силерге дыңнадып тур мен!

Кадарчыларга дүне Вифлеемде төрүттүнген Чаш Оол, а ол Чаш Оол — Камгалакчы — Христос Дээрги деп дыңнадыр дээш дээрден келгенин Ангел тайылбырлап берген.

Үр үеде манап чорааны Камгалакчы дээрден келген деп дыңнааш, кадарчылар кайгап шаг болган. Дендии солун, өөрүнчүг медээ! А оон олар база бир дыңнадыгны элдепсингеннер: Төрүттүнген Чаш Оолду көөр дээш хаан хүрээлеңинче барган херээ чок. Олар Ону шагжадан тып алырлар. Ол чүл дээрге, бир дугаарында мал кажаазындан дилээр ужурлуг.

Кадарчылар аразында чугаалажып четтикпээнде, хенертен дээрниң хөй

Ангелдери Бурганны алдаржыткан ырын эгелээн:

— Өндүр Бурганга алдар! Чер делегейге база кижилерге Ооң чаагай күзели доктаазын!

Ол ыр чер делегейге кажан-бир шагда дыңналган ырларның эң-не онзазы ол боор.

Ооң соонда Ангелдер дээрже көдүрлүп, көзүлбейн барган.

Кадарчылар удур-дедир көрүшкеш, дугурушканнар:

— Вифлеемче чоруткаш, Дээргивистиң чугаалааны-биле Камгалакчыны тып алыылыңар!

Ол медээни Бурган Боду дыңнаткан деп, оларның бүзүрели быжыг.

Бурган оларның кодан малын камгалап бээр деп бүзүрели-биле кадарчылар бүгү далаш, Вифлеемче маңнажыпкан. Мал кажаазын тып чедип келгеш, Бурганның оларга чугаалаан чүвезин бүзүреп көргеннер: Мария база Иосифти, шагжада чыдар Чаш Оолду.

Кадарчыларның чүректерин ханы өөрүшкү бүргеп келген, чүге дизе үр үеде манап чорааны Мессияны — Камгалакчызын, Иисусту, Бурган Оглун олар кымны-даа мурнай көөр хүндүткелдиг болганнар.