Төрээн чуртче ээп келгени

Вавилонче Даниилди бичии оол турда апарган. Ам ол кырый берген-даа болза, Төрээн чуртун база Бурган Бодунуң чонун чуртунче дедир эккээр деп аазаанын утпайн сактып чоруур.

Ах, Бурганның өргээзин катап тургузупкан болза, иудейлер шупту Бурганга мөгеер дээш чыглып кээрлер ийик! Даниил бажыңынга аңгыланып, шээрленип алгаш, Бурганга чалбарып, дилеп турган:

— Дээргим, Сен өндүр бедик база ыдыктыг Бурган, Сеңээ ынак улуска энерелдиг Сен! Бис, Сээң чонуң санаттынмас көвей шын эвес херектерни үүлгедип келдивис. Ынчангаш Иерусалимниң бустурун, бистиң хары чуртка хөй чылдарда чурттаарывысты болдурган Сен. Ындыг-даа болза мен Сээң дузааргааң, хемчээл чок өршээлдииң билир болгаш сөгүрүп тур мен: мээң чонумнуң буруузун өршээп, Төрээн чуртунче дедир ээп кээрин чөпшээреп көр!

Бурган ол дилегни дыңнаан. Даниил боду Израильче ээп шыдаваан, чүге дээрге Израильче чанар чөпшээрелди чон Даниил өлген соонда алган. Вавилоннуң хааны еврейлерни чурттунче чүгле боттарын эвес, а оларның чурттун эжелеп тургаш Иерусалимде Бурганның өргээзинден эккелгени алдын, мөңгүн ыдыктыг саваларның шуптузун база эгидип берген. Израиль чоннуң өөрүшкүзүн деңнээр сөс чок! Ам-на олар хосталгада!

Төрээн чурттунче ээп чанарындан чамдыктары дидинмээннер. Ол чуртка олар чаңчыгып турумчуй берген болгаш бажың-­балгат, тараа шөлү, сад, эш-өөр, кожалардан чарлып шыдавааннар. А Израильге баргаш чүгле бузундулар тып болур.

Чурттун катап тургузар дээш улуг күш үндүрүп ажылдаар апаар.

Ындыг-даа болза оларның аразында бергелерден кортпас кижилер хөй. Олар ээп келгеш Иерусалимде Дээрги-­Бурганның өргээзин катап тургузарын шиитпирлеп алганнар.

Хөй чоннуң Төрээн черинче үнүпкен хүнден эгелеп, чанып кээр сорулгазы бүткүжеге чедир хөй үе эрткен. Келгеш олар коргуп, бодап турган чүвезин көргеннер: бажыңнары үрелген, кижи чурттаар арга чок, а бүдүн арткан бажыңнарда өске чоннуң улузу чурттай берген. Тараа, виноград шөлдеринде бок чашпан үнген азы өске улус эжелээш, боттарының хуу өнчүзү деп санай берген. Оларның мурнунда чеже демисел, аар-берге ажыл манап турар деп!

Оларга ам кол чүве чашпан богун аштап чер болбаазырадып, тараа чаштырып дүжүт ажаары эвес, чаа бажыңнар, аңмарлар тудары эвес, а кулданыышкынга тургаш кылыры болдунмас турган чүвези — Дээрги-­Бурганны Ооң өргээзинге алдаржыдары!

А Бурганның улуг өргээзи болгаш кайгамчыктыг чараш турган Иерусалим хоорай шупту бузундулар адаанда.

— Өргээни катап тургузарынга хөй үе негеттинер, ынчалза-даа Аңаа өргүл салыр черни дүрген кылып ап болур бис. Ону чүгле эрги турган черинге кылыр ужурлуг –деп, Бурганның бараалгакчызы чугаалаан.

Олар чүнү-даа мурнай өргүл салыр черниң орнун аштап, арыглап эгелээннер. Үр үе эртпээнде олар чурттунче ээп кээр арганы бергени дээш, Бурганга өргүл эккеп салыр аргалыг болган. Хөй чылдар эрткен соонда Бурганның чаа өргээзи туттунган, Иерусалим катап база бедик ханаларлыг кайгамчык чараш хоорай апарган.

Израильчилер Вавилон кулданыышкындан хосталып, чурттунче чанып келген соонда база Бодунуң Чагыг-керээзин сагындырып Бурган катап-­катап медээчилерин чорудуп турган. Катап-катап кеземчеге онаар ужурга таваржып, катап-­катап өршээп турган. А шаг-шаанда медээчизиниң аксы-биле шупту чүве эрги хевээр артпас, үези келирге өскерли бээр деп Ол чугаалаваан бе?

“Израильдиң чону-биле база Иудеяның чону-биле чаа чагыг-­керээ чарар үем кел чыдыр — деп, Дээрги-­Чаяакчы медеглээн. Оларның ада-өгбезин холундан чедип алгаш, Египеттен үндүре бергеш, олар-биле чарганым дег эвес, өске чагыг-­керээ болур. Олар ук чагыг-­керээни үрээн болгай, а Мен оларның Ээзи турган мен — деп, Дээрги-­Чаяакчы медеглээн. Мен ол хүннерде израиль чон-биле мындыг чагыг-­керээ чарар мен: Бодумнуң дүрүм-­хоойлумну оларның угаан-­медерелинче киирер мен, оларның чүректеринге бижип каар мен! Мен оларның Бурганы болур мен, а олар Мээң чонум болур — деп, Дээрги-­Чаяакчы медеглээн. Моон соңгаар кым-даа өске кижини, бодунуң ха-дуңмазын, сургап: „Дээрги-­Чаяакчыны билип алыңар!“ — дивес, чүге дээрге олар шупту, улуг-бичези чокка, Мени билген турар — деп, Дээрги-­Чаяакчы медеглээн. — Мен оларның кем-буруузун өршээр мен, оларның бачыттарының дугайында оон ыңай сагынмас мен” (Библия, Иеремияның ному, эге 31, шүлүктер 31–34).