Шагжада Чаш-төл

Бурган Рим күрүнезиниң императору Августка бүгү девискээринге чоннуң чизезин кылыр дугайында күзел оттурган. Император чарлык үндүрген, а ол чарлык ёзугаар Палестинаның чурттакчылары ада-өгбезиниң хоорайынга чизеледир ужурлуг. Ол үеде Иосиф-биле Мария Назаретке чурттап турганнар. Иосиф Марияга:

– Билир сен бе, мээң улузум Вифлеем чурттуг. Чүс-чүс чылдар бурунгаар чурт баштыңы чораан Давидтиң ырак төрели болур мен, ынчангаш мен ынаар баар апарган-дыр мен – дээн.

Харыызынга Мария улуг тынгаш,чугаалаан:

– Анаа турган болзумза ол оруктан чалданмас ийик мен. Божуур хуусаам чоокшулаан, ону билир сен. Орук берге. Оол өске черге төрүттүнүп келзе эки болбас.

– Мен сени кагбайн, чаныңга кады чоруур мен – деп, Иосиф ону оожуктурган. – Ангел база чугаалаан-на болгай, сээң төрээн Оглуңну Бурганның Оглу дээр. Бурган Боду бисти карактаар.

Ынчалдыр Мария база Иосиф орукче үнүпкеннер. Элчигени бар-даа болза оожум чораан болгаш орук узак, үр апарган. Орукка могап-шылаан чорумалдар Вифлеемге келгеш, хонуп алыр өрээл дилеп, шаг болганнар.

Бир аалчылар бажыңының даштында ынаар-мынаар кылаштаан кижиге келгеш, Иосиф айтырган:

– Буруудатпаңар, хонар өрээл хөлезилеп ап болур ирги бе?

– Силерни чорудары меңээ харааданчыг-дыр, ынчалза-даа хос өрээл чок, шупту эжелеттинген.

– Шупту эжелеттинген? Ам каяа хонуп алыр улус боор бис? Бичии-ле хостуг азыг тывылбас бе? Кадайым божуур үези келген, бо дүне-даа божуур чадавас!

– Байдалыңар билип тур мен. Арга бар турган болза, өөрүшкү-биле дузалаар ийик мен, ынчалза-даа бичии-даа хос чер чок ийин.

Мария корга бергеш, Иосифтиң холундан туттунупкан:

– Ажык дээр адаанга артар аргавыс чок. Дүне даштын соогу база аажок-тур, мен төрүттүнер Төл дээш сагышсырап тур мен.

Бажыңның ээзи оларга чоокшулап келгеш:

– Даштыгаа канчап хонар. Херим дөрүнде мал кажаазы бар, аңаа саваңны эптештир чаткаш чыдып алыңар, а кажаада малдан база чылыг боор.

– Буяныңар дээш ханы четтирдивис! – деп, Иосиф-биле Мария четтиргенин илереткеннер.

Ол дүне кайгамчыктыг чүве болган: Чер делегейни чаяаган, бүдүн октаргайны холунда тудуп турар Бурган Оглу, чүнү-даа кылып албас, бодунга дуза херек Чаш Төл болуп төрүттүнгеш, ам мал кажаазынга саваң кырынга чыдар ужурга таварышкан. Даштындан көргеш Чаш Оолду кым-даа Бурган Оглу деп бодавас-ла харын, ынчалза-даа Ол – Бурган Оглу болуп турар. Мария Ону инектер, элчиген, хой, өшкүге чем салып бээр шагжага салып алган. Ам ында чаа төрүттүнген бичии чаштардан кандыг-даа ылгалы чок чаш Оол атпаңнап, чулчуруп каап чыткан. Иосиф Марияже көргеш, чугаалаан:

– Чаштың дугайында Ангелдиң чугаалаан чүвезин сакты-дыр сен бе? Бичии чашты көргеш бүзүрээри берге-дир, турарывыс байдалдың түреңгизи база аажок.

– Шупту шын чүве-дир ийин, Иосиф, шупту чүве Бурганның чугаалааны-биле болур – деп Мария оожум чугаалаан.