РӮИ ПОК ЙАТТОW

Ибодатху̊на̄ пиронди лапаϑ мардум ҷа̄м сут. Йаӯдийенен ик дам рӯз осилҷа̄мчӣд айу̊м қайд чӯд, ди ҷа̄т ба̄д аз дига ҷойенен мис тар Ерусалӣм фана̄ мардум йат. Панҷо рӯз ба̄д аз Наҷот айу̊м наɣ- ҷӣдат, ба̄ден во дам дам айу̊м қайд чӯд.

Йик wа̄δен одамен иде̂, Исо қати wеванд қарӣб муно-сибат ца вуд, йи ғула̄ ма̄ла̄йанден ҷа̄м сат. Wа̄δен йак –дигар қати нақл чӯдат, йакҷойаϑен дуо чӯд. Йакбораϑ wев тар ғу̊ɣ арчӣзца садо йат, йу тар х̇ӯʒ садо му̊нанд вуд.Wа̄δен фукаϑ қарор чӯдху, wи садойен ниғух̇т, ат йу соф хах̇ди сутху wи ма̄ла̄йи пур чӯд.

Ба̄д йакбораϑ лапаϑ ʒул-ʒулик йоцакенен пеδо сатху wев торайен дараw wе̂х̇т сат. Амо йу ақу̊ни йоц навуд, йу Рӯи Пок них̇у̊на̄ вуд. Йид аҷойибард кор вуд, амо соф аҷойиб ику вуд иде̂, wев одамен дил йисохга ца сут.

Wа̄δен wитийаϑ хуши йис чӯдху, чи аwози биланден Хуδой ситоwах̇ дараw чӣд сат. Wевард йакбораϑ ма̄лум сут иде̂, Хуδойи цу̊ндик wев жӣwҷ, Исойи wевард цу̊ндик баша̄нд га̄пен δодат, йордами wевард чӯд, wа̄δен ба̄д йис чӯд Йу wев хезанд ца, амо Wи wӣнтоwен нава̄рδод. Wа̄δен дуо қатийат, созлу̊вд қатийат, хуши қати аз дилу ҷу̊н Хуδойард шукрат лу̊д.

Ба̄ден йакбораϑ хабар сат иде̂, wа̄δ хурд а̄м ху зивти Хуδой ситоwах̇енат, а̄м йига зивен қати. Ат соф аҷойиб ику вуд иде̂, wа̄δ х̇огирден ду̊ндаϑ найат, йу фукаϑ мардум аз дига х̇а̄ренат мамлакатен мис ца йат, wа̄δен мис wев зив фа̄мт. Рӯм мардуми лотӣни га̄п йамард х̇уд, йӯну̊нийенен йӯну̊ни зив х̇уд, Форс мардуманд форси зив wев тар ғу̊ɣ йат, арабенен араби зив х̇уд, А̄фрика мардуми ху зив йамард х̇уд.

Йила̄венен х̇оҷ δӯйдху, лу̊ден йид арчӣзцага ҷодугари. Ат йу йила̄в мардуми шӣнтат лу̊ден: «Аро да̄δен фукаϑ маст!»

Ат йеданд йи х̇огирд пи йи биланди сифӣдху, ху δусти сентху, га̄п чи δе̂д вуд. Йу Петрус вуд. Ба̄д мардум қарор чӯдат, йуйи лу̊д: «Йаӯдо мардумат, арча̄йга аз δар мис ца йаϑч, йакбор му га̄пен ниғу̊ɣет! Тама ца лу̊вет ик да̄δ одаменен маст, хатойет чӯд, да̄δен ух̇йор, ду̊н ҷа̄т йам ғал са̄ракаϑ. Пайғумбар Йуӣли пигоϑ даwра̄ арчӣз ца лу̊д, йу нур рӯзанд иҷро сут: ма̄шард Рӯи Пок насӣб сут.

Фана̄ га̄пенен Нивишчинанд ца вад, мев охиру̊н афтайенен wа̄δ иҷро сат. Ат нур икам кор ца сут, йам ичӣзга нистат, фақат Рӯи Пок йаттоw. Арчӣз wоқийаенен Исо зиндагийанд мис ца вад, қадӣманден дар борайи wев мис пайғумбарен фукаϑ лу̊д. Йуйи фана̄ мӯҷизайен қати дивих̇т иде̂, Йу ақу̊нийаϑ Хуδой Пуц. Амо тамет тар ди начӯх̇тху, рӯмийен қатийет йакҷо сатху, Исойет салӣбти чорме̂х δод. Амо Хуδойи во зинда̄ Wи чӯд.

Ма̄ш ик ди корард боwар кина̄м, ду̊н ҷа̄т ма̄шам хубаϑ шойид вад. Ма̄ша̄м ба̄ди Wи зӣдоw ху цем қати Wи wӣнт, ба̄д фа̄ма̄м иде̂, Йу зинда̄. Йу пи осму̊н мис ца тӯйд, ма̄ша̄м йаманд вад. Ат шичи ида Исо ма̄шард Рӯи Пок бох̇т. Тама бойад фукаϑ фа̄мет иде̂, Хуδойи ик Wи Исо фукаϑард Худоwанд чӯд!»

Йу бех̇ди мардум йаманд ца вуд фа̄мти иде̂, да̄δен Хуδой га̄пен вадат, Йуйи дев ик ди одам қати wевард лу̊д. Wа̄δен боwари δод иде̂, Петрус га̄пенен фукаϑ рост, ди ҷа̄тен ба̄д wи га̄пен wевти та̄сӣр чӯд.

Йу мардуми ба̄д аз Петрус пех̇цт: «Пас ма̄ш шич бойад чӣра̄м?» Йуйи wевард ҷаwоб δод: «Тӯба̄ кинет, ба̄д ар йаки тама бойад ик ди ҷа̄т та̄мӣд зет иде̂, тама хойих̇ет Хуδой йордам қати ху зиндаги йисохга кинет. Ба̄дта Рӯи Пок тамард мис насӣб су̊д. Ду̊н ҷа̄т арчӣзен пайғумбарен ца лу̊д, йу тар тама мис дахл»

Йаманден цу̊ндо азор нафар Петрус wа̄з ниғух̇тху, йик wам рӯзаϑен йигу̊н ара азор нафар та̄мӣд зох̇т. Wа̄δен фукаϑ хушикуну̊н Исои Масе Инҷил қабӯл чӯд.

Ида ик дисга рӯзи Пантикостанд (осилҷа̄мчӣд айу̊м), ик wам рӯз Рӯи Пок ца йат, йакумӣн Масейийен ҷамоат (Калисо) ташкӣл сут.