ИМУ̊Н ҚАТИ ТА̄ МӢД ΔЕ̂ДОW

Йи хушрӯй ароба̄ пи ворҷен вӣсчин вадат, оста-оста̄ бийа̄бу̊нва тойд. Ар wам дарӯн йи чорик нӯсчин вуд. Wи питана̄йен қиматбао луқен вадат, йу хубаϑ тар Африка мардум му̊нанд вуд. Йуйи ар-чӣзца китоб х̇е̂йдат тар па̄лийи ачаϑ диқат наδод.

Йу тар ху wатан, тар Абашисту̊н, подх̇о хазӣна̄ти хӯҷайӣн вуд, ди ҷа̄т ба̄д йу бойат ну̊мдор одам вуд. Амо йуйи ик диду̊нд бойгарийат wа̄зӣфа̄ қати хушбахт ху йис начӯд. Йуйи йила̄в саwоленард ҷаwоб вире̂доw нава̄рδод, аз у̊н ҷумла̄: йуйи ик ди нафа̄мт иде̂, чӣз ҷа̄т зиндаги ких̇т, ба̄ди мӣдоwта чӣз су̊д, дар борайи гунойента ча̄й wи пех̇цт, йича̄йта wи жӣwҷ ких̇то най.

Йуйи йи wахт х̇уд иде̂, Х̇уδойи қадӣманд Исроӣл мардум интихоб чӯдху, хойих̇и чӯд wев қати видху рост зиндаги wев ухма̄нд ких̇т. Йид чорики ба̄д хойих̇ чӯд тар Ерусалӣм су̊дху, ибодатху̊на̄йанд дуо ких̇тху, дев ху саwоленард ҷаwоб виред. Амо wийен тар ибодатху̊на̄ дедоw нала̄кчӯд, ду̊н ҷа̄т йу исройӣли навуд. Ди ҷа̄ти ба̄д йу фана̄ чӣзен фа̄мтоw нава̄рδод.

Ат гуйо ла̄к йид wи сафар тар Ерусалӣм бедаракаϑ ма̄наɣҷӣст, йуйи йи қимат китоб харӣд чӯд. Wам китобтийен Ишайо пайғумбар га̄пен нивишин вад иде̂, қадӣманди wев ца лу̊д.

Ба̄д йу чорик ху ар саwор сутху, wам китоби х̇е̂йдат тар ху чӣдаҷ туй. Йамтийи йу дар борайи. Одам х̇е̂йд иде̂, аз гуфтайи пайғумбарен Йута йоδдху мардум гунойен ҷа̄тта Ху ҷу̊н сипорт, ат ба̄ди дита фана̄ одамен Wи пайраw сен. Йуйи фикр чӯд: «Ик ми ма̄нӣ ку чӣз».

Ди wахтанди арча̄йца wи пех̇цт: «Ту ди ца х̇ойи, ма̄нӣ фа̄мийо?»

Йид Филӣппус вуд. Хуδойи wирд лу̊д иде̂, бийа̄бу̊нанд тар пу̊нд нах̇тӣзд. Ба̄д йу нах̇тӯйд тар пу̊ндху, чӯх̇ти иде̂, йи те̂рпу̊ст хӯҷайӣн ғал пайғумбар Ишайо китоб х̇ойдат тӣзд.

Йу абаши чорики ба̄д Филӣппусард ҷаwоб δод: «Wузум йу̊ти йичӣзаϑ нафа̄мт, ат ага ту ца фа̄ми, му қати тиху, фа̄му̊н мурд».

Филӣппус мис пи ароба̄ сифӣдху, wи чорик па̄линди нӯст. Йуйи ба̄д аз Филӣппус пех̇цт: «Пайғумбари йу̊данд дар борайи чӣ лу̊вҷ».

Филӣппуси wирд ҷаwоб δод: «Дар борайи Исо». Йу чорики во пех̇цт: «Исойа̄? Йу ча̄й?» Ба̄ди Филӣппус wирд дар борайи Исо нақл чӯд: цара̄нги Йу касален хуб чӯд, цара̄нги мӯҷизайен дивих̇т, цу̊нд нафар одаменарди йордам чӯд, цара̄нген фарӣсийенат рӯу̊ни робарен Wи қати бад вадху, охиру̊нен рӯмийен қати ху йакҷо чӯдху зӣден Wи.

Йу абаши хӯҷайӣни фикр чӯдху лу̊ди: «Лап га̄нда̄, шичард Йу зинда̄ ца вуδҷат, wузум мис Wи қати балад суδҷат». Филӣппуси ба̄д wирд лу̊д: «Ту ва̄рδийи шич мис Wи қати балад са̄wи. Йу ба̄ди ара рӯз зинда̄ сут!»

Ба̄ди Филлӣппус wирд фукчӣзаϑ нақл чӯд: дар борайи Исо зинда̄сидат, пи осму̊н тӣдоwат, дар борайи Рӯи Покат, дар борайи ик wи иде̂, цара̄нген Исо х̇огирден та̄мӣд зох̇тху, дивих̇тен иде̂, wа̄δен Wи пайраwен.

Йу абаши хӯҷайӣни wитийаϑ лу̊д: «Wуз мис хойих̇ум та̄мӣд зе̂м!». Филӣппуси wирд ҷаwоб δод: «Ту ага ақу̊нийаϑ Исойард боwари ца δа̄δи, wуз ик нураϑ ту та̄мӣд δа̄м».

Йу чорик розӣ сутху, ху ка̄ли wеδдху, лу̊ди: «Wуз боwарум Исойи Масе Хуδой Пуц!»

Ба̄ден wа̄δ хелакга тойдху тар х̇ац хезен фирӣпт. Wа̄δен ха̄вдху, ар wам х̇ацен дедху, Филӣппуси wи та̄мӣд δод.

Йу абаши чорик хушизор сут. Йуйи хойих̇ чӯд Филӣппусард қулуғ лу̊вд, амо арцу̊нди ху гаргинӯх̇а чӯх̇т, йу йамард навуд. Ба̄ди дийи йу абаши чорики фа̄мт иде̂, Исо дига wи қати, ба̄ди хушикуну̊н ху пу̊нд даwу̊м δод.