ШОУЛТА ИМУ̊НДОР СУ̊Д

Йи чорик тар Истифа̄нус мӣдоw лап хуш вуд. Wи ну̊м Шоул вуд, йу мис масеийен қати бад вудат, пех̇и wев тӣжд. Шоулард тар Истифа̄нус зӣдоw дери чӯд, ду̊н ҷа̄т Калисо ташкӣл ца сат Истифа̄нуси йаманд лап хизмат чӯд. Ба̄ди Истифа̄нус мӣдоw иму̊ндоренен пех̇ тӣждат қӣнен wев чӯд, ат Шоул ик ди коранд сар фаол одам вуд. Йуйи фикр чӯд иде̂, ик ди ху кор қатийи Худоwандард хизмат чӯд.

Йи рӯз Шоул тар Димишқ раwу̊н вуд. Тарамен мис Исойанд фана̄ пайраwен вад. Шоули хойих̇ чӯд wев анҷӣвдху тар Ерусалӣм вӣртху, ҷинойаткорен ҷиноw ар зинду̊н wев пите̂wд. Йуйи пиройаϑ дирд тайори чӯдху, рӯу̊ни робари мис ик ди корард иҷозат wирд δод.

Йу наw қарӣби Димишқ йатат, йеданд йи wоқийа̄ сут иде̂, ба̄ди wи Шоул зиндаги таму̊ман исохга сут. Йакбораϑ wи пиронди хах̇ рух̇нойи сут. Шоул зима̄δти wе̂х̇тху, аз осму̊н wирд садо йат: «Шоул, Шоул! Ту чӣзард Му пех̇ та̄жи?»

Шоули х̇оҷ пи х̇оҷ пех̇цт: «Йо Худоwанд, Тут ча̄й?»

Йу садойи ҷаwоб δод: «Wузум ику Исо иде̂, ту му пех̇ ца та̄жи».

Шоул аз х̇оҷи Исо са̄манд δодху, дараw лаɣʒа̄ сут, ду̊н ҷа̄т йуйи дойимаϑ лу̊д иде, Исо дурӯғгӯйат, Йу ақу̊ни пайғумбар мис нист. Ат йеданд ида ику Шоул иде̂, бар зидди Калисо ца вуд, фа̄мти иде̂, йу ноақ вуδҷ. Шичарди фа̄мт иде̂, ику Исойи аз осму̊н wи қати га̄п ца δод, Йу хурд Масе, Хуδой Пуц вуδҷат пайғумбаренен мис дар борайи ик Wи лу̊вҷ.

Исойи ба̄д wирд лу̊д: «Андиʒу тар х̇а̄р са! Тарамта турд лу̊вен чӣр чӣдоw даркор».

Шоул андӯйд, амо ху цемени йет чӯдху фа̄мт иде̂, йу ку̊р суδҷ. Ик wа̄δ одаменен wи қати ца вад, wи δустарден анҷӯвдху тар Димишқен wи йод. Йуйи тарам мис ара рӯзанд ачаϑ наwӣнтат, найи йичӣз хӯдат найи бирох̇т. Ик дев рӯзенанди фақат Худоwандард зорги чӯдат, бахих̇и аз Wи тила̄пт. Хуδойи ба̄ди ара рӯз Анонийо ну̊м одам тар Шоул хез бох̇т. Йуйи ху δустен рибӯд wи сӣвдтиху Хуδойарди дуо чӯд иде̂, ла̄к Шоул цемен хуб сен. Шоул цеменен хуб сатху, йуйи та̄мӣд зох̇тху, тар масейи Калисо қабӯл сут.