ИСОТА ПИ ОСМУ̊Н ТӢЗД

Ик wа̄δ рӯзенен аҷаб баша̄нд вад иде̂, Наҷотδа̄δӣҷ, Худоwанд Исойи Ху х̇огирден қати нӯстат нақлийи ца чӯд. Амо да̄δ рӯзенен мис беохир навад. Исо бойад пи осму̊н, пи Ху Та̄т хез гах̇т чӯҷат. Пи Зайтӯн кӯ тоқаги нӣстоwард баша̄нд ҷой вуд, ди ҷа̄ти ба̄д Исо Ху х̇огирден қати падам сут. Wи, х̇огирденен хафа̄ вад. Wа̄δен фа̄мт иде̂, ба̄ди йичанд wахта Исо аз wев хезанд тӣзд. Ба̄д аз Наҷот айу̊м чил рӯз наɣҷӣд.

Исойи wевард лу̊д: «Хафа̄ ма̄сет, Wузта арцу̊нд пи осму̊н, пи Ху Та̄т хез мис ца тӣм, амо Wузум тама қати. Тамата арцу̊нд тар δар ҷойен мис ца сетху, дар борайи Мута хабари Хуш па̄н ца кинет, Wузум тарам мис Рӯи Пок қудрат қати тама хезанд. Wузум тамард цу̊ндо бор лу̊д иде̂, арwахта пи осму̊н ца тӣм тамардта Мададгор бозум».

Wа̄δ х̇огирденен ба̄ди дев га̄пен айру̊н-айру̊н тар ху Молим чӯх̇т. Исойи ху га̄п даwу̊м δод: «Йа̄йойи х̇ац қати та̄мӣд δод. Мардуми ик дити дивих̇т иде̂, wа̄δ хойих̇ен наw зиндаги сар кинен. Рӯи Пок мис айнан ик дисга кор ких̇т. Йута аз таманди наw одамен ких̇тху Хабари Хуш па̄н чӣдарта тамард қуwат да̄ких̇т. Wузта Рӯи Пок қудрат қати тамард йордам кинум. Йута дисга ких̇т иде̂, тамата ва̄рδийет а̄м Му қати муносибат кинетат, а̄м Му га̄п фа̄метат, а̄м жӣwҷ Му кинет. Тамардта Хуδой қуwатат баракат да̄ких̇тху, фукаҷота дар борайи Му нақл кинет. Аwалта йу̊данд, Ерусалӣмандху, ба̄д Исроӣландху, ба̄д охиру̊н фук ҷау̊нард».

Ба̄ди Исо Ху δустен пи осму̊н чӯдху, Ху х̇огирденарди баракат δодху, аз зима̄δти пи тӣра̄ҷ дараw тӣд сут! Йу ик дити пи тӣраҷ тӯйдху, аз абрийен зибо пано δодху, Wи х̇огирденен ачга Wи наwӣнт. Wа̄δен ачаϑ боwар начӯд иде̂, аз ху Молимта ик дисга ҷидо сен. Ча̄йи фа̄мт иде̂, Исота аз Ху х̇огирден пиройанд ростоwаϑ пи осму̊н тӣздху, пи Ху Та̄т хезта ик дисга гах̇т ких̇т! Йу шич Ху Та̄т қати пи йига дунйо иде, одамента wам wӣнтоw нава̄рδийен.

Wа̄δ х̇огирденен дарозец wировдху, пи осму̊нен чӯх̇т. Wа̄δен нафа̄мт дигаташ чӣрен.

Ик ди wахтанд wев х̇огирден пиройанден δу сафедпӯх̇ одам пеδо сат. Wа̄δен фарих̇тайен вад. Wа̄δен wев х̇огирденард лу̊д иде̂, Исота во аз осму̊нти ар замӣн йоδд, амо Кӯдак ҷиноw найат, мам пӣδта Ху қудратат бузурги қати йоδд. Исота йакборга амчун Қозийат, Бақудрат Подх̇о йоδд. Ат до дийецта Йу иму̊ндорен диланд зиндаги ких̇тат, пи осму̊нта подх̇ойи ких̇т.

Исойи охиру̊н ар чӣз х̇огирденард ца лу̊д, wа̄δен ху байоδ wи анҷӯвдху, хушкуну̊нен тар Ерусалӣм гах̇т чӯд.