ЙАКУМ ОДАМТА МАСЕ ҶА̄ Т ХУ ҶУ̊Н ΔӢД
Китоби Муқадас, «Х̇огирден корен» китоб, 6, 7 бобен
Ерусалӣм Калисо рӯз ба рӯз бақуwатди сат. Йаманд цу̊ндо азор иму̊ндор мардум вуд. Х̇огирденен бечорайенард фана̄ йордам чӯдху, йиди wев wахт лап анҷӯвд. Wа̄δен ба̄д фикр чӯдху, ба хулоса̄йен йат иде̂, ик ди корард махсӯс одамен, дйа̄конен зен. Дйа̄коненен найинки бечорайенард йордам чӯд, wа̄δен wа̄з мис х̇е̂йд.
Йӣw аз wеванд Истифа̄нус вуд. Рӯи Поки wирд қуwат да̄кчӯдху, йуйи фана̄ одамен тар иму̊н вӯд, ат ба ғайри дийи ба ну̊ми Худоwанд Масе фана̄ мӯҷизайен дивих̇тху, ди ҷа̄тен ба̄д бех̇ди йаӯдийен wи қати бад сатху, дух̇ман ҷиноwен wи қати муносибат чӯд.
Ба̄ден ик дити арчӣзаϑ wити ту̊мат чӯдху, охиру̊нен тар пӣрен шӯро wи йод. Та̄мард ар ча̄й дӣни масала̄ қати айбдор ца вуд, ик ди шӯройанден wи муокима̄ чӯд.
Истифа̄нус га̄пенен бех̇ди тар wа̄з му̊нанд вад. Сар пиройаϑи йу мардум wи га̄пенанд йичӣзаϑ ғалати навирӯд, ду̊н ҷа̄т Истифа̄нуси дар борайи Хуδойат Исроӣл мардум муносибат нақл чӯд. Амо ба̄ди дийи Истифа̄нус wев бадкорийат бадфикри ростаϑ wевард лу̊д:
«Тама Хуδой га̄п наниғу̊ɣет! Арра̄нген тама аwлоден фукаϑ пайғумбарен қабӯл ца начӯд, тамет мис ик дисга Исо қабӯл начӯд».
Ба̄ди Истифа̄нус пи осму̊н чӯх̇тху лу̊ди: «Хуδойи му цемен йет чӯд, wуз шич ва̄рδӣм пи осму̊н а̄м Wи wинумат, а̄м Исога Wи па̄линди».
Ба̄ди дев га̄пен шӯро а̄зойенанд wев қа̄р хах̇аϑ сифӣд. Wа̄δен аз ху ҷойти андойдху Истифа̄нустийен ниδовд, ба̄ден азоб wи чӯдат, ба̄рен wи δодат х̇а̄рвайен wи наɣʒимт. Аз х̇а̄рен δарди δодху, ба̄ден гирд wи чӯдху, жӣрен қатийен wи дараw δе̂д сат. Истифа̄нусанд wи хӯн тӯйдат, ик дитийи дуо чӯдат лу̊ди: «Худоwанд Исо, му мис пи Ху хез қабӯл ки!»
Wа̄δ жӣренен ду̊ндард хах̇ wити ангихт иде̂, wинд ачга қуwат наредху, чизу̊н δод. Ба̄ди охиру̊н хах̇аϑ қӣwд:
«Йо Худоwанд! Ик мев одамен мев гуно ҷа̄т ҷазо ма̄δа!»
Исойи мис салӣбти айнан ик дисга дуо чӯ.
Арра̄нген Исо чорме̂х δодху, Йуйи Ху дух̇манен ҷа̄т дуо ца чӯд, Истифа̄нуси мис дисга дуо чӯдху, ху ҷу̊ни сипорт.
Истифа̄нус аз Исо пайраwенанд йакумӣн одам вуд иде̂, Наҷотδа̄δӣҷ, Худоwанд Исойарди иму̊н вӯдху, ди ҷа̄ти ху ҷу̊н сипорт.
САWОЛЕН
1) Х̇огирденанд чиду̊м хизматард wахт ка̄м вуд?
2) Wа̄δен ик дев қӣнийен цара̄нг наɣʒимт?
3) Исте̂фа̄нус ча̄й вуд? Йуйи чӣр чӯдху, йаӯдийен қа̄р хах̇аϑ сифӣд?
4) Истифа̄нусен жӣрага̄н ца чӯд, йуйи дар борайи чӣз дуо чӯд?