ЙОШ ҒАΔА̄ САМУӢЛ

Исроӣлийенен цу̊ндо солен wа̄даδоδҷин замӣнанд зиндаги чӯд. Wа̄δен чӣден хурд мӣзд, зимцененат ангӯрδзоренен хурд чӯдат, ху замӣнен фук wахт аз дух̇манен муофизат чӯд.

Ибодатху̊на̄ йо хайма̄ иде̂, исроӣлийенен ғал бийа̄бу̊нард саргарδу̊н вадху, тахтасанген δист амри Худоwанд тарам барҷой ца чӯд, шич пи кӯ не̂δҷин вад. Мардуми Хуδойард дуо йо қурбу̊ни чӣдоw хойих̇ ца чӯд, пи кӯйен сифӣд.

Рӯу̊ни робар Елӣ ибодатху̊на̄ пиронди нӯстху, йу мардум падам сифӣдат йуйи wев чӯхт. Йу пӣр вуд, ди ҷа̄ти ба̄д рӯу̊ни робар wазӣфайен иҷро чӣдоw нава̄рδод. Wи ҷойтийен wи пацен кор чӯд. Амо афсӯс, wа̄δен Хуδой наниғух̇тат фана̄ ганда̄ коренен чӯд. Елӣйи дар борайи ди фа̄мтху малол сут. Йуйи wевард лу̊д иде̂, wа̄δ ғалат кор кинен, амо wа̄δен ху та̄т га̄пенти диқат наδод.

Йакбор йи ɣиник тар Елӣ хез йат. Wам қати йига ʒулик ғаδабуц вуд.

Йа̄йи Елӣ қати салу̊м чӯдху лу̊ди: «Му ну̊м Анно. Ту байоδум йасто? Wузум йичанд сол тар пиро мам ибодатху̊на̄ пиронди пуц ҷа̄т Хуδойард дуо чӯд. Wузум ик та̄м соф ноумеδ сат. Ту байоδо, wузум шикойат чӯдат, нӣwдум. Ат шичум wуз хушбахтизор. Йима му пуц, ми ну̊м Самуӣл. Йам бойад ту хезанд мент. Йамта Хуδойард хизмат чӣдоwард турд йордам ких̇т. Wузум wа̄да̄ δод иде̂, мита Худоwандард бахих̇ум».

Елӣйи ба̄д лу̊д: «Самуӣл, Хуδой ног турд баракат δӣд. Ти, wуз турд дивесум, ка̄данта ту зиндаги кини».

Самуӣли Елӣйард йордам чӯдху аз ху кор хух̇нӯд вуд.

Йи вега̄ Самуӣл мот вудху wам сандӯқи муқадас хезанд х̇овдху тархӯδм δод. Ат арча̄йцайи wи ну̊м қӣwдху йу ага̄ сут.

Йуйи ху сентху лу̊ди: «Чӣз га̄п сут?»

Йича̄йаϑи ҷаwоб наδод. Йу ба̄д нах̇тӯйдху тар Елӣ хези же̂х̇тху пех̇цти: «Тут му қӣwдо?»

Елӣ на̄ла: «Най, wузум ту нақӣwд, са во х̇офц».

Самуӣли ху диланд лу̊д: «Аҷойибард», ба̄д сут тар ху ҷойху во тархӯδм δод.

Во wи тар ғу̊ɣ садо йат: «Самуӣл!» Йу ба̄д аз х̇оҷ йи қа̄д зибуд.

Ба̄ди тезаϑ же̂х̇т тар Елӣ хезху пех̇цти wи: «Ат шичат му қӣwдо?

Елӣйи ху ка̄л ҷумбентху лу̊ди: «Най, wузум ту нақӣwд, са беғамаϑ х̇офц!»

Самуӣл сутху войи хӯδм wи йод, ат арча̄йцайи во wи ну̊мти wи қӣwд. Самуӣли фикр чӯд: «Нахо wузум во хато чӯд, дисга бойад ма̄вид». Йуйи во же̂х̇тху тар Елӣ хез сутху лу̊ди: «Елӣ, йима wузум йат! Турд йичӣз даркоро?»

Елӣйи фа̄мт иде̂, идта Хуδой аз Самуӣл қӣwд. Йуйи ба̄д Самуӣлард лу̊д: «Са wижафсху х̇офц. Ат йакборга Хуδой ту ца қӣwд, ту дисга ҷаwоб δа: «Йо Худоwанд лу, ту банда̄ ғу̊ɣ тар Ту!»

Ба̄д Самуӣл оста̄йикаϑ сут тар ху бӣреҷху пи wи садо нӯст. Ат йакбораϑ во wи тар ғу̊ɣ садо йат: «Самуӣл, Самуӣл!»

Самуӣланд wи садо мис лаɣʒа̄ чӯдат оста̄йаϑи ҷаwоб δод: « Йо Худоwанд лу, ту банда̄ ғу̊ɣ тар Ту!»

Ба̄ди Хуδой wирд лу̊д: «Wузта Елӣ ху̊на̄йард укм кинум. Йуйи фа̄мт иде̂, wи паценен ху кирдор қати Хуδойард беурмати чӯд, амо йуйи wев гӣр наδод. Wузта ди ҷа̄т ҷазо wи δа̄м. Wи варϑ пацента йи рӯзанд марен».

Самуӣли аз Худоwанд ик ди са̄маҷин хабар х̇удху, то са̄ракийеци хӯδм wи найод. Хӣр пал чӯдат, Самуӣли ибодатху̊на̄ диви йет чӯд.

Елӣйи wи пех̇цт: «Хуδойи х̇а̄б турд чӣз лу̊д?»

Самуӣли аwал хойих̇ начӯд иде̂, дар борайи са̄мҷин укми Худоwанд нақл ких̇т, амо зиборайи фикр чӯдху фукаϑи wирд лу̊д. Елӣйи йила̄в қарораϑ нӯстху, ба̄ди ху ка̄л ҷумбентху, малолаϑи лу̊д: «Ага Хуδойи ди ца лу̊вҷ, паста ик дити су̊д. Хе̂р Йу Худоwанд».

Ар чӣзи ик wам х̇а̄б Хуδой Самуӣлард ца лу̊д, ба̄д аз йичанд сол йу фукаϑ иҷро сут. Соленен наɣҷа̄дат Самуӣл мис ғула̄ сут, ат Худоwанд фук wахт wи қати вуд. Фук Исроӣли фа̄мт иде̂, Худоwанди Самуӣлард пайғумбари насӣб чӯҷ. Худоwанди wирд даркори ақӣқатен лу̊дат, йу во сутху Исроӣл мардумарди wев лу̊д.

САWОЛЕН

1) Чӣзард Хуδой аз Елӣ норозӣ вуд?

2) Худоwанди тар ибодатху̊на̄ цу̊нд пӣδ аз Самуӣл қӣwд?

3) Хуδойи Самуӣлард чӣз лу̊д?