ЙОШ ЧӮПУ̊Н

Та̄мард ғал Байт-Ла̄м ʒулик қишлоқак вуд. Тарамен мусофирен мис ка̄м йат. Амо Хуδойи аз Самуӣл таред, тар йи ойила̄ ҷой мему̊ни бох̇т. Аз ди ойила̄ дарӯнанд йи пуц бойад ба̄д аз йичанд сол Исроӣл подх̇о суδҷат.

Wи сардори ойила̄, йа̄ни Йисоййард ғула̄ фахр вуд иде̂, худи Самуӣл пайғумбар тар wи ху̊на̄ йатху, wев қатийи аwқот хӯд. Дасторху̊нен ороста̄ чӯдху Йисой ху пацен ну̊м wирд дараw лу̊вд сут: «Йам му хидӣр пуц» Самуӣли ху диланд фикр чӯд: «Йам ик шичаϑ подх̇о ҷиноw дивест. Шоулум мис подх̇о та̄ӣн ца чӯд, йу мис дисга бақуwатат биландқа̄д вуд».

Амо йеданд Самуӣл тар ғу̊ɣ Хуδой садо йат: «Ту тар ди ҷисмат тар ди биланд қа̄д ма̄чис! Одамта тар ҷисм чост, амо Хуδойта тар дил чост. Йид бойад подх̇о ма̄су̊д».

Йисойи ик дити ху wӯвд пуц ну̊м пис йакдигараϑ Самуӣлард лу̊д. Амо Хуδойи ар тованд лу̊д: «Най, йид йу нист!»

Ба̄ди Йисой тар дасторху̊н хез сутху, лу̊ди: «Йадет шич аwқот ха̄ра̄м».

Ат Самуӣли wи пех̇цт: «Йакбор гӣр са, тут ху фукаϑ пацен ну̊м мурд лу̊до?»

Иисойи ҷаwоб δод: «Мунд йига ʒулик пуц мис йаст. Йу пи пух̇та̄ мол пойд». Самуӣли ба̄д Йисоййард лу̊д: «Wи мис тару̊д қӣw!»

Ба̄д аз йичанд дақӣқа̄ Доwӯд тар Самуӣл хез йат. Йу сафедбӣц вудат, хушрӯй цеменен wинд вадат, wи че̂райи рӯй мис баша̄нд вуд.

Худоwанди ба̄д Самуӣлард лу̊д: «Йид ику, та̄ӣн ди ки!»

Самуӣли ба̄д аз хох̇ дарӯнанд рӯған зох̇тху, Доwӯд пех̇у̊нийарди молтху, лу̊ди: «Ба ну̊ми Хуδойта Исроӣл мардумтита подх̇о ту та̄ӣн кинум. Худоwанд турд баракат δӣд!

Ди wахтанд ба̄д Рӯи Худоwанд Доwӯдард озир сут. Йисоййат wи паценен айру̊наϑ редху га̄пδе̂ден мис нава̄рδод, ат Доwӯд мис баша̄нд сарфа̄м насут иде̂, ик wам рӯз чӣз бар wи сут.