ИСРОӢЛ ПОДХ̇О ТАЛАБ КИХ̇Т

Самуӣл соф пӣр сут. Йу дисга одам вуд иде̂, Хуδойи цу̊ндо солен wи қати Исроӣл мардумти робари чӯд. Йуйи қози ҷиноw мардум да̄wойат шара̄т а̄л чӯдат, пайғумбар ҷиноwи халқард лу̊д иде̂, Хуδойард итоат кинен. Амо исроӣлийенен хойих̇ чӯд иде̂, wеванд мис дига халқен дастӯр подх̇о вид, ат қози най.

Wа̄δен йат тар Самуӣл хезху лу̊ден: «Ма̄шти подх̇о не̂δ!» Самуӣл хах̇ малол сут. Йуйи пи Хуδой дуо чӯдху Хуδойи wи дуойард ҷаwоб δод: «Ди халқ га̄п ниғу̊ɣ…

wа̄δен ту найат, Муйен ра̄д чӯне чӯд, гуйо Wуз wевти подх̇ойи ма̄кум».

Ба̄ди Самуӣл фукаϑ исроӣлийен ҷа̄м чӯдху лу̊ди: «Хуδойта тамард подх̇о да̄ких̇т, амо тамата wи хезанд дисга wазӣфадор сет: тама пацента бойад wи лих̇каранд хизмат кинен, йила̄вардта ворҷен да̄кенху, wа̄δта wи аробайен қати тийен. Йила̄вта wирд цанат, йила̄вта wи аробайенард асбобат анҷу̊м кинен, ат йила̄вгата во wи замӣненанд коренат осилта wирд ҷа̄мен. Тама ризӣнента аwқотат гарδа̄ wирд пӣʒен.

Йута тама баша̄нд ангӯрδзоренат, зимценат, боғен парҷӣвдху, ху одаменардта да̄ких̇т. Аз тама осилта δӣст қисм парҷӣвдху ху ғулу̊менардта да̄ких̇т. Тама баша̄нд ғулу̊мента дига wирд корен.

Та̄мта х̇ему̊н сет иде̂, подх̇ойет хойих̇ ца чӯд. Ба̄дта аз Хуδой хойих̇ кинет иде̂, аз wи тама халос ких̇т, амо Хуδойта тама га̄п нах̇ӣнт».

Амо wа̄δен Самуӣл га̄пен наниғух̇тху войен wи ху га̄п такрор чӯд: «Ма̄шард подх̇о даркор!»

Ба̄ди Худоwанд аз Самуӣл римод иде̂, Шоул wевти подх̇о не̂δд. Шоул йошат хушрӯй ҷиwу̊н вуд, wи қа̄д аз фукаϑ биландди вуд. Исроӣлийенен хуши қати wи қабӯл чӯдху ҷе̂ғен δод: «Ла̄к подх̇о зинда̄ вид!»

Амо Шоул баша̄нд подх̇о навуд. Йуйи Хуδой га̄пен наниғух̇тат фук чӣзаϑи ху дилти чӯд. Ди ҷа̄ти ба̄д Хуδой хойих̇ начӯд иде̂, ла̄к Шоул наслийен Исроӣл мардумти подх̇ойи кинен.

Шоул ғал подх̇о вудат, Хуδойи йига йош одам интихоб чӯдху, йу бойад ба̄д аз Шоул мӣдоw халқ робар суδҷат.