ИМУ̊Н ҒАЛА̄ БА

Самуӣл тӯйдат, Доwӯди во мол пе̂йд. Йуйи мол тар чаро ца йод, дойимаϑи барбат (мӯсиқи асбоб) ху қати зох̇т. Wи моли йи ҷонди чаро wахти чӯдат, йуйи барбат ниwе̂здат, созени хурд еҷод чӯд. Амо йакбори чӯпу̊нанд мис wи кор қӣн су̊д. Мисол, йакбори хирс wи моленти уҷум чӯд. Дӯсга вуδҷатху йи wа̄ргбуци хӯҷат, амо Доwӯди нала̄кчӯд, йуйи ху мол муофизат чӯд.

Доwӯди ху диланд фикр чӯд: «Ар ра̄нг wуз ху молен ца чисум, Хуδой мис дисга му чост. Ар wахт йичӣз хатар мурд ца вид, Йу му чостат муофизат му ких̇т». Доwӯди ху барбат зох̇тху, йила̄в фикрийи чӯдху, ба̄ди ниwе̂здху, сози лу̊д: «Худоwанд – му чӯпу̊н; wузта пи йичӣзаϑ зор наса̄м: Йута са̄вʒ пух̇тайенард му аɣе̂здат, ар ору̊м х̇ацен хезта му йе̂ст. Йута му ҷу̊нард қуwат да̄ких̇тху, Ху ну̊м хотирандта рост пу̊нденва му йе̂ст. Ага wузта ма̄рг ҷиноw торик ҷойенва мис ца тӣм, аз бадита х̇оҷ наδе̂рум, ду̊н ҷа̄т Тут му қати; Ту моϑта ору̊м му ких̇т».

Подх̇о Шоуланд хурдакаϑ тез-тез wи қа̄р сифӣд, амо зибора х̇ему̊н сутху, хах̇ малол сут. Йи рӯз wи қа̄р дис хах̇ сифӣд иде̂, йу дарбор мардум мис аз х̇оҷ пи лаɣʒа̄ δод. Йӣw аз wи ғулу̊мени лу̊д иде̂, Доwӯд тар дарбор қӣwдоw даркор, йу барбат баша̄нд ниwозд.

Wи ниwе̂здоw бойад подх̇о ору̊м ких̇т. Ик дити ба̄д Доwӯд тар подх̇о дарбор wе̂х̇т. Шоули нафа̄мт wи хезанд йи ку одам иде̂, Самуӣли wи подх̇ойийард та̄ӣн ца чӯд. Йуйи дар борайи ди фикр мис начӯд, ат ба̄д аз йичанд wахт тар Доwӯд wинд лапаϑ ме̂рат ма̄бат сут. Доwӯди барбат ца ниwе̂зд, Шоуланд wи ҷу̊нанд δод.

Шоули фалиштийен қати δе̂д чӯд Ар wахт йу тар δе̂д ца тӯйд, Доwӯд ди wахтанд тар ху чӣд сут. Δе̂данд барбатниwозӣҷ даркор навуд. Йуйи во ху та̄т молен пе̂йдат, wи вирода̄рен Шоул қати тар δе̂д тойд.

Йакбори wи та̄т wи қӣwдху, лу̊ди: «Ма̄ш лих̇кар ик wи ҷойанд ца, ту тезаϑ тарам са. Ту вирода̄рен мис тарам, йичӣз хӣдоwард зиху wевард йос».

Доwӯд йичанд соат тӯйдху тар wев хез фирӣпт. Йуйи ху вирода̄рард тух̇а̄ вӯдху, wев хезанд нӯстху, wев аскарен га̄пи ниғух̇т. Йакбораϑен фукаϑ қарор чӯдху, айру̊наϑен тар дух̇ман тараф чӯх̇т. Йи фалишти чорик тар исроӣлийен лих̇кар хез наздӣк сут. Йид цара̄нгин аскар! Йу лап баҷасадат бақуwат вудат, wи қа̄дга қарӣб ара метр вуд!

Wи ну̊м Ҷолйот вуд. Wи питана̄ сипинин луқ вудат, wи миδуст ғула̄ неза̄ вуд. Йуйи хах̇аϑ қӣwд: «Wузум ғал ху га̄пти! Вет ху одамху, wузат йу δе̂д кина̄м. Ага йута му ца δӣд, ма̄шта тамард таслӣм са̄wа̄м. Ага wузта wи ца δа̄м, тамата ма̄шард таслӣм сет. А̄, х̇оҷет δӯйдо?» Доwӯди аз ху вирода̄р пех̇цт: «Йиди бағер пиройаϑ мис тар δе̂д тама қӣwд?»

Wа̄δен wирд ҷаwоб δод: «У̊н, фана̄ пӣδи қӣwд. Амо йича̄йаϑ насут. Дисга па̄лаwу̊н қати δе̂д чӣдоw – йа̄ни тар ма̄рг ғе̂в ситтоw!» Доwӯд айру̊н сутху лу̊ди: «Хе̂р Хуδой ма̄ш тарафанд!» Wа̄δ аскаренен шӣнтху лу̊ден: «Йид тар Хуδой чӣз дахли? Йеданд га̄п дар борайи қуwатат, аракатат, баша̄нд шамшерат, сипарат неза̄». Подх̇о Шоули wа̄да̄ δод иде̂, арча̄йта аз Ҷолйот ца δӣд, йута ху ризӣн ик wи одамард δӣд. Амо йича̄йаϑи за̄ра̄ начӯд. Шоуларден лу̊д иде̂ барбатниwозӣҷ Доwӯд тар wев лих̇кар хез йаϑч. Шоули римод Доwӯд тар wи хез вен. Доwӯди аз подх̇о хойих̇ чӯд: «Иҷозат мурд δа wуз ди фалишти қати δе̂дум».

Шоули wирд ҷаwоб δод: «Дар борайи ди фикр мис ма̄к! Тут ғал лап йош, ат Ҷолйот бақуwатат δе̂дга̄р одам». Амо Доwӯди во беғамаϑ лу̊д: «Хирсат шерен му wа̄ргбуцен чи хӣд ца сат, wузум wев δодат, йид мурд йичӣзаϑ нист. Хе̂р Хуδойи wити мурд йордам чӯдат, пас Йута ик ми δе̂данд мис мурд йордам ких̇т».

Шоули ба̄д Доwӯдард лу̊д: «Тунд ту иму̊н мурд лап хуш. Ба ғайри ту йича̄йга ди фалишти қати δе̂д хойих̇ наких̇т... Ма, мев му δе̂д луқен пиниʒху, му шамшерга зиху, ту пано бар Хуδой!»

Доwӯди wев Шоул луқен пинӯйд, амо wа̄δен wирд wазмини чӯд, йу wев қати байела̄ пу̊нд тӯйд. Йуйи ба̄д wев wеδдат, ху виздоҷат пӣнʒга х̇ирн жӣрат, ху моϑгайи зох̇тху тар wи фалишти па̄лаwу̊н хез сут Йуйи Доwӯд wи виздоҷ қати wӣнтху, хах̇аϑи шӣнтху, лу̊ди: «Ик тут гуйо му қати δе̂д чичӣдо?».

Доwӯди wирд дисга лу̊д: «Тут шамшерат неза̄ қати тар δе̂д йаϑч, ат wузум ба ну̊ми Худоwанд, исроӣлийенанд wев лих̇кар Хуδой қати тар ту хез йаϑч». Йуйи ба̄д жӣр рибӯд ар ху виздоҷху, йила̄ви wи не̂ɣдху, wи фалиштитийи wам wеδд. Йа̄ жӣр рост wи фалишти пех̇у̊нинди δод. Ҷолйот wитийаϑ зима̄δард δод. Доwӯди же̂х̇т тар wи хезху, wи шамшери аз wи ғулофанд зох̇тху, зӣди wи. Исроӣлийенен Доwӯд кор wӣнтху, wев дил пур сутху, фалиштийенен аз ху замӣнанд ай чӯд.

САWОЛЕН

1) Шоули Доwӯдард чӣз да̄кчӯд?

2) Ҷолйоти аз Доwӯд цара̄нг шӣнт?

3) Доwӯди аз Ҷолйот цара̄нг δод?