Айыы Тыын түһүүтэ

Храм тэлгэһэтигэр ахсаана биллибэт элбэх киһи тоҕуоруспута. Бу күн иудейдар Хомуур бырааһынньыгын бэлиэтииллэрэ, ол иһин Иерусалимҥа элбэх итэҕэллээх мустубута. Бырааһынньык Паасха кэнниттэн биэс уон күн буолан баран бэлиэтэнэрэ.

Иисус доҕотторо биир дьиэ киэҥ хоһугар мустубуттара. Кинилэр үҥэллэрэ уонна бэйэ-бэйэлэрин кытта сэһэргэһэллэрэ. Эмискэ күүстээх тыал түһэн эрэрин санатар дьикти тыас салгыҥҥа иһиллибитэ. Тыас улааттар-­улаатан хоһу барытын толорбута.

Онтон уот тылыгар маарынныыр сарбынньахтар көстүбүттэрэ уонна баар дьон төбөлөрүгэр түспүттэрэ. Бу дьиҥнээх уот буолбатах — Айыы Тыын бэлиэтэ этэ.

Оннооҕор өссө ордук дьикти дьон сүрэҕэр буола турара. Бу кэмҥэ кинилэргэ үөрүү иэйиитэ киирбитэ уонна Таҥараны доргуччу айхаллаан барбыттара. Таҥара хайдах курдук кинилэри маанылаабыта, Иисус төһөлөөх элбэх үтүөнү эппитэ уонна оҥорбута биир түгэҥҥэ кинилэргэ арылла түспүтэ. Иисуһу көрбөтөллөр даҕаны, аттыларыгар баарын билбиттэрэ. Апостоллар улаханнык санаалара көтөҕүллэн Таҥараҕа махтаммыттара — тохтоло суох өрөгөйдөөбүттэрэ, мэлииппэ аахпыттара уонна айхал ырыатын ыллаабыттара.

Кинилэр Таҥараны төрөөбүт тылларынан эрэ буолбакка, билбэт тылларынан эмиэ айхаллыы туралларын кэлин өйдөөбүттэрэ. Апостоллар эрэ буолбакка, атын куораттартан, оннооҕор дойдулартан кэлбит дьон эмиэ бу тыллары өйдүүллэрэ. Рим олохтоохторо латынь тылын, гректэр — гректии, перс — перстии, арабтар — арабтыы, Африка олохтоохторо — эмиэ бэйэлэрин тылларын истэллэрэ.

Сорохтор дьиктини көрөн куттаммыттара, атыттар күлэн этэллэрэ:

— Бары итирбит курдуктар!

Апостоллартан биирдэстэрэ үрдэлгэ тахсан, тугу эрэ этээри илиитин өрө ууммута. Бу Петр этэ.

— Иудея эр дьоно уонна ыраахтан кэлбиттэр бука бары мин этэрбин болҕойон истиҥ! — диэн этиитин саҕалаабыта. — Бу дьон эһиги саныыргыт курдук итирик буолбатахтар, билигин сарсыарда эрэ. Иоиль пророк бүгүҥҥү күн туһунан өрдөөҕүтэ этэн турардаах: биһиэхэ Айыы Тыын киирдэ. Бүтэһик нэдиэлэлэргэ Суруйууларга этиллибиттэн хайыы-үйэ элбэх туолла. Оттон бүгүн Айыы Тыын түһүүтэ буолла. Назареттан сылдьар Иисус туһунан эмиэ былыргы пророктар билгэлээбиттэрэ. Кини Таҥара Уола буоларын элбэх дьиктилэри көрдөрөн дакаастаабыта. Эһиги буоллаҕына Рим олохтоохторун көмөлөрүнэн Иисуһу кириэскэ тиирбиккит. Ол эрээри Таҥара Кинини тилиннэрбитэ.

Биһиги итини итэҕэйэбит, тоҕо диэтэр бэйэбит онно баар этибит. Иисуһу өлөрбүккүт кэннэ илэ харахпытынан көрбүппүт уонна Кини тыыннааҕын билэбит. Халлааҥҥа тахсыытыгар биһиги эмиэ баар этибит. Онтон бүгүн биһиэхэ Айыы Тыыны ыытта. Иисуһу Таҥара барыны барытын үрдүнэн Айыы Тойон оҥордо! Ону бары билиҥ!

Баар дьонтон үгүстэрэ бу киһи нөҥүө Таҥара Бэйэтинэн саҥарарын өйдөөбүттэрэ. Кинилэр апостол тыллара кырдьыктааҕын билэр этилэр уонна кини Таҥара тылын тиэрдэриттэн ис сүрэхтэриттэн долгуйбуттара.

— Оччоҕо биһиги билигин тугу гынабыт? — кинилэр Петртан ыйыппыттара.

— Аньыыгытын билинэн Таҥараҕа эргиллиҥ! Уонна хас биирдии бэйэҕит Таҥара көмөтүнэн саҥа олоҕу баҕараргытын көрдөрөн — сүрэхтэниҥ, — диэбитэ кини. — Оччоҕо эһиги эмиэ Айыы Тыын бэлэҕин ылыаххыт. Тоҕо диэтэр, пророктар эппиттэрэ эһиэхэ эмиэ сыһыаннаах.

Петр этэрин тыһыынчанан киһи истибитэ уонна бу күн үс тыһыынча кэриэтэ киһи сүрэхтэммитэ. Кинилэр бары Иисус Христос Евангелиятын үөрүүнэн ылыммыттара.

Ити курдук Паасхаттан биэс уон күн ааспытын кэннэ, Айыы Тыын халлаантан түспүт күнүгэр, бастакы Сиэркэп тэриллибитэ.