Иисус халлааҥҥа тахсыыта

Быыһааччы, Айыы Тойон Иисус тиллэн, үөрэнээччилэрин кытта көрсөн сэһэргэһэр кэмнэрэ хайдахтаах курдук дьикти күннэр этилэрий. Ол гынан баран бу күннэр бүтэр уһуктаах этилэр. Иисус Бэйэтин Аҕатыгар халлааҥҥа төннүөхтээҕэ.

Иисус доҕотторун кытта алтыһарыгар Елеон хайата сөптөөх сир этэ, ол иһин кинилэри онно илдьибитэ. Үөрэнээччилэр Иисус кинилэри хаалларыахтааҕын билэллэрэ, ол иһин санааргыыллара. Паасхаттан түөрт уон күн ааспыта.

— Санаарҕаамаҥ, — диэбитэ Иисус, — Мин халлааҥҥа Аҕабар да бардахпына, эһигини кытта буолуоҕум. Оннооҕор эһиги Мин туспунан Үтүө Сураҕы тиэрдээри сир уһугар тиийдэххитинэ, Мин Айыы Тыын көмөтүнэн онно эһигини кытта баар буолуом. Халлааҥҥа таҕыстахпына эһиэхэ Уоскутааччыны ыытыам диэн хаста да этэн турардаахпын.

Үөрэнээччилэр ыйытардыы Иисус диэки көрбүттэрэ. Оттон Кини салҕаабыта:

— Иоанн уунан сүрэхтиирэ. Итинэн дьон саҥа олоҕу олорор баҕалааҕын туоһулуура. Айыы Тыын ол курдук дьайар. Кини эһигини саҥа дьон оҥоруоҕа, эһиэхэ Үтүө Сураҕы тарҕатаргытыгар күүс биэриэҕэ. Айыы Тыын нөҥүө Мин Бэйэм эһигини арыаллыам. Кини эһигини Миигин кытта кэпсэтэр, Миигин өйдүүр уонна таптыыр оҥортуоҕа. Эһиги Таҥараттан күүс ылыаххыт уонна ханна да сырыттаргыт Мин туспунан кэпсиэххит. Бастаан манна Иерусалимҥа, онтон Израильга, онтон тиһэҕэр сир бары уһуктарыгар тиийэ.

Ол кэннэ Кини илиитин халлааҥҥа уунан үөрэнээччилэрин алҕаабыта уонна эмискэ сиртэн аа-дьуо өрө тахсан барбыта! Кини үөһэ таҕыстар тахсан испитэ, онтон былыт быыһыгар киирэн үөрэнээччилэригэр көстүбэт буолбута. Итинник арахсыы соһуччу соҕус этэ. Иисус Аҕатыгар төннөрүгэр итинник халлааҥҥа бары көрөн турдахтарына өрө көтөн тахсарын ким санаан билиэҕэй! Билигин Кини Аҕатын кытта атын, көстүбэт сиргэ баара.

Кинилэр сөҕөн-­махтайан, дьиктиргээн, халлааны одуулуу туран хаалбыттара. Билигин кинилэр хайдах буолаллар?

Эмискэ үөрэнээччилэр иннилэригэр сандаарар маҥан таҥастаах икки киһи көстүбүтэ. Бу Аанньаллар этилэр. Кинилэр эппиттэрэ: «Иисус сиргэ халлаантан өссө кэлиэҕэ, ол гынан баран кыһыл оҕо буолбакка, Кини сүдү күүстээх уонна албан ааттаах кэлиэҕэ. Иисус иккис кэлиитигэр Судьуйа уонна Модун кыахтаах Ыраахтааҕы быһыытынан кэлиэҕэ. Онуоха диэри Кини итэҕэллээхтэр сүрэхтэригэр баар буолуо уонна халлааҥҥа ыраахтааҕылыаҕа».

Үөрэнээччилэр Иисус бүтэһик эппит тылларын өйдөрүгэр тутан, улуу үөрүүнү үөрэн, Иерусалимҥа төннөн кэлбиттэрэ.