Христос туһугар бастакы эрэйи көрсөөччү

Иерусалим сиэркэбэ улаатан испитэ. Онно хайыы-үйэ элбэх тыһыынча итэҕэллээх сылдьара. Апостоллар дьадаҥы, кыһалҕалаах дьон туһугар кыһаллаллара, ол элбэх бириэмэни ылара. Ол иһин апостоллар туспа анал дьону — диаконнары — аныыр түмүккэ кэлбиттэрэ. Диаконнар дьадаҥы дьон туһугар кыһаллалларын таһынан Таҥара тылын кинилэргэ эмиэ кэпсииллэрэ.

Оннук дьонтон биирдэстэрэ Стефан этэ. Кини Айыы Тыын күүһүнэн туолан, элбэх киһини кэмсиниигэ аҕалара уонна Айыы Тойон Иисус аатыттан дьиктилэри оҥороро. Ол иһин кинини элбэх иудей ордугургуура уонна абааһы көрөрө.

Онтон сылтаан Стефан синедрион — ол саҕанааҕы итэҕэллээх иудейдар үрдүкү сууттарын иннигэр дьүүллэммитэ.

Кини тыл этэрэ Таҥара тылын тиэрдиигэ ордук маарынныыра. Бастаан утаа Стефан этэр тылларыгар туох да киһи сэмэлиэх айылааҕа суоҕа, тоҕо диэтэр, кини Таҥара Бэйэтин норуотун Израилы кытта сыһыанын туһунан кэпсээбитэ. Ол гынан баран сотору Стефан кинилэри саралаан барбыта:

— Эһиги өһөскүт уонна Таҥара тылын истибэккит! Бэйэҕит өбүгэлэргит пророктары ылымматахтарын курдук, эһиги билигин Иисуһу ылыммаккыт.

Онтон Стефан халлааны көрөн баран эппитэ:

— Таҥара миэхэ харахпын арыйда, онон мин халлааҥҥа Кинини уонна аттыгар турар Иисуһу көрөр кыахтанным.

Бу этии кэнниттэн синедрион чилиэннэрэ уордарын-­кылыннарын сатаан туттумматахтара. Кинилэр ойон туран Стефаҥҥа саба түспүттэрэ уонна кинини анньыалаан-­охсуолаан куорат устун соһон илдьибиттэрэ. Куорат тас өттүгэр тахсан кинини төгүрүйбүттэрэ уонна өлөрөөрү тааһынан тамнаан барбыттара. Хайыы-үйэ ыараханнык бааһырбыт Стефан үҥэ-көрдөһө турбута:

— Айыы Тойон Иисус, миигин Бэйэҕэр ыл!

Ыарыыта бэрдиттэн тобуктуу түспүтэ уонна күүһүн муҥунан хаһыытаабыта:

— Айыы Тойон! Бу дьону накаастаама, оҥорбут аньыыларын бырастыы гын!

Ыйытыктар:

1) Апостолларга ханнык суолталаах сулууспаҕа

бириэмэлэрэ тиийбэт эбитий?

2) Апостоллар бу ыарахаттары хайдах туораабыттарый?

3) Стефан диэн кимий? Иудейдар тоҕо киниэхэ уордайбыттарый?

4) Тааһынан тамныыр кэмнэригэр Стефан туох диэн үҥпүтүй?