Савл итэҕэли ылыныыта

Стефан өлбүтүттэн биир киһи ордук үөрэрэ. Бу Савл диэн Христоһу батыһааччылары сойуолуур эдэр сокуонньут этэ. Кини эдэр христианскай Сиэркэпкэ улахан суолталаах Стефан өлбүтүттэн үөрэрин кистээбэтэ. Стефан өлбүтүн кэннэ итэҕэллээхтэри сойуолааһын саҕаламмыта. Онно Савл көхтөөхтүк кыттара. Кини ити курдук Айыы Тойоҥҥо өҥө оҥоробун дии саныыра.

Биирдэ Савл элбэх христианнар баар куораттарыгар Дамаска айанныырга санаммыта. Онно тиийэн, ороспуонньуктары тутар курдук итэҕэллээхтэри тутан, Иерусалимҥа аҕалан хаайар баҕалааҕа. Савл онно эрдэттэн бэлэмнэнэн архиерейтан көҥүл сурук ылбыта.

Савл Дамаска чугаһаабытын кэннэ кини олоҕун төрдүттэн уларытар түбэлтэ буолбута. Эмискэ чаҕылхай сырдыктан хараҕа көрбөт буолан хаалбыта. Савл сиргэ охтон түспүтэ. Онуоха халлаантан саҥа иһиллибитэ:

— Савл, Савл! Тоҕо эн Миигин сойуолуугун?

Савл кутталыттан ыйыппыта:

— Эн кимҥиний?

Саҥа эппиэттээбитэ:

— Мин эн сойуолуур Иисуһуҥ буолабын.

Савл сымыйа пророк уонна албынньыт дии саныыр Иисуһун иннигэр кутталыттан салҕалас буолбута. Иисус Сиэркэбин суостаах сойуолаһааччыта Савл билигин дьэ сыыһатын өйдөөбүтэ. Халлаантан саҥарар Иисус Таҥара Уола, Мессия буолара киниэхэ арыллыбыта. Бу Кини туһунан пророктар эрдэттэн өтө көрөн эппиттэр эбит.

Иисус киниэхэ өссө эппитэ:

— Тур уонна куоракка тиий! Онно эйиэхэ тугу гынаргын этиэхтэрэ.

Савл турбута, хараҕын арыйан баран көрбөт буолбутун өйдөөбүтэ. Бииргэ сылдьар дьоно илиититтэн сиэтэн Дамаска аҕалбыттара. Онно тиийэн кини үс күн устата көрбөккө сылдьыбыта, тугу да аһаабатаҕа, уу да испэтэҕэ. Бу кэм устата кини Айыы Тойону ыҥырара уонна Киниттэн бырастыы гынарын туһугар үҥэн көрдөһөрө. Үс күн ааспытын кэннэ Таҥара Анания диэн ааттаах киһини ыыппыта. Кини Савлга илиитин ууран баран хараҕынан көрөр буоларын туһугар Таҥараҕа үҥпүтэ. Көрөр буолан баран Савл христианскай Сиэркэпкэ киирбитэ.