Аанньал Гавриил Марияҕа көстүүтэ

Галилея Назарет диэн кыра куоратыгар Мария диэн кыыс олорбута. Кини мас ууһугар Иосифка кэргэн тахсар кэпсэтиилээҕэ. Мария уонна Иосиф боростуой дьон этилэр, ол эрээри Давид ыраахтааҕыттан удьуордаахтара. Уоллаах кыыс сотору кэминэн ыал буолар баҕалаахтара.

Биирдэ Мария дьиэтин ис-тас үлэтин оҥоро сырыттаҕына эмискэ Аанньал Гавриил баар буола түспүтэ. Кинини сиргэ Таҥара ыыппыт этэ:

— Үөр-көт, Үрдүк Алгыстаах! Таҥара Эйигин кытта.

“Миигин урут ким да ити курдук көрсүбэт этэ”, — дии санаабыта Мария уонна олус куттаммыта.

— Куттаныма, Мария, — диэбитэ Аанньал Гавриил, — эн Таҥараттан алгыстааххын. Уол оҕону төрөтүөҥ уонна Иисус, ол эбэтэр Быыһааччы диэн ааттыаҥ. Кини улуу, Үрдүк Таҥара Уола буолуоҕа. Айыы Тойон Киниэхэ Давид бүрүстүөлүн биэриэҕэ, Саарыстыбата муҥур уһуга суох буолуоҕа.

Мария Аанньал тугу этэрин тута өйдөөбөтөҕө.

— Мин өссө да эрэ суохпун… — диэбитэ кини саарбахтаабыт куолаһынан.

— Хайа баҕарар киһи оҕото аҕалаах буолар, — диэбитэ Аанньал, — ол гынан баран эн төрөтүөхтээх Уолуҥ ураты оҕо буолуоҕа. Кини Аҕата — Таҥара. Ол иһин мин этэбин: Кини — Таҥара Уола.

Аанньал тылларын Мария итэҕэйбитэ. Таҥара хас да үйэ анараа өттүгэр эрэннэрбитэ сотору кэминэн туолуохтааҕа! Кини, Мария, эрэннэриллибит Быыһааччы ийэтэ буолар дьылҕаланнаҕа!

Ол эрээри хайдах быһыылаахтык буолуохтааҕын Мария ситэ өйдөөбөтөҕө, ол иһин Аанньалтан ыйыппыта:

— Ол хайдах буолуой?

Онуоха Гавриил эппитэ:

— Айыы Тыын ону толоруоҕа. Үрдүк Таҥара күүһэ Кыһыл Оҕоҕо олоҕу биэриэҕэ. Ол иһин эн төрөтүөхтээх Оҕоҥ сибэтиэй буолуоҕа уонна Таҥара Уола диэн ааттаныаҕа!

Мария Таҥараҕа истигэн буолар баҕаттан:

— Мин Айыы Тойон кулутабын. Эн эппитин хоту буоллун, — диэбитэ.

Ол кэннэ Аанньал халлааҥҥа төннүбүтэ.