Кыһыл оҕо күкүргэ

Таҥара бүтүн Рим империятыгар нэһилиэнньэ биэрэпиһин оҥорор баҕа санааны Рим бастакы императорыгар Авгуска сахпыта. Палестина олохтоохторо биэрэпискэ киирэллэригэр бэйэлэрин төрүттэрин куораттарыгар тиийиэхтээхтэрин туһунан император укаас таһаарбыта.

Бу кэмҥэ Иосиф уонна Мария Назарекка олорор этилэр.

— Мин дьонум Вифлеемтэн төрүттээхтэрин эн билэҕин, — диэбитэ Иосиф Марияҕа. — Хас да үйэ анараа өттүгэр дойдуну салайбыт Давид ыраахтааҕы ырааҕынан аймаҕым буолар. Онон мин эмиэ онно барыахпын наада.

— Көннөрү кэм эбитэ буоллар, бу айан миэхэ туох да ыарахана суох буолуо этэ, — өрө тыыммыта Мария. — Ол гынан баран сотору Оҕо төрөтүөхтээхпин эн билэҕин. Айан ыарахан. Кини атын сиргэ төрөөтөҕүнэ соччото суох буолуо.

— Мария, мин куруутун эн аттыгар баар буолуом, — диэн уоскуппута Иосиф. — Эн төрөтүөхтээх Оҕоҥ Таҥара Уола диэбитэ дии Аанньал. Таҥара биһиги туспутугар кыһаллыаҕа.

Ити курдук Мария уонна Иосиф айаҥҥа туруммуттара. Кинилэр төһө да өсүөллээхтэрин иһин, бытаан буоланнар, олус өр айаннаабыттара. Вифлеемҥэ дьэ тиийэн, сылайбыт айанньыттар хонор сирдэрин көрдөөбүттэрэ.

— Бырастыы гыныҥ, — диэбитэ Иосиф төттөрү-­таары хаамыталыыр хонук дьиэ хаһаайыныгар, — эһиги дьиэҕитигэр иллэҥ хос баар дуо?

— Хомойуох иһин, биир да иллэҥ хос суох, — диэбитэ хаһаайын.

— Суох дуо? Оччоҕо биһиги ханна хонобут? Саатар кырачаан хос оҕото баара буолаарай? Мин ойоҕум оҕолонор кэмэ чугаһаата, баҕар бу да түүн төрүөн сөп!

— Мин эйиэхэ уонна кэргэҥҥэр үөрүүнэн көмөлөһүөм этэ даҕаны, биир да иллэҥ хоһум суох. Хайыыр да кыах суох.

Мария кутталыттан Иосиф илиитин хаба тардан ылбыта:

— Биһиги аһаҕас халлаан анныгар хааларбыт сатаммат! Таһырдьа олус тымныы, мин, бастатан туран, Оҕом туһугар кыһаллабын!

Хаһаайын чугаһаан кэлэн эппитэ:

— Таһырдьа хаалыаххыт суоҕа. Тиэргэним түгэҕэр хотон баар. Онно эһиги солуомаҕа оҥостон хонуоххутун сөп. Сүөһүлэр эһигини сылытыахтара.

— Үтүөҥ иһин ис сүрэхтэн махтанабыт! — диэбиттэрэ Иосифтаах Мария.

Бу түүн дьикти көстүү буолбута: сири-дойдуну айбыт уонна ону барытын илиитин иһигэр тута сылдьар Таҥара Уола кыра, кыаҕа суох Кыһыл Оҕо буолан солуома үрдүгэр төрөөбүтэ. Биллэн турар, бу Кыһыл Оҕону көрөн туран ким даҕаны Таҥара Уола диэ суоҕа этэ. Мария Кинини сүөһүлэр аһыыр күкүрдэригэр сытыарбыта. Оҕо онно букунуйара уонна бары кыһыл оҕолор курдук ытаан ылара. Иосиф Марияҕа хайыһан эппитэ:

— Бу Оҕо туһунан Аанньал эйиэхэ туох диэбитин өйдүүгүн дуо? Киһи кыайан итэҕэйбэт, Кини наһаа кыра уонна төрөөбүт сирэ да хобдоҕо бэрт.

— Ол барыта кырдьык, Иосиф, — Мария сибигинэйэн эппитэ, — барыта Таҥара эппитин курдук буолуоҕа.

Ыйытыктар:

1) Рим империятын модун кыахтаах императора ким эбитий?

2) Иудейдар ханна тиийиэхтээхтэр диэн укаас тахсыбытый?

3) Иисус хайдах “баай хонук дьиэтигэр” төрөөбүтүй?