Төрөөбүт дойдуга төннүү

Даниилы оҕо сырыттаҕына Вавилоҥҥа илдьибиттэрэ, ол да буоллар, кырдьан да баран төрөөбүт дойдутун уонна Таҥара дойдуларыгар төнүннэриэх буолан эрэннэрбитин өйдүүрэ.

Оо, өскөтүн Таҥара дьиэтин чөлүгэр түһэрэн, иудейдар бары мустан Таҥараларыгар үҥэллэрэ эбитэ буоллар! Даниил дьиэтигэр соҕотох хаалан, астан туттунан, Таҥараҕа үҥэрэ:

– Мин Айыы Тойонум, Эн улуу уонна сибэтиэй Таҥараҕын, Эйигин таптыыр дьоҥҥо Эн амараххын. Биһиги, Эн норуотуҥ, хайдахтаах курдук элбэх сыыһаны оҥордубутуй. Ол иһин Эн Иерусалим урусхалланарын уонна биһиги туора дойдуга олорорбутун көҥүллээбитиҥ. Ол гынан баран Эн амараххын билэбин, ол иһин Эйигиттэн көрдөһөбүн: норуотум аньыытын-­харатын бырастыы гын уонна төрөөбүт сиригэр төннөрүн көҥүллээ!

Таҥара бу көрдөһүүнү ылыммыта. Даниил бэйэтэ Израильга кыайан төннүбэтэҕэ, тоҕо диэтэр, дойдуларыгар барар көҥүлү кини өлбүтүн эрэ кэнниттэн ылбыттара. Вавилон ыраахтааҕыта еврейдэр дойдуларыгар төннөллөрүн эрэ көҥүллээбэтэҕэ, кини өссө Иерусалим Таҥаратын дьиэтин сибэтиэй кыһыл уонна үрүҥ көмүс иһиттэрин кинилэргэ төнүннэрбитэ. Израиль дьоно хайдах курдук үөрбүтүн киһи сатаан да суруйбат. Кинилэр дьэ босхоломмуттара!

Ол да буоллар дойдуларыгар төннөр кытаанах санаа барыларыгар баар буолбатах этэ. Кинилэр аны бу дойдуга дьиэлээх, саадтаах, ыаллардаах уонна доҕоттордоох этилэр. Оттон Израильга урусхалламмыт дьиэлэр эрэ кэтэһэллэрэ. Барытын саҥаттаан туттарга элбэх сыра-сылба, ыарахан үлэ күүтэрэ.

Ол эрээри ыарахантан куттамматтар элбэх этилэр. Кинилэр Иеруслаимҥа көһөргө уонна Таҥара дьиэтин чөлүгэр түһэрэргэ быһаарыммыттара.

Израиль дьоно дойдуларыгар элбэх нэдиэлэ устата айаннаан тиийбиттэрэ. Манна кэлэн куттана санаабыттарын көрбүттэрэ: дьиэлэрэ-­уоттара урусхалланан туһата суох буолбут этэ, оттон бүтүн хаалбыт дьиэлэргэ атын дьон олороллоро. Бааһыналара уонна виноград үүннэрэр сирдэрэ сыыс отунан бүрүллүбүттэр, сорох сирдэри туора дьон ыраастаан, чөлүгэр түһэрэн бэйэлэригэр сир оҥостубуттар. Өссө да элбэх киирсии уонна ыарахан үлэ иннилэригэр кэтэһэрэ!

Ол гынан баран кинилэргэ сирдэрин ыраастыыр уонна хорутар, үүнүүлэрин олордор уонна хомуйар, саҥа дьиэни уонна маҥхааһайы тутар сүрүн соруктара буолбатах этэ. Саамай суолталааҕа диэн билиэҥҥэ олорон кыайан оҥорботохторо буолар: Айыы Тойону Таҥара дьиэтигэр айхаллааһын!

Билигин Таҥараны айхаллыыр дьиэлэрэ да суоҕа. Хаһан эрэ кэрэ көстүүлээх Иерусалим куораттан урусхалламмыт дьиэлэр эрэ хаалбыттар.

– Таҥара дьиэтин тутарга элбэх бириэмэ наада буолуо, ол гынан баран билигин биһиги алтаар туттуохпутун сөп, — диэбитэ аҕабыыт. — Чопчу урут турбут сиригэр тутуохха.

Дьон алтаар туруохтаах сирин ыраастаан барбыттара. Сотору кэминэн дойдуларыгар төнүннэрбитин иһин Таҥараҕа махтанан сиэртибэ биэрэр кыахтаммыттара. Хас да сыл ааспытын кэннэ саҥа Таҥара дьиэтин туппуттара. Иерусалим эмиэ үрдүк эркиннэрдээх, кэрэ көстүүлээх куорат буолбута.

Израиль дьоно Вавилон билиэниттэн босхолонон төннүбүттэрин кэннэ Таҥара Бэйэтин кэриэстэрин санатарга диэн хат-хат пророктары ыыталыыра; Кини эмиэ сотору-­сотору накаастыырыгар уонна сотору-­сотору бырастыы гынарыгар тиийбитэ. Өссө быдан өрдөөҕүтэ, хаһан эрэ урут буолбутунааҕар олох атыннык, барыта уларыйыа диэн Таҥара пророктар нөҥүө этиппэтэҕэ дуо?

«Израиль норуотун, Иуда норуотун кытта саҥа сөбүлэһии оҥорсор кэмим дьэ кэлэн эрэр, — диир Айыы Тойон. — Бу кинилэр өбүгэлэрин Египет сириттэн таһаараары, илиилэриттэн сиэтэн туран оҥорсубут сөбүлэһиибиттэн чыҥха атын сөбүлэһии буолуоҕа; ол сөбүлэһиибин кинилэр кэспиттэрэ… Ол кэнниттэн Израиль норуотун кытта оҥорсор сөбүлэһиим бу баар, — диир Кини. — Сокуоннарбын өйдөрүгэр-­санааларыгар иҥэриэҕим, сүрэхтэригэр-­быардарыгар суруйуоҕум; Мин кинилэр Таҥаралара буолуоҕум, кинилэр Мин норуотум буолуохтара… тоҕо диэтэр Мин кинилэр сокуону кэһиилэрин бырастыы гыныам, аньыыларын санатыам суоҕа» (Библия, Иеремия кинигэтиттэн 31 түһүмэҕин 31–34 хоһоонноро).

Таҥара хаһан ити эрэннэриитин толоруох буолбутуй?