Маныыһыттар хонууга

Вифлеем тулатыгар маныыһыттар хонууга хойдорун мэччитэ сылдьыбыттара. Түүн буолбута, ол гынан баран кинилэр утуйаллара сатаммат этэ: тула сиэмэх кыыллар хой оҕотун быыс-хайаҕас булан тутан ылаары кэтии сылдьаллара. Түүн ахсын, хайдах да күн-дьыл буоллун, маныыһыттар болҕомтолоохтук үөрдэрин харабыллыырга эрэ тиийэллэрэ.

Хайа, бу туох буолла? Туох сырдык уотай? Туох эрэ чэпчэки уонна чаҕылыйар кинилэргэ халлаантан түһэн иһэр! Маныыһыттар улаханнык куттаммыттара. Хайдах оннук буолуой? Бу Айыы Тойон Аанньала эбээт! Аанньал кинилэри кытта сэрэнэн кэпсэппитэ:

— Куттанымаҥ! Мин бар дьоҥҥо тосхойбут улуу үөрүүнү эһиэхэ иһитиннэрэ кэллим!

Кини маныыһыттарга дьикти Кыһыл Оҕо бу түүн Вифлеемҥэ төрөөбүтүн туһунан иһитиннэрээри халлаантан түспүтүн быһаарбыта. Бу Кыһыл Оҕо — Быыһааччы, Христос Айыы Тойон.

Маныыһыттар уһуннук кэтэспит Быыһааччылара кэлбитин билэн баран олус диэн сөхпүттэрэ. Дьэ сөҕүмэр сурах! Ол кэннэ кинилэр өссө дьиктини истибиттэрэ: Кыһыл Оҕону көрө кинилэр баай дыбарыаска буолбакка, күкүргэ барыахтаахтара. Ол аата, бастатан туран, кинилэр хотону көрдүөхтээх этилэр.

Маныыһыттар бэйэ-бэйэлэрин кытта кэпсэппэккэ да хаалбыттара, халлаантан Аанньаллар айхаллыыр ырыалара иһиллибитэ.

— Үрдүкү Таҥараҕа уруй-айхал уонна сир үрдүгэр эйэ-ил, дьоҥҥо Таҥара үтүө сыһыана баар буолуохтун!

Бу сир үрдүгэр ылламмыт ырыалартан арааһа саамай кэрэлэрэ этэ.

Ол кэннэ Аанньаллар сүтэн хаалбыттара.

Маныыһыттар бэйэ-бэйэлэрин көрсө түспүттэрэ, быһаарыныы ылыммыттара:

— Чэйиҥ, Таҥара биһиэхэ эппитин курдук, Вифлеемҥэ тиийэммит Быыһааччыны булуоҕуҥ!

Таҥара Бэйэтинэн бу сонуну биллэрбитигэр кинилэр бигэтик эрэнэллэрэ.

Маныыһыттар үөрдэрин Таҥара араҥаччылыа диэн толору эрэллээх хаалларан баран, Вифлеемҥэ ыксаабыттара. Кинилэр онно хотону булбуттара уонна Таҥара эппитин курдук Марияны, Иосибы уонна күкүргэ сытар Кыһыл Оҕону көрбүттэрэ.

Маныыһыттар сүрэхтэрэ үөрүүнэн туолбута, кинилэргэ улахан чиэс тосхойбута эбээт — уһун кэтэһиилээх Мессияны — Быыһааччыны, Иисуһу, Таҥара Уолун аан бастакынан көрбүттэрэ.