De Heilje Jeist kjemt opp de Jinja rauf

Un aus de Pinjstdach erfelt wia, wieren see aula eenstemmich opp eene Städ. Un doa passieed haustich een ruzhendet Jelud vom Himmel, soo aus een jewaultja Wint, un erfeld daut gaunze Hus, wua see sauten. Un doa kjeemen Tungen verendach, vedeelt, soo aus von Fia un saden sikj opp eenen jiedren von äant. Un see worden aula met däm Heiljen Jeist jefelt un fungen aun en aundre Tungen to räden…

De Tempelplauz wia sea voll. Dit wia de Dach, aun däm de Juden Pinjsten fieeden, un väle Pilja wudden sikj vesaumlen to dit Toopkomen en Jerusalem. Daut Fast funk aum feftichsten Dach no daut Passafast aun.

Väle Jleewende vesaumelden sikj en eenem grooten Rum en eent von de Hiesa en Jerusalem. See nobaden un bäden. Onverhofs kjeem vom Himmel een Jelud soo aus daut Pusten von eenem stoakjen Wint. Daut Jelud wort emma luda un luda un feld dän gaunzen Rum.

Un väle kjliene Fia-Tungen erscheenen un kjeemen opp de Apostel äare Kjap un aundre Nofolja Jesus Christus. Daut wia nich werkjlich Fia, daut wia daut Tieekjen vom Heiljen Jeist.

Oba waut dise Menschen feelden, wia väl besondra un wichtja aus de Vision selfst. En disem Moment freiden see sikj soo sea un fungen aun, Gott met lude Stemm auntobäden. Fuaz erkjanden see, woo väl goode Dinja Jesus jesajcht un jedonen haud, woo goot-meenent Gott to äant wia, un see späaden siene Jäajenwuat, un wan see Am uk nich seenen kunnen. En groote Freid dankten de Apostel Gott. See bäden, sungen un wieren froo …

No ne korte Tiet worden see en, daut see nich bloos en äare Muttasproak bäden, oba uk en Sproaken, dee see noch niemols verhäa jehieet hauden. De Apostel un soogoa Menschen, dee ut veschiedne Städa un Lenda kjeemen, kunnen sikj unjarenaunda vestonen. Jieda eena kunn siene Muttasproak hieren: Griechisch, Latiensch, Arabisch, Persisch un väle aundre Sproaken.

Eenje Menschen kjrieejen Angst, wiels see dochten, daut es waut Äwa-natieedeljet. Aundre lachten äant ut un säden:

"Aula sent bloos besopen!"

Petrus, eena von de Apostel, stunt opp un hilt siene Haunt huach, om to wiesen, daut hee to de Menj räden wull.

"Mana von Judäa un aula, dee von wietauf komen, horcht mol no mie!" Funk hee aun to prädjen. "Dise Menschen sent nich besopen, soo aus jie veleicht jedocht haben, wiels daut nu zemorjes es. Vondoag haben wie dän Heiljen Jeist jekjräajen, dän de Profeet Joel ver lange Tiet em Verut jesajcht haft. Väle Dinja, dee en de Schreft em Verut jesajcht worden sent, haben sikj en de latste Wäakjen erfelt. Un waut jie vondoag meterläft haben, es daut Raufkomen vom Heiljen Jeist. Aules, waut met däm Jesus von Nazaret passieed, wia uk von de Profeeten em Verut jesajcht worden. Hee deed väle Wunda, om to bewiesen, daut Hee de Sän von Gott es. Trotzdäm, hab jie Jesus met Halp von de Reema jekjriezicht. Oba Gott haft Am von dän Doot oppjewakjt."

"Dit jleew wie, wiels wie aula Zeijen doavon sent. Wie haben Am no de Hanrechtunk met ieejne Uagen jeseenen un wie weeten, daut Hee läft. Wie sagen Am en dän Himmel noppfoaren. Un nu haft Hee ons dän Heiljen Jeist jeschekjt. Lot junt aula sajen, daut Gott disen Jesus äwa aules toom Harn jemoakt haft."

De Meaheit von de Menschen dort kunn nich aundasch, aus seenen, daut Gott selfst derch Petrus to äant räd. See twiewelden nich aun de Woarheit von däm Apostel siene Bootschoft. Un noch mea, see wieren deep bewäacht von siene Prädicht.

"Waut sellen wie nu doonen?" Fruagen see Petrus.

"Doot Busse! Lot een jiedren von junt jedeept woaren, om to wiesen, daut jie een nieet Läwen met Gott aunfangen woaren", auntwuad hee, "un dan woa jie de Gow vom Heiljen Jeist kjrieen. Wiels waut de Profeeten jesajcht haben, diet sikj uk opp junt."

Dusende Menschen hieeden Petrus siene Prädicht to. Aun disem Dach worden onjefäa dree-dusent Menschen jedeept. Aula neemen daut Evangelium von Jesus Christus met groote Freid aun.

Soo entstunt aum Pinjstdach, däm Dach daut de Heilja Jeist raufkjeem, de ieeschte Kjoakj.