Een Huachbeaumta woat opp dän Gloowen jedeept

Un een Enjel vom Harn oba räd to Filippus un säd: "Sto opp un go ... opp dän Wajch." Un hee stunt opp un jinkj. Un kjikj, een Maun, een Ätiopiauna, een Eunuch un een Jewaultja von de Kjennijin Kandace von de Ätiopiauna, dee wia äwa äare gaunze Schauzkoma jesat, dee wia jekomen, om en Jerusalem aun to bäden. Un nu kjieed hee trigj un saut opp sienem Woagen un laus dän Profeet Jesaja. Un de Jeist säd to Filippus: "Go han un hool die dichtbie disem Woagen!" Dan rand Filippus noda un hieed am dän Profeet Jesaja läsen; un hee säd: "Vesteist du uk, waut du last?" ... Filippus oba muak sien Mul op un funk von dise Schreftstäd aun un prädijd am daut Evangelium von Jesus. Un aus see delenjd dän Wajch wieda reisden, kjeemen see aun een jewesset Wota, un de Eunuch säd: "Kjikj, doa es Wota; waut hindat mie, jedeept to woaren?" Dan säd Filippus: "Wan du von gaunzem Hoaten jleefst, dan es daut erlaupt." Hee auntwuad un säd: "Ekj jleew, daut Jesus Christus Gott sien Sän es!"

Een rikja Woagen bewäajd sikj langsom de eensome Gaus velenjd. Een rikj jekleeda Afrikauna saut em Woagen un laus oppmoakjsom en eene Schreftroll. Hee wia een ätiopischa Eunuch (kjennichlicha Deena).

Tus en Ätiopien wia hee een wichtja Beaumta un haud dän Roop, een rikja un stotelja Maun to sennen. Dannoch feeld hee sikj nich jlekjlich un tofräd. Opp väle Froagen soo aus "Wäajen waut läw ekj?" Kunn hee eefach kjeene Auntwuaten finjen. Ooda "waut passieet met mie, nodäm ekj jestorwen sie? Wäa kaun miene Sinden vejäwen? Wäa kaun mie leewen, soo aus ekj sie?"

Dis Rejierungs-Beaumta hieed, daut Gott en de oole Tieden daut Volkj Israel utjewält haud, om bie äant to sennen, un äant dän rajchten Wajch jelieet haud, äa Läwen to läwen. Doawäajen wull hee no Jerusalem wanken, em Tempel bäden un Auntwuaten fa de Froagen finjen, waut am besorcht muaken. Oba wiels de ätiopischa Eunuch nich een Jud wia, leeten see am nich eemol en dän Tempel nenjegonen. Välet bleef am onkloa.

Hee wull de Reis no Jerusalem nich bloos fa Domheit jemoakt haben un soo koft hee eene Schreftroll met daut Buak vom Profeeten Jesaja, dee aul lang Trigj jeschräwen wia.

Opp däm Wajch no Hus saut de Eunuch en sienem Woagen un laus von eenem Maun, dee sikj wudd no de Profezeiunk no friewellich toom Martiera-Opfa opfren loten un dan wudden väle Menschen siene woaren. "Waut bediet daut?" Fruach hee sikj.

Un en disem Moment fruach doa wäa am: "Vesteist du, waut du doa last?"

Daut wia Filippus. Gott haud to am jesajcht, hee sull seenen no de Gaus en de Wieste to komen. Soo hieed Filippus, woo de schwoata Huachbeaumta daut Buak vom Profeeten Jesaja lud väalaus.

"Ekj vesto nuscht doavon", auntwuad de Ätiopiauna. "Oba wan du mie daut erkjläaren kaust, bitte, komm met mie!"

Filippus stieech en dän Woagen un saut met däm Eunuch.

"Von wäm rät de Profeet?" Fruach de Maun Filippus.

"Von Jesus", auntwuad hee.

"Jesus? Wäa es hee?"

Un dan funk Filippus aun, am von Gott sien Kjennichrikj un von Jesus to vetalen. Woo hee Kranke jeheelt, Menschen jeholpen un Wunda jedonen haud; woo de Priestasch un Farisäa Am hausten un schlieslich met Halp von de Reema dootmuaken.

"Daut deit mie soo leet", docht de Ätiopiauna äwalud, "ekj haud Am jieren jetroffen."

"Oba daut kaust du krakjt nu!" Säd Filippus. "Wiels Hee es opparstonen!"

Filippus vetald däm Ätiopiauna aules, waut de Jinja meterläft hauden: von Jesus siene Opparstonunk, siene Himmelfoat un däm Heiljen Jeist. Hee vetald am uk, daut Jesus siene Jinja wieren jedeept worden, om to wiesen, daut see to Am jehieeden.

"Ekj well uk jedeept woaren!" Auntwuad hee iewrich.

Filippus auntwuad: "Wan du aun Jesus jleefst, woa ekj die wellich deepen."

De Ätiopiauna nekjt met däm Kopp:

"Ekj jleew, daut Jesus Christus Gott sien Sän es!"

Aus see de Gaus velenjd fuaren, kjeemen see bat een Wota. See stieejen ut däm Woagen, jinjen en daut Wota un Filippus deept am.

Dän Ätiopiauna sien Hoat wia voll Freid. Hee wull sikj bie Filippus bedanken, sach am oba nich wada. Oba nu wist de Eunuch, daut Jesus fa emma bie am sennen wudd un jinkj voll Freid sienen Wajch.