Saulus woat Jesus sien Nofolja

Saulus oba schnoof noch emma rom met dreiwen un morden jäajen däm Harn siene Jinja un jinkj nom Huagenpriesta un foddad Breew von am aun de Synagogen en Damaskus, daut, wan hee irjent, Mana uk Frues, von disem Wajch funk, hee äant jebungen kunn no Jerusalem fieren. Un aus hee doahan reisd, passieed daut, aus hee dichtbie Damaskus kjeem, scheen rom am onverhofs een Licht vom Himmel. Un hee foll opp de Ieed un hieed eene Stemm, dee säd to am: "Saul, Saul, wuarom vefolchst du Mie?" Hee oba säd: "Wäa best Du, Har?" Un de Har säd: "Ekj sie Jesus, dän du vefolchst." ... "Sto opp un go en de Staut nenn, dan woat die jesajcht woaren, waut du doonen saust."

Doa wia een Maun, dee een Jefaulen aun Stefanus sien Doot haud – Saul, een junga Farisäa, dee Christen vefoljd. Hee deed siene Freid doaräwa nich bedakjen, daut Stefanus, eene wichtje Persoon en de junge christliche Kjoakj, doot jemoakt worden wia. No Stefanus sien Doot funk de grausome Vefoljunk von de Jleewende aun un Saul wia stoakj doaraun bedeelicht. Hee jleewd, doamet Gott jedeent to haben.

Eenmol äwanaum Saul eene Reis no Damaskus, wua daut eene butajeweenlich groote Zol von Christen jeef. Hee plond, äant faust to nämen un no Jerusalem to brinjen, om äant aus Vebräakjasch en daut Jefenkjnis to stoppen. Doatoo kjrieech hee vom Huagenpriesta eene schreftliche Erlaubnis.

Aus hee noda no Damaskus kjeem, passieed waut, daut sien Läwen gaunz veendad. Plazlich wort hee von een blenkjajet Licht blint jemoakt. Saul faul no de Ieed un hieed eene Stemm vom Himmel sajen:

"Saul, Saul, wuarom vefolchst du Mie?"

Saul fruach ut Angst: "Wäa best Du, Har?"

De Stemm auntwuad: "Ekj sie Jesus, dän du vefolchst."

Nu zettad Saul ut Angst un Ieaforcht fa disen Jesus, von däm hee emma behaupt haud, hee es een faulscha Profeet un een Läajna. Saul, de Forcht aunräajden Vefolja von de Jemeent Jesus Christus – hee wist nu, daut hee orrajcht wia. Plazlich wort am kloa, daut Jesus, dee vom Himmel to am räd, Gott sien Sän wia, de Messias, von däm de Profeeten jerät hauden.

Jesus säd to am: "Nu sto opp un go en de Staut nenn, un die woat jesajcht woaren, waut du to doonen hast."

Saul stunt von de Ieed opp, oba aus hee de Uagen opmuak, bemoakjt hee, daut hee nuscht seenen kunn. Soo neemen de Menschen am, dee bie am wieren, bie de Haunt un brochten am no Damaskus. Dort wia hee fa dree Doag blint un eet un drunk nuscht. De gaunze Tiet haud hee no Gott jeroopt un Am om Vejäwunk jefroacht. Dree Doag lota schekjt Gott eenen Maun met Nomen Ananias no Saul. Hee läd am de Henj opp un bäd to Gott, daut Saul sien Seenen mucht häajestalt woaren. Nodäm hee sien Sennen trigj-kjrieech, leet Saul sikj deepen un jinkj bie de christliche Kjoakj bie.