Jesus foat nopp nom Himmel

Un Hee säd to äant: "Soo steit jeschräwen, un soo must Christus lieden un aum dredden Dach von de Doodje oppstonen; un en sienem Nomen sull jeprädicht woaren de Busse un Sindenvejäwunk mank aule Velkja, aunfangen von Jerusalem. Jie oba sent Zeijen von dit. Un kjikj, Ekj schekj de Vespräakjunk von mienem Voda opp junt;" … Hee leid äant oba rut bat Betanien un hoof siene Henj opp un säajend äant. Un daut passieed, wäarent Hee äant säajend, scheed Hee sikj von äant un wort noppjehowen en dän Himmel. Un see bäden Am aun un jinjen trigj no Jerusalem met groote Freid.

Woo wundaboa wieren de Doag, aus de opparstonenda Heilant siene Jinja bejäajend un met äant räd! Oba dee Doag kunnen nich eewich sennen. Jesus sull no sienem Voda en dän Himmel trigjgonen.

De Eelboajch wia een gooda ruja Plauz un Jesus brocht siene Frind dort han. De Jinja wieren truarich. See wisten, daut Jesus boolt veloten wudd. Vieetich Doag wieren aul, von dan aus daut Passafast wia, vegonen.

"Siet nich truarich", säd Jesus, "uk wan Ekj no mienem himlischen Voda go, sie Ekj met junt. Wan jie bat aun daut Enj von de Welt gonen, om de goode Norecht von mie bekaunt to moaken, woa Ekj dort derch dän Heiljen Jeist bie junt sennen. Ekj hab junt daut foaken jesajcht: 'Wan Ekj en dän Himmel go, woa Ekj junt dän Halpa schekjen.'"

De Jinja wieren vebleft. Hee räd wieda:

"Johanes haft met Wota jedeept. Dit wia woo de Menschen äaren Velangen bewiesen kunnen een gaunz aundret Läwen to läwen. De Heilja Jeist wirkjt opp de selwja Wajch. Hee woat junt to niee Menschen moaken. Hee woat junt de Krauft jäwen, daut Evangelium wiedatojäwen. Ekj selfst woa junt derch dän Heiljen Jeist leiden. Wäajen Am woa jie kjennen Jemeenschoft met Mie haben, Mie hieren un Mie leewen. Junt woat von Gott de Krauft jejäft woaren, de Norecht von Mie hia en Jerusalem, dan en gaunz Israel un opp de gaunze Welt to vespreeden."

Dan hoof Hee siene Henj, säajend de Jinja un funk met eemol aun, no de Himmel opptoo to häwen! Hee fua hecha un hecha, bat eene Wolkj Am vollstendich ver äant vestuak. Eene soone Tranunk kjeem soo onverhofs. Wäa haud jedocht, daut Jesus soo no sienem Voda trigjgonen wudd – ver aulem en dän Himmel foaren! Nu wia Hee bie sienem Voda en eene aundre, onsechtboare Welt.

See stunden doa un kjikjten no däm Himmel. Waut sullen see nu doonen?

En disem Uagenblekj erscheenen ver de Jinja twee Mana en blenkjrich witte Kjleeda. Daut wieren Enjel. See säden to de Jinja, daut Jesus vom Himmel wada opp de Ieed komen wudd. Daut tweede Mol wudd Jesus aus Rechta komen, aus de aulmajchtja Kjennich, nich aus een Bäbe. Siene Macht un Harlichkjeit wudd kloa to seenen sennen. Bat dan läft Hee en de Jleewende äare Hoaten un rejieet em Himmel.

De Jinja dochten aun Jesus siene latste Wieed. See freiden sikj un jinjen trigj no Jerusalem.