De Enjel Gabriel lat sikj seenen von Maria

Un en de saste Moonat wort de Enjel Gabriel von Gott jeschekjt no eene Staut en Galiläa, met Nomen Nazaret, no eene Junkfru, dee eenem Maun met Nomen Josef, vesproaken wia, ut David sien Hus, un de Junkfru äa Nomen wia Maria. Un de Enjel kjeem bie ar nenn un säd: Sie jejreest, du Bejnodichte! De Har es met die ... wiels du hast bie Gott Jnod jefungen … Un kjikj, du woascht schwanga woaren un eenen Sän jebuaren, un du saust sienen Nomen Jesus nanen. Dee woat groot sennen, un däm Hechsten sien Sän jenant woaren …“

En de kjliene Staut Nazaret en Galiläa läwd eene junge Mejal met Nomen Maria. See wia to Josef vesproaken, dee een Descha wia. Un wan uk Josef un Maria oam wieren, wieren see Nokomen von däm Kjennich David. See wullen sikj boolt befrieen. Eenen Dach, aus Maria em Hus wia, Wees de Enjel Gabriel sikj onverhofs to ar. Gott haud am opp de Ieed jeschekjt.

"Sie jejreest, du Bejnodichte! De Har es met die."

Maria wia sea veschrocken un docht:

"Soo haft mie noch niemols irjentwäa bejreest."

"Hab kjeene Angst, Maria", säd de Enjel Gabriel. "Du hast Jnod bie Gott jefungen. Du woascht eenen Sän jebuaren. Du saust Am Jesus nanen (waut Erleesa meent). Hee woat majchtich sennen.

De Sän vom Aulahechsten, Gott sien Sän. De Har woat Am dän Troon von David jäwen un sien Rikj woat niemols opphieren."

Maria kunn daut meist nich vestonen, waut de Enjel säd.

"Oba ekj sie noch nich eemol befriet …" säd see met zetrende Stemm.

"Jieda menscheljet Kjint haft eenen Voda", säd de Enjel. "Oba de Sän, dän du to de Welt brinjen woascht, woat een onjeweeneljet Bäbe sennen. Gott es sien Voda. Doawäajen hab ekj jesajcht, Hee woat Gott sien Sän sennen."

Maria jleewd däm Enjel. Waut Gott ver väle hundade Joaren vesproaken haud, sull passieren! Un Maria selfst wudd de Mutta vom veheetnen Rada woaren! Oba see kunn emma noch nich vestonen, woo daut aules passieren kunn, wäarent see noch nich befriet wia. Doawäajen fruach see dän Enjel, "Woo kaun dit sennen?"

Gabriel auntwuad,

"De Heilje Jeist woat sikj doarom kjemren. De Macht vom Aulahechsten woat daut Bäbe Läwen jäwen. Un daut Bäbe, daut du to Welt brinjst, woat de Heilja sennen un Gott sien Sän jenant woaren!"

Maria wull Gott jehorchen, aulsoo säd see:

"Ekj sie däm Harn siene Deenarin. Mucht sikj dien Wuat aun mie erfellen."

Dan veleet de Enjel ar un kjieed en dän Himmel trigj.