Weise Mana von ut däm Oosten

Aus Jesus jebuaren wia en Betlehem en daut judische Launt, en de Doag von däm Kjennich Herodes, kjikj, doa kjeemen Weise Mana utem Oosten no Jerusalem un säden: Wua es de niejebuarna Kjennich von de Juden? Wiels wie haben sienen Stiern jeseenen em Oosten un sent jekomen, Am auntobäden.

En een Launt wiet auf em Oosten wonden weise Mana. Wuarom worden see soo jenant? Daut licht woarschienlich doaraun, daut see väle veschiedne Sachen jestudieet hauden. Aum leefsten beoobachteten see de Stierns.

Eenen Owent beoobachteten de weise Mana dän Himmel. Un onverhofs sagen see waut Nieet. Daut wia een dach schienenda Stiern. Doa wieren väle Stierns aum oostnen Himmel, oba dis Stiern wia gaunz aundasch aus de aundre Stierns. See hauden daut noch niemols ea jeseenen. Daut wia waut Besondret un aundasch aus aule aundre Stierns.

Gott openboad äant daut, wuarom daut niee Stiern doa wia. Daut wia een Tieekjen doafäa, daut de Kjennich irjentwua opp de Ieed jebuaren wia un wan see daut Stiern foljden, wudd dee äant no disem Plauz fieren. See wieren soo froo, daut to hieren! See fungen aun, sikj fa äare Reis reedtomoaken. See kjrieejen unja aundrem uk Jeschenkja fa dän Kjennich reed. Nodäm see jepakt hauden, muaken sikj de weise Mana opp dän Wajch.

Äare Reis wia lang, oba see foljden daut dach schienende Stiern, dee äant dän Wajch wees. Schlieslich kjeemen see bat de heilje Staut Jerusalem. De weise Mana wieren hinjaraun doaropp, dän niejebuarnen Kjennich to trafen, doawäajen muaken see sikj fuaz opp dän Wajch nom kjennichlichen Paulaust, en de Hopninj, Am doa to finjen.

Kjennich Herodes naum äant opp. Biem Owentkost stald hee sikj fein to äant un fruach äant sea jeneiw äwa dän Zwakj von äa Besuach. De weise Mana vetalden am aul wellich von daut Stiern, dän see jeseenen hauden, un siene Bediedunk – de Jeburt vom Kjennich.

"Un wiels wie Am en eenem kjennichlichen Paulaust sieekjen sullen, sent wie hiahäa jekomen", muaken de weise Mana äare Jeschicht foadich.

"Jie haben daut Rajchte jedonen", säd Herodes. "Leida, jeft daut hia kjeene niejebuarne Bäbes. Ekj mucht junt dannoch bie daut Sieekjen behelplich sennen. Daut jeft väle jelieede Mana en mienem Kjennichrikj. Ekj woa äant loten toopkomen un äant äwa aul dit befroagen."

De Jelieede en sien Launt holpen werkjlich sea met daut Sieekjen.

"De Kjennich mott en Betlehem jebuaren sennen. Soo sajcht daut Buak vom Profeeten Micha en de Bibel."

"Betlehem es nich wiet von hia", erkjläad Herodes to de utlendsche Jast. "Wan jie vondoag Nomeddach veloten un nom Sieden rieden, woaren jie dort ver daut diesta woat aunkomen. Ekj bedd junt, sieekjt flietich no daut Kjint, un wan jie opp däm Trigjwajch sent sajcht mie wua daut es, wiels uk ekj well dän niejebuarnen Kjennich Jeschenkja jäwen."

Herodes kunn sien beesoatjen Frintel mol afens vestoaken. Hee wull daut Bäbe kjeene Jeschenkja jäwen, hee haud oba väa, daut doot to moaken. Oba de weise Mana wisten nuscht doavon.

Schaftich muaken see sikj wada opp dän Wajch. Daut wia aul dunkel, aus see bat Betlehem

kjeemen un see kunnen de Stierns aum Himmel seenen. De weise Mana wieren sea froo, aus see mank de väle Stierns dänjanjen sagen, dee äant opp de gaunze Reis fieed. Daut Stiern jinkj ver äant un bleef äwa de Städ stonen, wua daut Kjint wia.

"Hia mott daut sennen!" freiden see sikj. "Krakjt en disem Hus! Gott haft ons dän Wajch jewäsen!" Aus Josef ieescht de ieeboare Mana en siene kjliene Woninj nenkomen sach, kunn hee daut nich jleewen.

Maria un hee hauden noch niemols soone wichtje Jast ut eenem Launt von soo wiet auf bie äa Hus jehaut.

"Wie sieekjen dän niejebuarnen Kjennich von Israel!" säden de Besieekja.

"Daut Bäbe es doa", auntwuad Josef un wees no daut Bäbe.

Daut wia sondaboa, soone jelieede, ieeboare, rikj jekleede Menschen to seenen, dee sikj ver daut Jesus Kjint dolbekjten un Am aus Gott lowden.

Oba waut passieed daut näakjste? De weise Mana neemen äare kostboare Jeschenkja rut: Golt, Weiruak un Mirren un jeewen dee no Jesus.

Nodäm see sikj von daut Kjint Jesus, Maria un Josef Aufscheet jenomen hauden, veleeten de besondre Jast.

Enne Nacht openboad Gott eenem von de weise Mana en eenem Droom de woare Plons dee Herodes haud.

"Gott haft to mie jerät", säd hee to siene Frind. "Hee säd to mie, daut Kjennich Herodes nich soo frintlich es, aus hee scheen to sennen. Hee wull daut Kjint nich Jeschenkja jäwen, oba haft sikj väajenomen Am Schoden auntodoonen. Doawäajen sullen wie niemols no dän kjennichlichen Paulaust trigjgonen."

Aulsoo kjieeden see trigj no Hus, onen däm grausomen Kjennich to sajen, daut see daut Kjint jefungen hauden.

De näakjste Nacht räd Gott uk en eenem Droom to Josef. Am wort jesajcht, hee sull met siene Fru un sienem Sän no Ägipten ranen. Onen Luaren stunt Josef opp, neem daut Kjint Jesus un Maria un muak sikj enne Nacht opp dän Wajch. Daut wia een lange Wajch no Ägipten. Ieescht mol lota hieeden see, woo Gott äant ver groote Schwierichkjeiten bewoat haud: Herodes wia sea doll jeworden äwa de weise Mana, wiels see am nuscht säden. Doawäajen befool hee, aule Junges bat daut Ella von twee Joa doot to moaken, dee en un om Betlehem läwden. Hee hopt, dän niejebuarnen Kjennich mank äant to finjen, oba Jesus wia bat donn aul en Sechaheit.

Korte Tiet lota storf Herodes.

No Herodes sien Doot schekjt Gott Josef noch eenen Droom, en däm am een Enjel säd, daut see nich mea en Jefoa wieren un nu trigj no Israel gonen kunnen. Josef pakt wada opp, neem Maria un Jesus met un jinkj trigj en äare Heimstaut Nazaret. Dise Staut wia de Plauz, wua Christus siene Kjintheit un Jugentjoaren toobrocht.